Oshilyo shongudu yoLandless People’s Movement Utaara Mootu okwa pula ngee minista womaudano Agnes Tjongarero ota tewaatewa moilonga molwekateko lokulonga okapale kedina Independence Stadium mOvenduka.
Mootu Etivali momutumba wopashiwana okwa pula minista womombelewa yapelesidente Christine //Hoebes kombinga yaasho tashi ningwa po kombinga yaminista womaundano, ovanyasha nosho yo omayakulo oshiwana eshi ehe na eshi a ninga po kombinga yokuwapaleka okapale.
“Pakutala kondjudo yoshinima eshi nosho yo kedopo loministili youdano kombinga yoilonga pefimbo olo kwa li la tulwa po, oto pula ngaa pelesidente opo a katuke onghatu yomeendelelo, mwa kwatelwa nande okukufa minista moilonga? Ngee hasho, oshike naana tashi popile okwaalulila minista moilonga?” Mootu osho a pula ngaho.
Netumbo Nandi-Ndaitwah okwa li a yandja oushima kuTjongarero eshi a dopa okutameka okuwapaleka okapale.
“Omahoololo eshi e li popepi, opu na omalipulo kutya oinima ei oyopolitika tai lalakanene okunana omawi ovanyasha. Kwashilipaleka oshiwana kutya eshi kashi shi ashike okunana ovahoololi, otapu ka ningwa ngaa omatokolo omondjila omanga omahoololo inaa tameka?” Mootu osho a pula ngaho.
Nandi-Ndaitwah Etitano la dja ko okwa li a yandja oushima kuTjongarero eshi a dopa okutameka oilonga yokuwapaleka okapale koIndependence Stadium. Okwa ti Tjongarero okwa li a shanga kutya oilonga yokuwapaleka okapale otai tameke momafiku 28 Auguste nokuhoolola omunhu ou ta longo oilonga oyo, ashike okwa dopa vati okufimaneka eudaneko eli. “Onda udifwa nai kuminista. Paife ngaha otu na ovanhu vetu vomaudano ovo hava ka danena kondje yoshilongo, shaashi katu na okapale moshilongo.
“Ova lombwela nge kutya otava ka tameka oilonga momafiku 28 Auguste ndee eshi nda pula kutya oilonga oya fikama peni paife, kakwa li pu na eshi shi li po. “Onda kala alushe nokupula ouyelele nokwa li nda lombwelwa kutya ohatu ningi nawa, ashike paushili woovene kapu na osho tashi ningwa po,” Osho a ti ngaho. Nandi-Ndaitwah okwa ti ovaleli inava twikila nokuheka oshiwana shaashi ohashi teya elineekelo.
“Itandi va pitike va twikile nokufundja. Itandi shi efa, ondi na okukala nda longa navo, opu na omunhu e na okukalela po oshinima eshi,” Osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
