Omaudaneko aVenaani

… ongudu oya udaneka okuungaunga nokuhena oilonga nosho yo omaumbo

Ogudu yoPopular Democratic Movement (PDM) oya tameka oyoongalele yayo yokulombwela ovanhu osho tai lalakanene okukaninga ngee oya findana po omahoololo konima yoshivike shoshoongalele shayo shokuhoolola ovaleli vongudu osho kwa li sha pewa oushima neenghono kovandjadjukununi.

Oshoongalele osho osha ulika kutya ovaleli vakula vongudu ova shuna peenhele davo mongudu.

Ovandjadjukununi vamwe vopolitika ova yandja oushima komulandu woudemokoli oo ongudu ya longifa mokushuna ovaleli ava peenhele davo dikulu inava eta mo nande ovanhu vamwe vape.

Mokati kovaleli ovo va shuna peenhele davo omwa kwatelwa pelesidente wongudu McHenry Venaani, omupedu pelesidente Jennifer van den Heever, hamushandjai Manuel Ngaringombe, nomupedu waye, Linus Thobias, omunashipundi wopashiwana Diederick Vries nosho yo omunambelewa woshimaliwa Nico Smit.

ELITULEMO LAKULA
Omaudaneko oPDM momudo 2024 omwa kwatelwa okuungaunga nokuhena oilonga, okutunga omaumbo eehepele nosho yo ovanhu ovo hava mono oiyemo i li pedu, okutwala ounamapya nounaimuna pombada nosho yo okuyandja onghalamwenyo iwa kOvanamibia aveshe.

Ashike nee nande ongaho omaudeneko aa opaife, okwa li nale omaudaneko eengudu dihapu momudo 2019.

Ongudu yoPDM pefimbo opo okwa li ya ninga omaudeneko okuungaunga nokuhena oilonga, okutula moilonga omulandu wokukala omunhu umwe e na ashike ofaalama imwe opo kukandulwe po oupyakadi wedu, nosho yo okuxwepopeka ehongo moshilongo noundjolowele.

Venaani okwati ongudu oye lipaka mo kufinika epangelo li longe nawa eshi tai eta eenghundafana odo tadi xwepopeke eenghalamwenyo dOvanamibia aveshe. “Kamu na ongudu moshilongo omu oyo tai ti oya ninga eshi twa ninga. Kamu na ongudu tai dulu okuninga eshi twa ninga, shaashi otwa kala hatu longo oilonga yetu okudja kefiku lotete fiyo onena,” Osho a ti ngaho.

Venaani okwa ti oPDM oye litula mo mokutula moilonga omaudaneko ayo kutya nee omepangelo lehengumukilo mumwe ile okuyoovene ashike, opo i twale oshilongo komesho.

“Oilalakanenwa oyo ya popiwa momaudaneko etu oya yela, otai dulu okuningwa. Otwa kundafana oinima ihapu ya fimana,” Osho a ti ngaho.

‘ONDJODI IWA’
Omundjadjukununi woikwapolitika Ndumba Kamwanyah okwa ti omaudaneko ongudu yoPDM omudo 2024 okwa kwatela mo oinima iwa.

“Molwonghalo youpyakadi wopaliko laNamibia paife ngaha, ngaashi eliko itali kulu, okuhena oilonga ku li pombada nosho yo eengunga depangelo, okudimbuluka oilalakanenwa ei otaku kala kudjuu,” Osho a ti ngaho. Kamwanyah okwa ti omutengenekwafaneko weepelesenda 10 woshikondo shounamapya nounaimuna otau dulu okuningwa ngee epangelo ola fimaneke ounamapya nounaimuna ongoshinima tashi dulu okukwatela komesho eliko.

Okwa ti oshinima eshi opo shi ningwe otashi pula omilandu da fimana nosho yo okuyandja oshimaliwa, tashi dulika tashi di koikondo ikwao nokuli.

“Okuyandja eepelesenda 10 domutengenekwafaneko kounamapya nounaimuna oshinima shakula, pakutala kutya ounamapya nounaimuna ou li oshikondo sha fimana shoilonga nosho yo shoikulya ya wana moNamibia,” Osho a ti ngaho.

Kamwanyah okwa tengeneka kutya oPDM oya pumbwa i popile kuningwe omalunduluko momutengenekwafaneko, unene ngaa okuteta koinima imwe oyo ihe na oshilonga unene.”

‘OINIMA ITAI SHIVA OYO’
Omundjadjukununi woikwapolitika Henning Melber okwa ti omaudaneko naasho sha alika koPDM osha fa ashike oinima iheshi yoshili. Okwa ti oinima oyo ongudu ya hala okuninga otai shiva ashike ngeeno ongudu okwa li i na eenghono dokuninga omatokolo.

“Eshi tashi hokwifa, inapa kala nale ongudu yomilameno otai popi nawa onghandangala yayo oyo tai ka dana ngaashi ngaha,” Osho a ti ngah.

Melber okwa ti eengudu dihapu ode lifa manga omahoololo inaa ningwa, puhe na omhito yokuhoololwa i lele, eshi otashi dulika shi kale shiwa pefimbo lokuninga omaudeneko.

“Okuyandja eepelesenda 10 domutengenekwafaneko kounamapya nounaimuna otashi ti okuteta keshe pamwe. Epulo oli li apa kutya openi? Osha yela kashi fi kehongo, ile koundjolowele, oyo aishe, pamwe nokufuta eengunga nosho yo eameno oyo oinima oyo hai mono shihapu momutengenekwafaneko,” Osho a ti ngaho.

Oshimaliwa otashi di peni pefimbo loshikukuta sha nyika oshiponga ngaha, osho a pula.