… Elelo lopamufyuululwakalo lUukolonkadhi otali ti ongudu ei oya dja koAngola
Ongudu yOvazemba oyo i li koshitopolwahoololo shaMusati otai twikile nokulonga noudjuu i mone ouhamba wayo, shaashi okwa itavelwa kutya oya yambuka koAngola.
Omunashipundi welelo lopamufyuululwakalo wUukolonkadhi, Andreas Amunyela, Etivali okwa ti oshiwana shOvazemba osho shi li moshitopolwahoololo, osho sha kala nokukondjifa okutota elelo lasho lopamufyuululwakalo, kave shi Ovanamibia konduko.
Okwa ti Ovazemba kave na mo edu melelo lopamufyuululwakalo lUukolonkadhi.
“Pedu opo ve li ole lelo lopamufyuululwakalo wUukolonkadhi,” Amunyela osho a ti ngaho.
Okwa ti Ovazemba mUukolonkadhi ove ya mo omanga kwa li ina dalwa. Ovakwashiwana vamwe vomelelo lUukolonkadhi ova tala ko ongudu yovanhu ava kutya eenauki dihe li paveta da dja koAngola.
Ehangano lokwaandjakaneka omawi momhepo laNambia ledina Namibia Broadcasting Corporation (NBC) oshivike sha dja ko okwa li la lopota kutya Ovazemba otava ti kutya onghendabala yavo yokuninga elelo lavo lopamufyuululwakalo kai na eshi ya eta po konima yeedula di dulife po30.
Ovazemba okwa li va ninga oshoongalele omafiku aa komukunda wedina Ovikange moshikandjohoololo shaRuacana opo va kundafane kutya oshinima osho tava pula osha fikama peni.
Ova pula oshiwana, novapopili voufemba womunhu nombelewa yomukonakoni woimbofa yepangelo opo ve lidope mo va mone enyamukulo liwa kombinga yoshinima eshi.
Momukanda wa nyolelwa komuleli ina tambulwa ko wOvazemba Julius Mwayambwatji muOktomba momudo 2022, omuleli welelo lopamufyuululwakalo wopakafimbo welelo lUukolonkadhi Malakia Shoombe okwa ti oshiwana eshi nashi xulife po okupula okutota elelo lavo lopamufyuululwakalo melelo lopamufyuululwakalo lUukolonkadhi meendelelo.
Shoombe okwa ti elelo lopamufyuululwakalo lUukolonkadhi okwa li la ninga oyoongalele i li inhe nongudu yOvazemba pokati komafiku 16 Septemba 2021 nomafiku 30 Januali 2022.
Ovazemba ovo ve li kUukolonkadhi ova hala elelo lavo vene lopamufyuululwakalo opo va kale ve na emanguluko lokuninga oinima yavo yopamufyuululwakalo, osho a ti ngahao.
Ongudu ei oya itavela kutya elelo lopamufyuululwakalo lUukolonkadhi ole va indika oufemba ou shaashi kave na omuleli wopamufyuululwakalo wavo vene.
“Uukolonkadhi otau twikile nokukala kumwe, inau pumbwa okukala wa topolwa. Uukolonkadhi onhele yopamufyuululwakalo wAakolonkadhi, ashike owa manguluka okutambula ko ovanhu okudja koilongo yopoushinda ovo va dja koilongo yavo molwoinima ya yooloka,” Shoombe osho a ti ngaho.
Okwa ti Uukolonkadhi owa idilila Ovahimba, Aandongona, Aankumbi, Aakwankwa, Aatjihokue, Aahokaone, Mbundu nosho yo eengudu dihapu da dja koAngola. “Uukolonkadhi owe va tambula ko ndee tau va pe onhele neameno medu lavo olo li li po nale. Kapu na nande omunhu umwe womwaava e na edu meni leengaba dUukolonkadhi.
“Ova manguluka alushe okukala ngaashi va hala novamanguluka okuninga oinima yopamufyuululwakalo wavo, shama ashike itai kondjifafana noveta nelandulafano lelelo lopamufyuululwakalo lUukolonkadhi,” Osho a ti ngaho.
Shoombe okwa ti Omuzemba umwe okuli ongokamusela yakula melelo lopamufyuululwakalo wUukolonkadhi. “Inashi pumbiwa okutota po elelo limwe lopamufyuululwakalo mulikwao olo li li po nale lUukolonkadhi,” Osho a shanga ngaho.
“Paife omuleli nelelo lopamufyuululwakalo lUukolonkadhi ola hala nola teelela oshiwana shOvazemba shi xulife po okupiyaaneka elelo lopamufyuululwakalo noshikumungu eshi.”
Shoombe okwa ti kutya omuleli omukulunhu welelo lUukolonkadhi Daniel Shooya nelelo lUukolonkadhi lopamufyuululwakalo ole lineekela nola hala Ovazemba va ekeleshi filufilu edilaadilo lokutopola elelo lopamufyuululwakalo lUukolonkadhi, nde tave li fiye li li nawa. Shoombe momukanda waye okwa ti vati Ovazemba ova teelelika va xulife po oshinima eshi shokukondjela edu olo li li nale koshi yelelo lopamufyuululwakalo lUukolonkadhi.
Etivali okwa koleka koThe Namibia kutya omukanda okwa li wa tuminwa kominista momudo 2022, ashike okwaanya kutya Ovazemba ova indikwa okuninga oinima yopamufyuululwakalo wavo. Okwa ti kutya, ove li navakwao va manguluka.
Kamusela wokoshitopolwahoololo shaRuacan Andreas Shintana okwaanya okutya ko sha koshinima eshi, ta ti yee ke shi omuleli wopamufyuululwakalo.
Oshiwana shOvazemba oshi li moshikandjohoololo shaRuacana. Elelo lUukolonkadhi lopamufyuululwakalo nosho yo eeminista mbali dikulu domayambulepo eedoolopa noitopolwa yokomikunda okwa li vaanya oshinima eshi shokutota elelo lopamufyuululwakalo lOvazemba.
Minista mukulu Nicky Iiyambo oye kwa li ominista yotete yomayambulepo eedoolopa noitopolwa yokomikunda kwa li aanya oshinima osho tete.
Okwa li a lombwela omuleli wOvazemba ina tambulwa ko Jonas Tjikulya muJuli 2001 kutya inashi pumbiwa okutota elelo limwe lopamufyuululwakalo melelo olo li li po nale lUukolonkadhi.
“Ovazemba nava manguluke okudana oinima yavo yopamufyuululwakalo, eenghedi nosho yo elaka koshi yelelo lopamufyuululwakalo lUukolonkadhi olo li li po nale,” Iiyambo osho kwa li a nyola ngaho.
Minista mukwao mukulu, Jerry Ekandjo, muSeptemba 2009 okwa li a nyola kutya kapu na omumbwe yokutota elelo lopamufyuululwakalo la yooloka lOvazemba.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
