Ombiya yoSwapo otaku tiwa mbela oya tala ashike kwaavo ve shiivike nawa

… Ovandjadjukununi ova ti omahoololo inaa tala kowino womunhu

Ovandajadjukununi voikwapolitika ova ya dja oushima komusholondodo woilyo yoSwapo oo wa pita omafiku aa waavo tava ka ya mopaliamente, tava ti mbela okwa li ashike kwa talika kwaavo ve holike unene, ponhele yokutalike keeshiivo olo ve na.

Eshi oshe ya konima eshi ovanyasha ngaashi Fenny Tutjavi, Emma Theofelus naWillem Amutenya ovo ve li pombada yomusholondodo wongudu, opamwe novaleli ngaashi Ephraim Nekongo naTobie Aupindi.

Ovandjadjukununi natango ova yandja oushima eshi Apheus !Naruseb aalulwa, oo kwa li a dopa okushuna kuuminista momahoololo opashiwana momudo 2020.

Omupedu hamushandjai woSwapo Uahekua Herunga, nande ongaho, okwa ti eyandjo loushima eli oli li etukano lakula kOvanambia.

“Ovahoololwakalelipo ve dulife po200 va dja koikandjohoololo i li 121 ovo kwa li veya okukalela po Ovanamibia vahapu okudja koitai ya yooloka ova hoolola ovanhu ovo va dilaadila nokwiitavela kutya otava dulu okuninga shihapu osho sha pumbwa okulunduluka. Opo omunhu a tye ngaho, osha fa ngeno to ti ondi mulai,” Herunga osho a ti ngaho.

Omundjadjukununi woikwapolitika Rui Tyitende okwa ti omusholondodo wopaife otau ulike kutya okwa li pu na eanyo la yukilila lovanhu ovo va kala nokulonga nale nosho yo ovanhu ovo ve na onyalo.

“Ashike nee, etomeno lashike omunhu ngaashi Alpheus !Naruseb aalulwa okudja moshipundi shetulumuko konima eshi kwa li a dopa okushuna kouminista momudo 2020? Omukalo ulipi wa longifwa opo kuhoololwe ovanhu ava momusholondodo omu?” Tyitende osho a pula ngaho.

“Okwa li kwa talwa kowino wavo wopaumwene, ile okwa li kwa longifwa ekutu osho sha eta opo va kale ve li meni lo40 momusholondodo? Pauxupi omusholondodo ou yadi unene ovanhu ovo ve shiiveke nawa shi dulife ovo tava dulu okulonga,” Osho a ti ngaho. Omundjadjukununi woikwapolitika Ndumba Kamwanyah omusholondodo u hadi ovanysha otau ulike kutya Swapo ota kendaba okuninga omalunduluko onumba.

“Eshi otashi dulika shipopile kutya Swapo okwa hala okuninga omalunduluko opo a nane ovanyasha va hoolole, unene ngaa eshi sha yukapomahoololo omudo 2024. Ashike nee, okukufa mo ovanhu ovo va kala mo to tula mo oipala ipe otashi dulika omukalo wokutota efikopamwe pokati kowino netoto loinima ipe,” Kamwanyah osho a weda po ngaho.

Okwa itavela kutya oindjemo yopaife otashi dulika yeete omatopauko moungudu vomeni longudu ve udite kutya ovanhu vavo ovo kwa li va hala okwa li va kufwa mo.

“Ngee ovalineekelwa ova pingelwa po, otashi dulika shiha udife nawa ovayambididi vavo. Ngee ongudu oya kala i wete inai ningwa nawa, eshi otashi dulu shi ete omananafano meni longudu, oo taa dulu okuuya pefimbo lokuninga oikonga,” Osho a ti ngaho.

Okukufa mo ovanhu ngaashi Utoni Nujoma naErastus Uutoni otaku ulike onghatu oyo ya kala ya alika nale yokukufa mo ovanapolitika ovo va longa nale mu ye vamwe vape, osho a weda po ngaho.

“Eshi otashi dulika shi kale onghendabala yokuyandja edidiliko kutya oinima otai ende nokulunduluka moSwapo. Ashike nee, omadina manene aa okwa kala a fimana koSwapo nosho yo mopolitika aishe, nde ekufe mo lavo otashi dulika li topaule ongudu,” Kamwanyah osho a ti ngaho.

Okwa ti kutya okupingena po ovanhu ovo va kala ve lineekelwa novanapolitika vovanyasha, kuye otashi dulu okweeta eenghono dipe, omadilaadilo ape nosho yo omikalo dimwe depangelo dipe. Ashike nee, oshinima eshi otashi ka longa ashike ngee ovanyasha ove na owino nove lilongekida okuungaunga noinima yakula noya pumbiwa kepangelo, osho a weda po ngaho.

“Ngee oshiwana shipe kashi na owino wa pumbiwa ile itashi dulu okuhanganifa ongudu, otashi dulika shi ete omaupyakadi. Ashike ngee ove lilongekida nawa, eshi otashi dulu okuyambula po Swapo nokuvatela ongudu i kale ya pumbiwa monakwiiwa.”

EXULILO LOUNYNI

Momudo 2020, minista woikwameni, omatembu neameno Albert Kawana okwa li a shiivifa eyomoshipundi shetulumuko laye okudja mopolitika, ta ti efimbo ola fika okuyandja eemhito kovanyasha va kwatele komesho oSwapo.

“Ondi wete kutya efimbo ola fika shili lokuyandja omhito kovanyasha,” Kawana osho a ti ngaho.

Ovaleli vakwao ovo kwa li va holola ehalo lavo lokuya mopendjela ongaashi omunashipundi womutumba wopashiwana Peter Katjavivi, minista wounamapya nounaimuna, omeva nomatendululo omadu Calle Schlettwein, pefimbo opo, okwa ti oku na ondunge yokutameka okushangan nokufaneka nosho yo minista wefikopamwe loukakwashikekookanhu, ekufepo loluhepo nosho yo onghalonawa yopanghalafano Doreen Sioka.

Oshoondaxa, minista womaudano, ovanyasha nomayakulo oshiwana Agnes Tjongarero okwa li a popya kutya ita ka kufa nande ombinga momafiyafanepo okuya mopaliamente.

Okwa ti okwa longa ko shaye nota kala ashike ta talele komutunda.

“Ovanhu nave uye ndee tava ningi ko shavo ndee inava kala ashike ve li pondje voo tava popi, nave uye ndee tava longo ndee handi tale. Ohandi kala handi va tale ndi li kwii. Onda longa ko shange,” Tjongarero osho a ti ngaho.