Shunifeni oimaliwa – omahangano ovanailonga kombinga yokushunifa oimaliwa yotekisa

Omahangano ovanailonga aa ti ovayandji voilonga nava shunife oimaliwa yotekisa yovanailonga muOktomba omo mwa fanekwa omo mu ka tameke okushunifa oimaliwa yotekisa.

Oministili yoshimaliwa oya shiivifa elunduluko lokatendo kokufuta oishoshela yepangelo olo la tameke muMarsa, ashike nee, okwa li ashike sha shiivifwa pambelewa oshivike eshi.

Elunduluko eli otali eta ovafututi voishoshela va ka shunifilwe oshimaliwa shavo muOktomba.

Momido da pita dotekisa, ovayandji voilonga okwa li va nana oshimaliwa keendjabi dovanailonga she likolelela komulandu woishoshela ukulu.

Konima eshi eendado dipe kwa li da totwa, ovayandji voilonga vamwe otashi dulika va nana ovanailonga oshimaliwa sha pitilila.

Omukwateli komesho mukulu womahangano ovanailonga Primus Joseph okwa ti ovayandji voilonga nava shunife oshimaliwa shovanailonga vavo ndee ngee omuyandji woilonga okwa dopa okufuta, ovanailonga nave va twale kovakalelipo vovanailonga.

“Nave liufe keemhango, shaashi kapu nande omalipopilo kombinga yoveta. Ngee itave liufa keemhango, nava twalwe kokomisi yovanailonga opo omupotokononi a ninge etokolo,” Joseph osho a ti ngaho.

Omunawino monima ya pamba oilonga Herbert Jauch okwa ti peemhito opo ovayandji voilonga tava ka kala inava shunifa oshimaliwa shovanhu, ovanailonga, tava yambididwa komahangano avo, nava fikamene omuyandji woilonga opo va kandule po oshikumungu eshi.

Okwa ti ngee kapu na eudafano la ningwa po, ovanailonga otava dulu okupatulula oshibofa nokomisi yovanailonga.

“Oupyakadi womilandu edi osheshi kutya odile unene. Onghee nee, omahangano naa kendabale a popye novayandji voilonga va lombwelwe kutya ove na oshinakuwanifa shokushunifa oshimaliwa shovanailonga ngee okwa li va nanwa sha pitilila. Mupya munene osheshi oshinima eshi kwa li sha totwa koministili. Otashi dulika shi kale shidjuu kovanailonga vahapu opo va mone oimaliwa yavo,” Jauch osho a ti ngaho.

KASHI NA OWII KOVAYANDJI VOILONGA
Minista woshimaliwa Iipumbu Shiimi okwa ti itapa ka kala nande owii wa sha kombinga yoshimaliwa sheengeshefa tashi etwa ngeno kokushunifa oshimaliwa shovanhu shotekisa.

Eshi kwa li ta popi pefimbo lomutumba wopashiwana Etivali, Shiimi okwa ti okushunifa oshimaliwa shovanhu eshi itaku ka eta nande omaupyakadi asha shaashi oshimaliwa eshi tashi shunifwa otashi di koshimaliwa osho kwa li shi na okuyandjwa kehangano lokwoongela oishoshela yepangelo ledina Namibia Revenue Agency (Namra).

“Onda hala okuyeleka eudeko lapuka olo kutya elombwelo opo ovayandji voilonga va shunife oshimaliwa shovanailonga otashi dulika shi ete eengeshefa di pate.

Oministili otai pula ovayandji voilonga va nane oshimaliwa osho tashi shunifwa kovanailonga kotekisa yovanailonga oyo tai futwa kuNamra.

Ngee ongaho, koinima aishe, kapu na nande oupyakadi wa sha kelinyengo loshimaliwa lomuyandji woilonga,” Shiimi osho a ti ngaho.“Otwa didilika kutya otashi dulika pu kale eemhito dimwe opo ovayandji voilonga vehe na oshimaliwa sha wana okufuta ovanailonga aveshe omwedi umwe auke. Moshinima shi li ngaho, inatu yandja efimbo kondadalunde olo ovayandji voilonga ve na okushunifa oshimaliwa shovanhu eshi,” Shiimi osho a ti ngaho.

EPANGELO NALI FUTE TETE
Hamushangandjai wehangano lovanailongo lopashiwana laNamibia Job Muniaro okwa ti ehangano laye itali tula shinima shoshunifa oshimaliwa shovanailonga komapepe ovayandji voilonga, shaashi ovayandji voilonga ova futa nale oshimaliwa kepangelo.

“Epangelo oli na oimaliwa. Nali dule okwiishunifa kovayandji voilonga.

Omahango amwe kee na vali oshimaliwa molwoishoshela ya ya pombada, ndee oshimaliwa paife oshi li kepengelo. Ovanailonga kave na oilonga, shaashi omahangano okwa pwa po molwoishoshela i li pombada,” Muniaro osho a ti ngaho.

Okwa ti omahangano amwe ohaa futu eepelesenda 56 doiyemo yao kepangelo okupitila motekisa, nande omahangano oo oku na ovanailonga ve dulife po500.