Aantu yatatu ya mana oondjenda pethimbo lyomaidheulo

… mboka ya hala metanga lyegameno ya londodhwa kaaya holeke omaunkundi gawo gopaundjolowele

Mboka ya hala okuninga iilyo yetanga lyegameno oya londodhwa opo kaaya holeke omaunkundi gawo gopaundjolowele uuna taya ningi omaindilo gokukutwa muukwiita.

Ndhoka odha popiwa komupopiliko gwetanga lyegameno, kolonela Petrus Shilumbu, uunambo pethimbo ta popi kombinga yaadheulwa yatatu mboka ya mana oondjenda omasiku ga zi ko pethimbo lyomaidheulo guukwiita.

“Shoka itashi ti nande oya hulitha omolwomaidheulo, ashike oya mana oondjenda omanga ye li koontanda dhomaidheulo.

“Omolwiilonga mbyoka ya hala, omathimbo gamwe aantu mboka yi ithanwa komaidheulo ohaye ya ye na omaunkundi ngoka tashi vulika ya holeka ishewe inaga monikila po pethimbo taya ningilwa omapupaapupo nomakonakono gopaunamiti,” osho a popi ngaaka.

Aadheulwa ye li po-1 387 yomaadheulwa 1 434 mboka kwa li ya tameke omadheulo guukwiita muDesemba oya mana omadheulo gawo mOkahandja oshiwike shika.

Shoka osha landula sho aantu ye li 40 ya hunutha ompito yokuya komadheulo sho ya thigi po omadheulo nenge ya ndopa okupita momadheulo ga hugunina ngoka ga ningilwa kokamba yomadheulo manga inaaga tameka.

Shilumbu okwa popi kutya olundji mboka taya shongola noyena omaunkundi gopaundjolowele ohaya monikila pethimbo lyomaidheulo.

“Olutu ohalu tameke talu nkundipala kwaashoka taya ningi naashoka ohashi eta ya hulithe. Ngaashi mboka ya mana oondjenda inatu tseya lela kutya okwa li ye na uunkundi washike, ashike otandi mu lombwele kutya oya hulitha pethimbo ye li komadheulo, ashike shoka itashi ti kutya omadheulo ogo ge eta omaso gawo.

“Manga inaaya kutwa, omalutu gawo oga li nawa,” osho a popi ngaaka.

Okwa popi kutya olundji aadheulwa ihaya kala ya ndjanga pethimbo taya kutilwa momadheulo.

“Ihaya tondoka, ihaya ende oondjila oonde, nonkene uuna ya mono omadhewo omalutu gawo ohaga lunduluka,”osho a popi ngaaka.

Shilumbu okwa popi kutya uuna Uuministili wEtanga lyEgameno nIipambele yOonakulwa Aakulu tawu kongo nokukuta aakwiita ohawu pula ya kale ye na uundjolowele.

“Omuntu ina dhina nande elombwelo ndyoka, molwashoka kushi kutya onkalo ndjoka to ka adha komadheulo oyi li ngiini. Ishewe tse ihatu nongele ngele aadheulwa oye na omaunkundi ga sha,” osho a popi ngaaka.

Shilumbu okwa popi kutya oondohotola miitopolwa ohaya longo neitulemo okushilipaleka kutya oomboka owala ye na uundjolowele taya pitikwa ya ye komadheulo gopakwiita.

Minista gwetanga lyegameno, Frans Kapofi, pethimbo lyoshituthi shepito lyaakwiita oshiti-17 mEtitatu okwa gandja omapandulo kaavali sho ya pitike aanona yawo ya waimine uukwiita, oshoka opuna yalwe mboka haya kala taya sheke iilonga yuukwiita.

“Okuthikama mokati kaamboka ye na eitaalo ewinayi [kombinga yuukwiita] otashi ulike kutya omu uvite ko oompumbwe nesimano lyetanga lyegameno moshilongo shetu,” osho a popi ngaaka.

Kapofi okwa popi kutya oshi li “omupya omunene notashi uvitha nayi” okukala ya kanitha aadheulwa yatatu pethimbo lyomadheulo.

Okwa popi kutya uuministili otawu longo wa tula ombunda moshihwa okwe eta mo ombinzi ompe metanga lyegameno, mboka e na oonkondo, ye na uundjoloweele noye na euveko.

“Otatu longo neitulemo okwa adha elalakano lyokukala netanga lyegameno eshona, lya dheulikika noli na aanashilonga ya pyokoka opo yeshi pondole mokugwanitha po oshinakugwanithwa shawo.

“Elunduluko otali ningwa nelalakano opo aalumentu naakiintu metanga lyegameno ya kale monkalo yokudhiladhila sha yooloka nokuyapukila omaupyakadhi taga holoka nondjungu.