Pelesidente Nangolo Mbumba okwa lombwela ovayambididi voSwapo opo vehe lilengife pakuhoolola ovanhu ovo inava ningilwa nale omalolelo.
Okwa li ta popi koshoongalele shongudu tai pangele osho sha li kEndola Olomakaya. Mbumba okwa kunghilila kutya ngee ovahoololi ovaanye Swapo ponhele yeengudu domilameno, oAfrican Union noSADC otai kwena.
“Inamu lilengifa mu kale inamu hoolola oSwapo nyee inamu fifa oshilongo sheni ohoni pakuyandja eenghono doshlongo kovanhu inava ningilwa nale omalolelo. Inamu shi ninga. OSADC noAU otai kwena,” Mbumba osho a ti ngaho.
Omapopyo aMbumba okwe ya pefimbo eengudu dikulu dekondjelo manguluko tadi kanifa eyambidido moSADC,mwa kwatelwa Swapo.
Pelesidente okwa pula ovahoololi opo va hoolole oSwapo momafiku 27 Novemba.
“Ngaashi nda popya, otu na ondjokonona notwa longa! Onghee nee tu peni eenghono, opo tu twikile okulonga. Ihatu ningi omaudaneko ongaho ngaashi eengudu dihapu dopolitika,” Osho a ti ngaho.
Okwa weda po vali: “Okupopya okupu noku na ombilixa, ashike okulonga oshinima shimwe vali shi lili. Omanga vamwe tave mu udanekele eulu kombada yedu, oSwapo ashike tashi dulu okukwashilipaleka oukwashili wokuyambula po eliko nosho yo eyokomesho laaveshe.”
Pelesidente okwa ti ovanhu vamwe mOnamibia ova itavela kutya ova fimana nonghee nee ove udite kutya otava landulwa.
“Tava landulwa kulyelye? Owa ninga shike, nou na ondunge yashike wa hala okuninga?” Osho a pula ngaho.
Swapo okwa nyolifa Netumbo Nandi-Ndaitwah ongokandidate kaye koupelesidente kokomisi yomahoololo yaNamibia.
Omundjadjukununi woikwapolitika Henning Melber okwa ti Swapo oku na ondjokonona ya kaka shaashi ina hanga osho ovanhu kwa li va teelela pemanguluko.
“Ngaashi eengudu dikwao dikulu dekondjelo manguluko, Swapo mepangelo okwa fa ashike ongudu yepangelo nokwa longifa epangelo opo a yandje omauwa kookaume kavo nokwaavo ve na omaukwatya a fa avo,” Melber osho a ti ngaho.
Okwa ti oshiholelwa ongaashi osho shoFishrot.
Melber okwa ti omapopyo aMbumba otaa piyaaneke oudemokoli oo Swapo ta ti ota yambidida ashike iteshi ulike.
“Ovahoololi ove na oufemba wokuninga omalunduluko kombinga yopolitika pakutala koilonga yongudu yopolitika oyo i li koshipundi noi na oshinakuwanifa shokulela,” Osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
