Omunashipundi wewilikongudu loshitopolwahoololo shaKavango Ushilo Danian Maghambayi okwa ti ondjala kai fi nande etomeno lokudipaya oudila ovo ve li moshiponga shokuxula ko filufilu.
Okwa li ta popi noThe Namibian sha landula olopota yOmaandaxa yovakalimo voshitopolwahoololo shaKavango tava tele oudila va lye. Okwa ti okuyandja omahongo kombinga yokwaamena oudila ava ve li moshiponga otaku pula eenghendabala dopamuhanga.
“Ovakufimbinga noovene veekamba omo mu na oudila nava longele kumwe novaleli voshiwana mokuyandja ouyelele kovakwashiwana kombinga yefimano lokukwatela po omaludi oudila aa,” Maghambayi osho a ti ngaho. Oukongo nokukwata eeshi otaku wilikwa oshilongo ashishe, osho a ti ngaho.
Okwa ti ondjala oshikumungu shi li moshilongo ashishe, ovanhu natango otava mono oikulya yoshikukuta. Ashike nee,ovanhu vahapu ovo va kumwa koshinima eshi ova tala unene moikunomwa molwomumbwe yodula.
Mwene womukunda wedina Shamvura, Frans Ndonga, okwa ti oshidjuu okulonga ovanhu ngee omilandu itadi landulwa.
“Itandi tu ovanhu omukumo va dipaye oudila ile keshe ngaa oinamwenyo oyo ya amenwa koveta,” Osho a ti ngaho.
Ndonga okwa ti kutya mwene wokamba yaShamvura, omo mu na oludi loudila ovo va dipawa ve fike lwopo3 000 okwe litongola mo moshiwana. Eshi osha fiya ovaleli vopamufyuululwakalo noshinakuwanifa shokuxwepopaleka onghalo.
“Ovakwashiwana inava indikwa okuya keekamba odo di li popepi ile komulamba keembinga adishe yaAngola naNamibia oko haku kala oudila voludi olo,” Ndonga osho a ti.
Okwa ti otashi vatele oovene veekamba doudila ngee ova kwatele mo ovakwashiwana mokwaamena oudila.
Oministili yomidingonoko, omakuti nomatalelepo oya kunghilila ovanhu opo vaha dipaye oudila ovo. Omupopiliko woministili, Romeo Muyunda, okwa ti otava ningi omakonakono olopota youdila tava dipawa koshitopolwahoololo shaKavngo.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
