Ehangano laFrance otali anyenwa edu kOtavi konima eshi la ninga onghendabala li ninge po oshikunino shomiti dikulukulu daChina monhele oyo i shiivike nawa kutya ohai di omapungu – ashike epangelo ola ti kali na nande ouyelele kombinga yoshinima eshi.
Nande opu na omafeekelo kutya oproyeka oya mona epitikilo okudja kepangelo, opu na yo vali omalipulo okudja kovanafaalama kutya oproyeka oyo ya halika otashi dulika i ka nyanaune oushitwe ponhele opo.
Oproyeka oya kwatela mo okutula po etale lopaunongononi lounene u fike peehecta 400, nosho yo okukuna omiti di dulife peemiliyona 23, omo tamu ka kala omiti doyiimati di li 220 000.
Oproyeka ei okwa teelelwa i ka ete eemhito doilonga di li 1 850.
Ehangano ledina Romeo Africa Investments (RAI), tali wilikwa komukwashiwana waFrance, Patrick Romeo, olo li kwetele komesho oshinima eshi shipe osho hashi ifanwa ‘Oxygen Park Namibia’. Omukandaindilo wongeshefa waJuni 2024 owa ti, oproyeka otai kala i na oikondo ya yooloka: oshikunino shomiti, oikuni, oshitopolwa shokulonga oikwanghono nosho yo ombinga younamapya oyo tai kala tai longifa omaushosho opaushitwe. Omukandaindilo owa holola kutya Romeo okwa longa kehangano laFrance oule weedula omuwoi.
Natango umwe oo a tumbulwa momukandaindilo okaume kaRomeo, Baki Youssoufou. Romeo vati okwa li a ninga oshoongalele Etitano loshivike shinya sha landulwa kwaashi sha dja ko novanafaalama ve li omulongo. Koshoongalele, Romeo, okupitila moRAI, vati okwa lombwela ovanafaalama
kutya oku na ehalo lokukokola onhele younene weehecta 35 000 ndee ta kunu po omiti di dule peemiliyona 23.
Omukandaindilo owa ti, omiti odo hadi ifanwa Paulownia odo koChina nokoKorea.
Omuti oo ohau dulu okuya mombada fiyo opeemita 20.
MoJapan, omiti edi ohadi ifanwa Kiri ndee molwoilonga yado yopamufyuululwakalo nosho yo omaukwatya ado a fimana momufyuululwakalo waJapan, odi li edidiliko lepangelo laJapan nosho yo omuprima minista.
Minista wounamapya nounaimuna, omeva nomatendululo omadu Calle Schlettwein Etine okwa lombwela oThe Namibian kutya oministili yaye kaya li nande ya koleka oproyeka oyo.
Okwa ti yee ina dimina nande ekoleko loproyeka oyo.
“Kakwa li tu na ouyelele kombinga yoproyeka oyo fiyo efimbo olo ovanafaalama vamwe moshitopolwa omo ve tu lombwela kombinga yayo,” Schlettwein osho a ti ngaho.
The Namibian okwa lombwelwa kutya onhele ei tai popiwa oi li eekilometa 50 koumbuwanhu wOtavi.
Ovanafaalama vamwe ova ti, Romeo nookaume kaye ova lombwela oshoongalele kutya otava fe oule weecentimeta 30 opo va tule mo oushosho wavo wokukulika.
Opu na oumbada kutya oproyeka ei otashi dulika i ka nyanaune omwiidi nosho yo oushitwe womoixwa.
“Ova hala okuninga etale lounene weehecta 400. Tete okwa li va tya otali kala la tala modula, ndee paife ova hala omeva okudja meemboola.
Ova ti ove na epitikilo lokufa opo va mone omeva nomukulunhuwiliki wounamapya nounaimuna, omeva nomatendululo omadu ota ka talela oproyeka,” Ovanafaalama osho va ti ngaho.
Romeo okwa li a shangela kovanafaalama momafiku 20 Septemba, ta ti yee naYoussoufou otava ka kala moNamibia okudja momafiku 25 Septemba fiyo omafiku 09 Oktomba opo va shakene navo neengudu dikwao odo di na ohokwe moshinima omu kOtavi momafiku 27 fiyo 28 aSeptemba.
“Ohatu ka yandja ouyelele uhapu kombinga yoproyeka, hatu kundafana ndee hatu manifa omaudafano tu hiile edu leni nokumufuta shi li mondjila,” Romeo osho a shanga ngaho.
Okwa ti ote ke ya pamwe nakaume kaye mongeshefa, Gideon Haipanda, nosho yo haende wavo Petrus Elago.
Romeo natango okwa li a shanga kutya ota ka alukila kOtavi Etine ile Etitano la dja ko naTeddy Poncelet naAnne Fargepallet oo ta eta eepelesenda 80 doshimaliwa.
“Oproyeka oya mona eyambidido lakola okudja koministili younamapya nounaimuna, omeva nomakuti. Ohatu twikile nokukundafana nomalelo a pumbiwa opo tu kwashilipaleke eyambidido lakola,” Romeo osho a shanga ngaho.
Okwa ti ngee okwa mono omukandapitikilo ota dulu okumona omayambidido oshimaliwa ndee ta tameke noilonga modula tai ya. Omukanda ou okwa li yoo wa nyolelwa kewilikongudu lodoolopa yaTavi, nosho yo komukulunhuwiliki wodoolopa.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
