Eemanda ditoka di li o40 oda landifwapo koAmerica keemiliyona N$20

Eemanda di li o40 odo kwa li da kufwa moNamibia da ya koAmerica Omaandaxa, odi na ongushu yoshimaliwa shi fike peemiliyona N$20.

Omupopiliko woministili yomidingonoko, omakuti nomatalelepo Romeo Muyunda okwa ti mwene weemanda okwa li a pewa omukanda wokudikufa moNamibia.

Mwene weemanda natango okwa li a pewa omukanda oo tau mu pitike opo a dule okulandifa eemanda odo moAmerika.

“Otwe va pa omikanda mbali. Umwe oyoo omunhu e na okumona okudja koshilongo omo ta twala oinima nokoshilongo osho omunhu ta kufa oinima,” Muyunda osho a ti ngaho.

Omukanda umwe oo wa yandjwa oyoo tau kwashilipaleke kutya omalandifo opaunyuni oifitukuti itaa nyanauna po omaludi oifitukuti oyo.

Nande mwene okwa li a ninga eindilo leemanda di li o42, odo kwa li da kwatwa odi li ashike o40.

Muyunda okwa ti keshe omanda moNamibia oi na ongushu yoshimaliwa shi fike poN$500 000.

Okwa twikila ta ti eemnada dimwe oda kufwa keefalama dopaumwene moSouth Africa, oko oministili ihe na nande oufemba washa.

“Ohave di lande kovanhu vopaumwene okudja koSouth Africa, onghee nee ove na oufemba wokudilongifa pakulongela kumwe noveta.”

Muyunda okwa ti oministili okwa li ya wanenwa komatomeno oo a yandjwa kunakuninga eindilo eshi kwa li ta ningi eindilo loinima ei.

“Sho osho twa pitika oshinima eshi,” Osho a weda po ngaho.

“Ei oinamwenyo yopaumwene, oi li meenhele dopaumwene ndee omunhu okwa tokola okulandifa po eemanda,” Muyunda osho a ti ngaho..

OMULANDU INAU YUKA

Omukwatakanifi wehangano ledina Namibia Enviroment Education Network Liina Nantinda okwa ti omapopyo okutya oinima yopaumwene inaa yuka nandenande.

“Oifitukuti oinima i na omwenyo ya pumbwa oinima ihapu oyo omunhu ita dulu okwii wanifa po kuyeemwene,” Nantinda osho a ti ngaho.

Okulandifa po oinamwenyo ei otaku eta ashike i pwe po filufilu, osho a weda po ngaho.

“Omanga omukalo waNamibia wa fimana wokuwilika ondodo yoifitukuti yopaumwene nomilandu depangelo, natango opu na omalimbililo kombinga yonghalonawa yoinamwenyo nosho yo okuteya po oushitwe,” Osho a weda po ngaho.

Nantinda okwa ti, omulandu otau lalakanene okufikifa pamwe ekalekepo loinamwenyo nosho yo okumona ko omauwa opaliko kuyo.