Omumbwe yeengulu dofikola onghee ngaa tai twikile moitopolwahoololo imwe moshilongo nande epangelo otali tungu eengudu di li 2 065 – dimwe odo inadi pwa natango – koshimaliwa shi fike peemiliyona N$578 okudja ngaa momudo 2019.
Epangelo ola tunga eengulu dofikola di li 1 561 okudja ngaa momudo 2019 fiyo oneudo muMarsa neengulu dikwao dofikola di li 474 otadi longwa paife kehangano ledina August 26.
Ehangano ledina United Nations Children’s Fund (Unicef) eshi kwa li tali yandje ouyelele kombinga yehongo womudo 2023/24 ola ti paife ondodo yomumbwe yeengulu dofikola oya fikama po4 400.
Omukulunhu wehongo koshitopolwahoololo shaHangwena Isak Hamatwi okwa ti oshitopolwahoololo shaHangwena oshi na omatungo ahapu inaa pwa okutunga nosha pumbwa natango eengulu dofikola di lwopo400.
“Otu na eefikola dihapu da pumbwa eengulu dofikola – eengulu di li nawa. Eefikola dihapu koitopolwa yokomikunda odi na eengulu doipeleki.
“Opu na shihapu sha pumbwa okuningwa. Oshinima osheshi kutya, otu na omwaalu wovanhu tau i pombada. Otu na omwaalu muhapu wovanafikola ndee katu na osho sha pumbiwa tu dule okutunga eengulu dofikola da wana,” Osho a ti ngaho.
Hamatwi okwa ti oshitopolwahoololo, nande ongaho, ihashi longele nande ounona koshi yomiti, ashike ohashi longele momatwambe.
Oshivike eshi, New Era okwa li a lopota kutya ombelewa yehongo moshitopolwa shaShikoto okwa li ya popya kutya moshitopolwahoololo omu na eengulu di li 528 dopakafimbo odo dihe li nawa nokuhongela nokulihongela. Omupeduwiliki moshitopolwa shaShikoto Tomas Kalimbo okwa ti eshi osha kwatela mo eengulu dofikola dopakafimbo, omatwambe, eetenda nosho yo eebashu. Okwa ti eengulu adishe dopakafimbo odi na okupingenwa po neengulu daalushe ngee eefikola oda pumbwa okuyambula po ehongo nelihongo.
“Kapu na nande oimwe yomeengulu dofikola odo, twe i pumbwa, shaashi kadi li nawa nokuhongela nokulihongela,” Osho a ti ngaho.
Omukulunhuwiliki wokoshitopolwa shErongo Erfriede Stephanus okwa ti epangelo ola tunga eengulu dofikola di li 195 moshitopolwahoololo okudja momudo 2019.
“Nande otadi ufanwa kutya eengulu dofikola, otwa tunga eefikola deeproyeka mbali: Maturara Primary School noMatutura Primary School.
Oprimafikola yeendodo dopombada ei ipe, omaboloka avali e na eengulu di li hetatu otaa tungwa,” Osho a ti ngaho.
Omukulunhuwiliki wehongo ta vatele koshitopolwahoololo sha//Kharas Jesmine Magermann Omaandaxa okwa ti eengulu dofikola davo dimwe odi hadi neenghono di na ounona ve li lwopo14 va pitilila.
“Onghee nee, ohatu ka pumbwa lelalela eengulu dimwe modula tai ya, ashike odula ei, okwa li kwa tungwa eengulu di li 25 kehangano ledina August 26 . . ,” Osho a ti ngaho.
Magermann okwa ti eengulu dimwe da wedwa po di li 13 okwa li da manifwa.
“Onghee nee, omumbwe yetu mutu otai ka kandulwa po modula tai ya, neengulu dofikola dihapu, ashike paife, katu na naana onghalo oyo ihe li nawa yokuninga omalweefo okulonga,” Osho a ti ngaho.
Omukulunhuwiliki ta vatele okwa ti ova pumbwa eengulu dishona modula tai ya.
“Otwa tameka neeprimafikola dipe di li mbali. Otwa tameka ashike naimwe oyo i na eengulu nanho neengulu di li hamano kwiikwao,” Osho a ti ngaho.
Magermann okwa ti ove lineekela otava ka kala ve na eengulu di li omulongo modula tai ya.
Omukulunhuwiliki wehongo, omaunghulungu nomifyuululwakalo Sanet Steenkamp etitatu la dja ko okwa ti omumbwe yakula yoministili omatungo neefikola dihapu, kashi fi ashike eengulu dofikola.
“Otwa pumbwa eefikola dopedu nodopombada di tungwe moule wefimbo lixupi lela shi dulife paife, opo hashi pula eedula opo eefikola di tungwe,” Osho a ti ngaho.
Omatungo aa okwa kwatela mo eengulumambo, omandiki omauyelele, eelabolatoli, oundjuwo nosho yo eengulu dokulila dounona.
“Opo u ninge oshinima osho, ou na kukala u na omafaneko nosho yo omutengenekwafaneko wokuyambula po ashike omatungo,” Osho a ti ngaho.
Steenkamp okwa ti eshi osha pumbwa omukalo wokukonga oipumbiwa yepangelo wa talululwa ngaashi tashi pulwa kokatendo.
“Okutala kutya oshike sha longa eedula edi, naashi inashi longa, ohatu longo mo natango oshinima eshi ngahelipi pakulongifa okatendo kokukonga oipumbiwa yepangelo mokutunga omatungo aa a pumbiwa neenghono . . .” Osho a ti ngaho.
The Namibian odula ya dja ko okwa li a lopota kutya ehangano letanga leameno laNamibia August 26 Construction okwa li tali tungu eengulu deefikola noundjuwo peefikola depangelo oshilongo ashishe koshimaliwa shi fike peemiliyona N$255.5.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
