Omunambelewa mukulunhu wopolifi kOshakati, oo a kala nokudja peendo laina, okwa ti ovanhu otava dilaadila kutya ke li nawa ile yee oshilulu.
Erick Ndakola (56) okwa mona olukalwa kombila yaina kOmahenene, komaendo akulu odoolopa.
Ena outa wanangongo, oikuti nekatana, okwa udaneka okwaamena eendo laina.
Ndakola okwa ninga omunhu woponhele apa.
Omulumenhu ou okwa ninga etokolo opo a nangele ombila yaina konima oshipambu sheendo laye shimwe kwa li sha vakwa ko momafiku 06 Oktomba.
Okwa fiya po nee eumbo laye kOmahenene ndee tai komaendo.
Ina yaNdakola, Mirjam Ngeno, okwa xula ko konima yomido 21, nemanya laye okwa li la tulwa ko momudo 2015.
“Onda longifa oshimaliwa shihapu neenghono memanya laye,” Osho a ti ngaho.
“Itandi dulu okulifiya inali amenwa – kashi fi paife, kashi na efiku shi ningwe,” Osho a ti ngaho. Ovanhu otave mu ufana kutya oshilulu omanga vamwe tava ti ke li nawa, osho a ti ngaho.
“Itandi ehama momutwe ame nghi fi oshilulu. Ondi shi eshi handi ningi. Ame namumwamemekadona wange mushona otwa longifa oshimaliwa shihapu meemanya eli, ndee itandi kala ashike nda mwena omanga tali ningilwa ominyonena,” Ndakola osho a ti ngaho.
Okwa ti okwa udaneka okukala peendo opo fiyo e li ninga nawa.
Ndakola oha nangala mokatenda kashona pomunghulo weendo.
Okwa ti oha teleke oikulya yaye komundilo oufiku, ta tale nawa onhele oyo ya tulwa moluumbo.
“Ohandi fi ye po onhele i ngee nda mono oilongifo oyo ya pumbiwa okwaamena eendo lameme wange. Ohandi dulu okukala apa eedula omulongo ngee otashi pumbiwa.”
Ndakola, oo ha tungu paife, okwa ti okwa pumbwa eeshako hetatu deeshameende, eengonga nhatu deedalate dokutungifa nosho yo eedipo 300.
Okwa ti okwa lopota kopolifi kutya eendo lameme waye otali ningilwa ominyonena, ashike okwaanya okutula mo oshibofa shaashi “opolifi itai ka mona oshipambu osho sha vakwa ko”.
Okwa ti emanya lamumwaina womumati la li komaendo e lili mOshakati nalo ola vakwa po.
Nande oku na ehalo lokukala ponhele opo, Ndakola okwa ti kamusela Elias Shidinge okwa ti ovakwapata ova limbililwa neenghono kombinga youkolele wopamadilaadilo waNdakola.
“Otwa hala e ya keumbo, opo a twalwe konganga. Ina pumbwa okuninga ngaha. Inandi uda nale ovanhu hava nangala momaendo. Onda hala opolifi ye mu kufa omu,” Shidinge osho a ti ngaho.
Ndakola okwa ti mumwaina ota popi “iipolopolo” noi “na yandja nande osha” eshi kwa li ovanhu tava tula ko emanya.
Okwa ti ngee opolifi oye mu kufa mo momaendo, ove na okwaamena eendo olo.
Immirios Haludilo, oo e shi Ndakola oule wefimbo paife, okwa ti: “Ondi udite ko kutya okwa uda nai, ashike, tu vatela u ye keumbo.”
Omupopiliko wopolifi mOshana inspkta Thomas Aiyambo okwa ti opolifi kai na eshiivo kombinga yoshibofa shaNdakola.
“Ngee okwa patulula oshibofa, ngeno ohatu shi konakona. Paife shaashi i na patulula oshibofa, katu na eshi hatu dulu okuninga po,” Osho a ti ngaho.
Omupopiliko welelodoolopa laShakati Katrina Kamari okwa ti elelo lodoolopa kakwa li li na ouyelele womulumenhu ha di momaendo.
Omunawino moinima ya pamba omaupyakadi opamadilaadilo Lovisa Nghipandwa okwa ti onghalo yaNdakola otai u li ke oupyakadi wakilikita wokulila.
“Kashi fi lela oshinima hashi ningwa ngee oshipambu shemanya lokombila sha vakwa ko, shaashi ngeno omunhu ou okwa li a pumbwa okupopya novakwapata opo va unganeke kutya oshipambu osho sha dja ko otave shi shuna ko nomukalo ulipi, ashike opo a dilaadile kutya ota dulu okunangala momaendo opo aamene emanya lokombila kashi li nawa nandenande.
Omunhu ou okwa pumbwa evatelo lomeendelelo,” Osho a ti ngaho.
Okwa ti ovakwapata vaNdakola nava endelele ve mu twale komuxungimwenyo wopaunamiti kOshipangelo shaShakati, opo a dule okulonga naye moinima ya pamba oumaupyakadi opamadilaadilo, shaashi okwa pumbwa omakonakono opa madilaadilo.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
