Oministili oya londoda kuha tandavelekwe omauyelele ehe li mondjila kombinga yomahoololo

Oministili yomauyelele nomakwatafano opaungoba oya yandja elondodo koshiwana kombinga youpyakadi wokutandaveleka omauyelele ehe li mondjila eshi sha yuka pomahoololo.

Eshi kwa li ta popi noDesert Radio Omaandaxa, omupedu minista Modestus Amutse okwa ti okuyandja omauyelele ehe li mondjila otaku piyaaneke omilandu doushili doudemokoli notashi dulu okweeta oilanduli yakula.

Amutse okwa ti osha fimana okukala wa kotoka ngee to tambula nokuyandja omauyelele, unene ngaa okudja komalungula, oko haku kala unene ku yadi omauyelele ahapu taa pukifa.

“Otashi dulika eenghatu da mana mo di ka katukilwe ovanhu ava tava twikile nokupukifa oshiwana, shaashi kashi fi nande oshinima shi li mondjila okuninga. Otashi piyaaneke omilandu doudemokoli doshilongo,” Osho a ti ngaho.

Amutse okwa ti omanga oministili ihe na omafaneko natango okutula omilandu nomalandulafano dipe kombinga yokwaandjakaneka omauyelele, omikalo dipe dokuyandja omauyelele odo di li po otadi ka nghonopekwa opo ku kelelwe okwaandjakaneka omauyelele ehe li mondjila.

Eshi oshe ya konima omukanda wa li komalungula tau popi kutya Swapo okwa yandja elombwelo kokomisi yomahoololo yaNamibia opo i kale i na olwaamambinga momahoololo aNovemba.

Omukanda, wa nyolwa wa fa wa dja koSwapo nowa yuka kuHeidi Jacobs wokokomisi yomahoololo, owa udaneka oshimaliwa shi fike peemiliyona N$2 ngee okomisi oya ame koSwapo momahoololo.

“Ondi shi shi osho sha li komalungula ndee kashi li mondjila nandenande. Onghee nee, mutu omunhu umwe oo kwa li e li omutumba ile a fikama ponhele yonumba, a ninga etokolo lokupukifa oshiwana fiyo opondodo opo nosho yo okupiyaaneka omulandu womahoololo, osho shi li shihe fi shiwa,” Amutse osho a ti ngaho.

Amutse okwa kelela okwaandjakaneka omauyelele ehe li mondjila kombinga yomahoololo, unene ngaa oo taa ti okomisi yomahoololo oya pewa elombwelo lokupukifa nokudanena omilandu domahoololo.