Ongudu yoNational Unity Democratic Organisation (Nudo) otai ufanwa kutya ongudu youkwamuhoko konima eshi kwa li ya ninga omaudaneko omahoololo mexuliloshivike mOtjiherero.
Elelo loNudo, mwa kwatelwa hamushandjai Joseph Kauandenge, okwa li la popya novashikuli novayambididi vongudu kOtjinene mOtjiherero.
Kauandenge, nande ongaho, Omaandaxa, okwa ti opolohalama aishe kakwa li i li mOtjiherero.
“Mutu ovapopi vamwe okwa li ashike va popya mOtjiherero, ashike ame ongomupopi akula, onda longifa Otjiherero nOshiingilisha,” Osho a ti ngaho.
Okwa pula kutya oshike eengudu dopolitika hadi popi elaka lopambelwa novalanduli vado, omanga vamwe vehe udite ko.
“Oshike u na okuninga ngaho? Kandi shi udite ko. Mutu opo u fuule lyee, ovapwilikini, ohava di po ashike inava uda etumwalaka loye,” Kauandenge osho a ti ngaho.
Omundjadjukununi woikwa politika Rui Tyitende okwa ti Nudo oshinima shopamufyuululwakalo ndee kashi fi ongudu yopolitika.
“Etameko longudu oli li kumwe noinima yopamufyuululwakalo yOvaherero, ndee ongudu otai monika ashike ya fa ihe na ehalo lokulundulukila kongudu youdemokoli,” Osho a ti ngaho.
Tyitende okwa ti kapu na oshinima sha puka ngee eengudu dopolitika tadi popi novanhu vado melaka olo tali udika ko nawa kuvahapu vomovapwilikini.
“Pamhito ei, Nudo ke na ohokwe yokukala ongudu yopolitika oyo ya kuma omihoko adishe, ngaashi ashike ihe na ehalo lelelo lopashiwana,” Osho a ti ngaho.
Tyitende okwa ti ongudu natango otai kala ashike ya tala keenhele dimwe odo di na ovanhu hava popi Otjiherero moNamibia.
Omundjadjukununi woikwapolitika Ben Mulongeni okwa ti oshinima eshi otashi ulike oshikumungu shakula moshilongo.
“Ovanhu kave na fiku va dje mo mekutu. Kave na nomaliudo oshiwana, inava hala,” Osho a ti ngaho
Mulongeni okwa ti omikandaudaneko nadi kale dOvanamibia aveshe, ashike eengudu dimwe odi hadi oukwamuhoko.
“Okupopya nelipakemo melaka ledalelwa mo kashi wa nandenande inashi yuka noho, shaashi owa hala okuulika kutya oto popi ashike novanhu voye,” Osho a ti ngaho.
OSHO SHA UDANEKWA
Nudo, okwa ti ngee okwa hoololwa a ye koshipundi, ota ka wedela oishoshela yeengeshefa opo a dule okupitifa omutengenekwafaneko woshimaliwa shi fike peebiliyona N$80 momudo 2026.
Omutengenekwafaneko waNamibia waxuuninwa ou li peebiliyona N$101.
“Otwa hala okutota eemhito doilonga di dulife po200 000 pefimbo lokutula oinima yetu moilonga neeproyeka detu ngaashi da popiwa momukandaudaneko wetu,” Omukanda osho wa nyolwa ngaho.
Ongudu natango otai tale kokushunifa pedu oIshoshela moikondo ikwao neepelesenda 40.
Nudo natango okwa hala okuningulula oshikondo shehongo, mwa kwatelwa nokuninga ondodo 12 tai dengele natango opo omunhu a dule okuya koiputudilo yopombada.
Kombinga youndjolowele, ongudu oya faneka okutunga oipangelo ihapu oko omunhu ha dulu okutuminwa opo i kulile mo oshipangelo shaKatutura.
“Okuyandja eenghono koministili youndjolowele nomayakulo opanghalafano mokulanda omiti noipumbiwa opo kuxwepopalekwe onghalo yoipangelo yokukula ihe na omiti,” Eudaneko limwe osho tali ti ngaho.
Mulongeni okwa ti omukandaudaneko woNudo kau na eshi tau popi shipe.
“Ola fa ashike edilaadilo lopaudemokoli lopanghalafano,” Osho a ti ngaho.
Okwa ti omulandu woNudo womaxupilo nonghalafano inau yooloka kwaao woSwapo.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
