Oulingilingi otau dulu okuya moshipala oproyeka yogreen hydrogen

Omukulunhuwiliki wehangano ledina Hyphen Hydrogen Energy, Marco Raffinetti okwa ti, keshe oshinima sha nyika oulingilingi moshikondo shoshimoko shokuyandja eenghono osho tashi ya otashi dulu okukelela eeproyeka diha ye komesho.

Raffinetti okwa ti eudafano lehangano lavo nepangelo ola kwatela mo omilandu adishe odo di li ominge noulingilingi.
“Meudafano letu nepangelo itamu popilwa nande oulingilingi,” Osho a ti ngaho.

Raffinetti eshi okwe shi popya pefimbo lolweendo loikundaneki koTsau //Khaeb National Park, oko ehangano loHyphen la faneka li ninge oproyeka yogreen hydrogen yongushu yeebiliyona dihapu.

Omapopyo aye aa okwe ya konima ovandjadjukununi ve na omalipulo kombinga yelongo lopauyelele moshikondo shaNamibia shogreen hydrogen. Ovanandjungu nomahangano opashiwana okwa kala nokuholola omalimbililo kombinga yoinima ya nyika oulingilingi.

“Ohatu kanifa oproyeka yetu aishe ngee opu na oulingilingi – kombinga yetu ile kombinga yepangelo.

Kandi shi kutya nandi shi yeleke ngahelipi osho,” Raffinetti osho a ti ngaho.

Omukulunhuwiliki wehangano lokuninga omakonakono omilandu depangelo ledina Institute for Public Policy Research (IPPR) Graham Hopwood okwa li a kunghilila kombinga yokukonakona oproyeka ei pakutala kondjokonona yaNamibia koshikumungu shoFishrot nombaanga yoSME eshi ya pata oya ulika kutya opu na omukalo wokuhena ko na sha fiyo oinima ya naipala.

“Kapu na nande omumbwe yokwiitavela kutya oproyeka yogreen hydrogen kai na oupyakadi,” Osho a ti ngaho.

Hopwood okwa ti oproyeka yogreen hydrogen yaNamibia oya taalela paife ngaha omaupyakadi ahapu, mwa kwatelwa okuhalonga pouyelele, oinima ya holama kombinga yoshimaliwa nedu, oshiwana inashi ningilwa omapulaapulo awana nosho yo omalipulo kombinga yomahangano novanhu ovo tava ka kwatela komesho eeproyeka edi.