Ovapolifi, ovakwaita nOvanamibia ovo ve li kondje yoshilongo otava hoolola nena

Ovanailonga vokuyandja omayakulo ve li lwopo8 000 nosho yo Ovanamibia ovo ve li kondje yoshilongo otava hoolola nena, okomisi yomahoololo yaNamibia yedina Electoral Comission of Namibia (ECN) osho ya ti ngaho.

Eshi kwa li ta yandje ouyelel koikundaneki Omaandaxa, omunashipundi wokomisi yomahoololo Elsie Nghikembua okwa ti oinima aishe oi li peenhele opo omahoololo aa taa ningwa diva a ye komesho.

Ovahoololi ava ovakwatela mo ovanambelewa vopolifi novakwaita, nosho yo ovanhu ovo hava i mefuta novahoololi ovo ve li kondje yoshilongo.

Otava ka hoololela peenhele dokuhoololela di li 33 moshilongo nosho yo peembelewa doshilongo adishe di li 35 kondje yoshilongo.

“Otashi dulika pu ka kale pu na omalunduko ashona komwaalu ou, shaashi Ovanamibia ovo ve linyolifa omahoololo moshilongo ndee tave lihange ve li kondje yoshilongo mefiku lomahoololo owina otava ka pitikwa okuhoololo, shama ashike kutya ovakwashiwana natango otava ka kala ve li kondje yoshilongo nonghee nee, itava ka dula okuhoolola moshilongo momafiku 27 Novemba,” Osho a ti ngaho.

“She likolelela kouyelele ou wa yandjwa koshikondo sheameno nosho yo komahangano okukwata eeshi, ovahoololi va tengenekwa ve li lwopo8 000 ova teelelika va ka hoolole momafiku 13 Novemba,” Nghikembua osho a ti ngaho.

Okwa ti omwaalu wovanhu va halanga okuhoolola ve li 2 159 ikwa li we lishangifa keembelewa doshilongo odo di li koilongo ilili.

Okomisi yomahoololo oya tula po eenhele dokuhoololela di li 307 di na sha noshinima eshi.

“. . . di li 231 moshilongo no76 pondje yoshilongo noya tula ko oimbumbiwa yomahoololo opo I dule okulongifwa pefimbo lokuhoolola nokuvalula momafiku 13 Novemba,” Nghikembua osho a ti ngaho.

Ovahoololi otava ka mona oidjemo yomahoololo aa konima yomavalulo peenhele dokuhoololela opo va hoololela.

“Omunambelewa akula keshe poshitaashi shomahoololo ota ya denge ofooloma yoidjemo yomahoololo, oyo i na okushainwa komukalelipo vomavalulo ndee ta shiivifa nokutulika oidjemo yomahoololo poshitaashi shomahoololo ngaashi okatendo komahoololo taka pula,” Omunashipundi osho a ti ngaho.

Oidjemo aishe yomahoololo aa onomenawina otai tulwa nawa pamwe noilongifo yomahoololo ya longifwa fiyo efiku lomahoololo.

Itapa kala pu na ovakonakoni, Nghikembua osho a ti ngaho.

“Inatu mona nande eindilo lefiku eli, otwa mona ashike lomafiku 27 Novemba,” Osho a ti ngaho.

Omukulunhuwiliki woilonga wokomisi yomahoololo Zania Klazen Omaandaxa okwa ti eembapila domahoololo di li lwopo8 800 ode likalekelwa noda tumwa keenhele dokuhoololela kondje yoshilongo nomoNamibia.

Omukulunhu womahoololo Peter Shaama okwa ti ovanambelewa ovo ve li peenhele dokuhoololela otava ka longela kumwe novanambelewa voministili yomakwatafano nelongelokumwe lopaiwana.

Omulandu aushe otau kwatelwa komesho komunambelewa a dja koministili yomakwatafano nelongelokumwe lopaiwana, osho a ti ngaho.

“Natango vali, oveta otai pula opo eembelewa adishe doshilongo odo di li kondje di unganekwe komunambelewa umwe, nomunambelewa oo naye okwa dja koministili yomakwatafano nelongelokumwe lopaiwana noku li mombelewa yetu om opo a unganeke oinyangadalwa oyo tai ningwa keembelewadoshilongo adishe di li 35 kondje yoshilongo,” Shaama osho a ti ngaho.

EEKOPI DOUKALATA

Ovahoololi ve lishangifa ovo va kanifa oukalata vavo ile oukalata vav ova teka otava dulu okumona eekopi doukalata vavo moshilongo okudja moshivike tashi ya.

“Okomisi yomahoololo otai ka yandja oukalata veekopi okudja momafiku 18 fiyo 26 Novemba.

“Eindilo lokopi yokakalata komahoololo oya pumbwa omukandaano okudja kopolifi tau popi kutya omolwashike to ningile endilo lokopi yokakalata, nosho yo oukwatya womuhoololi,” Nghikembua osho a ti ngaho.

Otava ka pewa ovo ve lishangifa omahoololo oneudo.

Okomisi yomahoololo ohai yandje ashike eekopi kovanhu ovo ve li moNamibia, omanga ovo ve di hala kondje yoshilongo itave di mono.

Nghikembua okwa ti okomisi yomahoololo otai twikile nokutopola eembapila domahoololo noilongifo ikwao mokulilongekidila omafiku 27 Novemba.