Elelo lodoolopa yaVenduka onghee ngaa tali twikile nokuteta ko olusheno molweengunga domeva nolusheno

. . . tali kondjifa elombwelo lehangano lokuwilika olusheno momhangu

Omunandjungu moinima ya pamba omaxupilo nouyuki wopanghalafano Nafimane Hamukoshi okwa ti okwa limbililwa kombinga yelelodoolopa laVenduka eshi tali kondjifa elombwelo olo li li ominge nokuteta ko olusheno.

Paife ngaha, elelodoolopa laVenduka nehangano lokuwilika olusheno ledina Electricity Control Board (ECB) ove li momhangu kombinga yelombwelo la pewa muni a xulife po okuteta ko olusheno molweengunga domayakulo amuni.

Tali patana kombinga yelombwelo loECB olo kwa li la yandjwa muJuni, elolodoolopa ola dama kutya omukalo wokuteta ko oukefa nokuxulifa po okuyandja olusheno ou li mukalo wavo wokwoongela eengunga uwa okudja kovakalimo ovo inava hala okufuta omayakulo amuni.

Hamukoshi Omaandaxa okwa ti ehangano lokuwilika olusheno eshi itali dulu okunghonopaleka etokolo lalo olo li li ominge nomalelo eedoolopa taa tete ko olusheno molwomayakulo amuni oo inaa futwa otashi limbililike neenghono.

“Otashiu like omwaka wakula pokati kokukalela po oinima noufemba wovalongifi volusheno, unene ngaa oshiwana osho sha mona oixuna she lineekela momayaku aa. Elombwelo loECB, olo tali lalakanene okwaamena ovakwashiwana opo vaha nanwe oshimaliwa sha pitilila sheengunga dihe li pauyuki, otali ulike eudeko lomumbwe yomayakulo a pumbiwa ngaashi olusheno,” Hamukoshi osho a ti ngaho.

Okwa ti kutya etokolo lelelodoolopa lokukondjifa elombwelo eli momhangu itali piyaaneke ashike ouyuki ashike natango otali ulike kutya inali fimaneka oveta yoECB nola tula ovakalimo moupyakadi wokukala vehe na olusheno.

Omunandjungu wopanghalafano Shaun Gariseb okwa ti eekamusela domOvenduka odo da hoolola kovanhu paife ode va pilukila po.

“Puhe na ohoni, elelo lodoolopa yaVenduka ola twa la ehnagno lokuwilika olusheno komhangu, ova hala ehangano li ningulule elombwelo lalo ndee tali pe elelodoolopa epitikilo li twikile nokuteta ko olusheno shihe li paveta; ookamusela ovo twa hoolola kave na nafye.”

Natngo okwa ti vali elelodoolopa laVenduka otali lwifa ovakalimo valo.

“Ehangano lokuwilika olusheno itali tu lwifa; elelodoolopa laVenduka olo tali tu lwifa atushe, lilongekidileni onghatu ya pumbiwa moshivike tashi ya,” Gariseb osho a ti ngaho.

Gariseb okwa ti otava ka ninga oshoongalele noikundaneki kombinga yoshikumungu eshi momafiku 21 Novemba.

Elelodoolopa olaanya okutya ko sha koshinima eshi shaashi oshibofa oshi li natango momhangu.