Ongudu yoChristian Democratic Voice (CDV) oya tula pedu pelesidente Gotthard Kandume eshi vati a nana oshimaliwa shi fike poN$180 000 kombaanga yongudu.
Hamamushandjai wongudu Hans Stramiss okwa ti ongudu oya patululila Kandume oshibofa shekengelelo Etine loshivike sha dja ko.
“Otwe mu patululila oshibofa shekengelelo nopolifi yaNamibia shaashi okwa nana oshimaliwa shongudu ina landula omilandu domondjila.
Tete okwa nana ko oshimaliwa shi fike poN$80 000 ndee ta nane vali oN$100 000, oyo i li oimaliwa yovafuti voishoshelayepangelo,” Osho a ti ngaho.
Stramiss okwa ti ombaanga nai kalele po oshinima eshi.
“Ombaanga oye tu dopeka. Omuleli wongudu ita dulu okuninga ngaho.
Otashi shololifa ongudu,” Osho a ti ngaho.
Ongudu yoCDV okwa li i li moikundaneki petameko lodula ei konima yokomisi yomahoololo yaNamibia kwa li ya kufa mo ongudu ei meengudu dopolitika, pamwe naayo yoNamibia Economic Freedom Fighters (NEFF) momafiku 13 Juni.
Oshinima eshi okwa li sha ningwa konima eengudu adishe da dopa okuyandja omikanda domavalulo oshimaliwa kokomisi yomahoololo ngaashi okatendo komahoololo taka pula.
“Ei ongudu yOvakriste, ndee okuninga oinima i li ngaho itashi yandje efano liwa, sho osho kwa li twa kufwa mo meengudu dopolitika. Otwe mu tula pedu, noku na okuya koihokolola,” Stramiss osho a ti ngaho.
‘OMUKALO WAPUKA OKULONGIFA OSHIMALIWA SHONGUDU
Omupedu pelesidente wongudu Viola Geirises momukanda oo a nyolela kuKandume okwa ti okwa tulwa pedu molwokulongifa oimaliwa yongudu papuko.
“Otwa mona kutya otashi dulika pu na okulongifa oimaliwa yongudu shihe li paveta nopamukalo muwa koshi yelelo loye,” Osho a shanga ngaho.
Ehangano ledina National Excutive Council (NEC) nalo ola mona vali kutya opu na omalimbililo kombinga yokulongifa oshimaliwa papuko, unene ngaa kombinga yokutumina nokulongifa oshimaliwa moinima inai pamba ongudu.
“Oshinima eshi shokulongifa oimaliwa papuko oshinima shapuka nai tashi ningwa komuleli wongudu e li mongudu yoChristian Democratic Voice.
“Eshi osha nuninwa okukulombwela kutya owa tulwa pedu okudja ponghatu yoye youpelesidente wongudu yoCDV meendelelo ngaashi tashi dulika, fiyo omakonakono taa pu,” Geirises osho a shanga ngaho.
Okwa ti Kandume ita ka kwatelwa mo vali moilonga yokuungaunga noshimaliwa mongudu.
“Ito ka yandja omhito yokuya momikanda doshimaliwa dongudu ile meenghundafana di na sha noshimaliwa ngaashi tashi pulwa kokomitiye yokuninga omakonakono.
“Likaleka kokule nokuyandja ouyelele moshiwana ponhele yongudu manga ino pewa oufemba wokushininga kokomitiye yovawiliki yopashiwana.
“Didilika kutya ngee owa dopa okuliufa komalombwelo aa ile onghendabala keshe tai lidopo momakonakono otashi dulika shi ete vali ehandukilo limwe, mwa kwatelwa nokutewaatewa mo mongudu.
“Otwe lineekela kutya oto ke liufa komalombwelo nawa moshinima eshi opo u yandje omhito i li nawa yokuninga etokolo lopauyuki,” Osho a shanga ngaho.
OKWA FUFYA OMBAANGA
Ekotamhango longudu inali pitika pelesidente wayo a ungaungaunge noimaliwa meyukililo.
Kandume, nande ongaho, vati okwa fundja ombaanga, ta ti kutya ovanhu ovo ve na okushainina oinima yombaanga yongudu ka ve shi vali oilyo yongudu, noye ashike kwa li ta dulu okuninga oinima aishe ya pamba oshimaliwa shongudu,” Stramiss osho a ti ngaho.
Odjo imwe yongudu oya ti Kandume okwa kala ta ningi oinima yaye mongudu oye auke.
“Osha hala kutya oshinima ashike shomunhu umwe ngee pelesidente ota dulu okunana oimaliwa puhe na vali nande omunhu umwe e shi shi,” Odjo osho ya ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
