Megameno Shikongo, omonakadona waumwe womwaavo va kanifa oilonga yavo yomomeva, okwa li a fininikwa opo a dje mo mofikola kodula yaye onhivali koshiputudilo shopombada shedina University of Namiba konima eshi xe a kanifa oilonga yaye medina loFishrot.
Shikongo, oo kwa li te lihongo oinima ya pamba omavalulo noimaliwa, okwa fiya po ofikola momudo 2020 eshi kwa li xe ita dulu vali okufuta elihongo laye noha di komukunda paife kOmutele moshitopolwahoololo shaShikoto novadali vaye.
Okwa lombwela ehangano lokuninga omakonakono omilandu depangelo ledina Institute for Public Policy Research (IPPR) kutya okwa li a hala okumana elihongo laye opo a vatele xe oo oye ashike e kwete eumbo, nosho yo ovakwapata vamwe ve lili.
“Onghalo keumbo oya nyika oshiponga nai. Ohatu xupu ashike moikulya oyo hatu mono kepangelo. Tate okwa landifa po nokuli oimuna yaye opo a dule okuyambidida ofamili,” Osho a ti ngaho.
Ehokololo eli olimwe ashike lomomahokololo oo e li momakonakono ativali ehangano lokuninga omakonakono omilandu depangelo kombinga youfemba womunhu, ‘Paife ngaha itandi xupu’, osho tashi ulike kutya oulingilingi woFishrot owa kuma nai eenghalamwenyo dovanailonga vomomeva ve li 600.
Olopota oya ti, eepelesenda 89 dovalongi vomomeva vakulu odi shi ovanhu ovo va tanaukila ashike momalodu opo va dimbwe oshinima eshi shokukanifa oilonga, omanga eepelsenda 68 dovanailonga vakulu vomomeva da ti oda tanaukila mokulongifa omalodu sha pitilila okudja ashike eshi da kanifa oilonga yado molwoFishrot.
“Oshinima eshi shoFishrot ashishe oshidjuu okudilaadila. Ovanhu ava ove tu dipaya, ova dipaya omaxupilo etu, ova dipaya ovakwapata nounona vetu. Okwa li hatu vatele ovanhu vahapu, okutameka ngaa nounona vetu fiyo ovakwapata aveshe, ovo kwa li va tala mushe opo va xupe.
Ashike paife ova teyaula po eenghalamwenyo detu neenghono,” Omunailonga womomeva muku osho a ti ngaho.
Natango, eepelesenda 54 dovanailonga vomomeva vakulu oda ti oda topoka noda kanifa ekwatafano novakwapata vado okudja ashike eshi da kanifa oilonga, omanga eepelesenda di li lwopo36 da ti oda topoka novaholike vavo nounona vavo konima eshi da kanifa oilonga.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
