Omuwambo oha popi tati; omutumba efete, eengeda okeyelu ku liwa, yo oilonga ihai li mwene. Ye ha tumbula yo vali ta ti; omundilo wongula oponhele yoye ho yokele.
Ovahongwahongi otwa shiiveni tuu oinakuwanifwa yetu kondadalunde, pauhandimwe onga ovahongwahongi tave lideulile oshilonga shokonakwiiwa yokomesho? Otwa konekeni tuu kutya onga ovahongwahongi otu na okulwa hatu tula ombuda moshixwa, opo tu ka fike kefikilo, tu hange eendjodifaneko detu? Mokulideula nomokulihonga kwetu, otwa konekeni tuu kutya komukumo nokoudiinini wetu oko taku ke tu ufanifa
eifano louhongi? Na opo u kale omuhongi dingi, otu shi shii tu kutya ohashi di kelitule
mo, kondjungu, nokoudiinini womuhongi?
Omunhu ngeenge ta lalakanene sha monghalamwenyo, ohe litula mo, ta longo noudiinini opo ashike a ka likole sha shiwa kefiku laxuuninwa. Ouhongelwe oshinima shimwe osho hashi pumbwa eenghono osho yo eendunge domunhu ye mwene nelitule mo laye.
Ovahongwahongi natu kufei ko eenghaku keemhadi detu, natu djaleni onyati yokulihonga twa mana mo, noudiinini ndele hanokahetenge.
Onga omuhongwahongi, ninga omapekaapeko kwoove mwene, longa noudiinini u konge ouyelele muhapu u na sha naasho to lihongele, nokuli u liwedele ko yo kowino yoye. Otwe liningeni unene vokupewa kokanya, ndele hatu taafininwa, shetu okupona ashike.
Paushili wovene eshi itashi tu ningi ovanhu ovanandjungu novadiinini mokukalamwenyo kwetu. Ohatu ka longa ounona vovanhu ngahelipi ngeenge itatu lihongo okudilaadila moule mangha tu li hatu pyokolwa? Oshiwana shovanhu osho twa twaaleleni!
Otwe lininga unene twokuningilwa keshe shimwe.
Omuvalu muhapu wovahongwahongi inava hala nande nande okulinyenga, ndele tava longo kuvovene, ove li ashike tava pula ovahongi oinyangadalwa oyo tava pewa meetundi davo moiputudilo yavo omo, tava pula komapandja oo a totwa po okuhangana mokulihonga.
Hano vahapu ihava i vali va ka konge ouyelele penya naapenya, okulesha oinyanyangidwa youyelele ngaashi omambo ombalu nee nodule.
Oinima imwe hatu pula komapandja okulihonga, unene tuu oinima ya pamba omufyuululwakalo, oinima oyo ipu neenghono, hatu dulu okupekaapeka kufye vene, ndele ohatu pula ashike ovahongi tu pewe omanyamukulo.
Oudjuu oufike peni mbela, okukwatafana noomeekulu nootatekulu ndele hatu va pula naanaa ombaxu nokavava kombinga yoikwamufyuululwakalo? Onaini to shiiva, ngeenge owe liningi ashike u hole okupewa kokanya? Tu li mounyuni uwa, ounyuni womakwatafano mapu noombiliha! Omunhu to dulu okudengela meekulu ile tatekulu e li kOkongo u li kOlyavahenge, ndele tamu kundafana ashike nawa nawa sho osha pwa osho.
Oudjuu nounyengwi mbela openi vakwee? Omunhu ha to ningi nee ngaha; iho kongo nee ouyelele woye nawa nawa, ove oto u tula pombapila osho, pamukalo oo wa ufwa, ove ha to mono sha fa sha endama osho, ha to uya nee to ti; (okuyandja oshiholelwa), vakwetu vananghali, hano omalalakano epekaapeko/omapulo epekaapeko osho ngaho ndi na oku a eta po ngaha? Ile, ohandi a eta po tuu ngahelipi? Vo ovanawino ha ta va imo nee, ndele tave ku pukulula.
Nena pamukalo oo ou shi tuu kutya owa likola? Shaashi: owa mona ouyelele, wa henena nokuli, wa weda ko keshiivo loye, wa yambapaleka elaka loye eshi wa uda ouyelele aushe oo mokupekaapeka kwoye.
Ove owa likola yo owino wokuninga oshinima shonhumba mondjila nomeyukililo, noku dja opo oto kala u shi shii kutya; Hol: omapekaapeko ohaa shangwa ngahelipi pauhongelwe, shaashi owa pukululwa kovanawino nghene hashi ningwa.
Heeno, okupula haulai shili, ashike ou halikola shihapu sho oshongushu kamana, oyou ha kondjo. Ouwa ihau di pokapala kayela, oo omaadi ihaa lilwa peke lamukweni, onghe natu longeni twe litula mo mokulihonga kwetu.
Opo ashike hatu ka ninga ovaleli dingi, ovahongielela mokati koiwana.
Shi djuu iha nyenge mwene nande nande, onghee etwomukumo ole li kutya; natu longeni/lihongeni noudiinini mu keshe shimwe tashi tu dile ouwa womeenghalamwenyo detu komesho, pehe na okulikolelela munhumba ile ngadi, osheshi fiku limwe oongadi noonhumba onava ka mane ko oikako yavo ndele hatu fyaala po hautuka, tuhe na eshi twa likola, ndele hatu lokwa nee nomongwa osho
inatu mona nale.
Ame inandi tya oukongo wohamba nau aluke, oshike ohai ti ashike ofuka ngeenge tai pi inai longwinga, i fyaale omwiidi wokuhondama ovakongo.
(Rosalia M Ngeno, oku li omuhongwahongi moshiputudilohongo shopopada shaIUM mOngwediva. Ote lihongele omalaka: Oshiingilisa nOshikwanyama. Ota monika koemaila: ngenorosalia@gmail.com)
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
