Mathe okwa dopa okupopya kutya omolwashike omutengenekwafaneko woNew Era, Nampa wa wedelwa

Omukulunhuwiliki womauyelele nomakwatafano opaungoba Audrin Mathe okwa dopa okufatulula kutya omolwashike epangelo la wedela oshimaliwa osho hashi i komahangano alo oikundaneki neemiliyona dihapu.

Omutengenekwafaneko woNew Era Publications Corporation (NEPC) nosho yo woNamibia Press Agency (Nampa) owa wedelwa okudja peemiliyona N$25 adishe kumwe okuya peemiliyona N$30.

“Tala kouyelele womutengenekwafaneko oo wa dja kuminista. Ohatu ka kundafana kominga yehengumukilo mumwe pefimbo lawapala,” Mathe osho a lombwela oThe Namibian Etine ngaho.

Mathe, omukulunhuwiliki woNew Era mukulu oo a kala nokuungaunga noinima yakula koshifokundaneki shepangelo, okwaanya okuyandja ouyelele kombinga yehengumukilo mumwe loNew Era noNampa.

Ouyelele womutengenekwafaneko oo wa dja kuminista womauyelele nomakwatafano opaungoba Emma Theofelus petameko lodula ei, omutengenekwafaneko woNew Era otau ka longifwa “mokutwikila okwaandjakaneka ouyelele wa fimana okupitila moshifokundaneki shefiku keshe, New Era, tau lopota kombinga yoinima yepangelo noshiwana”.

Eenghundana kombinga yomutengenekwafaneko ode ya pefimbo lomalipulo kombinga yepangelo tali faneke okukala li na omukalo waZimbabwe woikundaneki wokwaandjakaneka omahokololo ongaho epangelo.

Omalimbililo elifa natango okwa li a holoka konima eshi omukulunhu woshikondo shomayakulo opangeshefa oNampa Confidence Musariri kwa li ashike a tofwa mo ongomukulunhuwiliki woNew Era.

Epangelo ola dopa okuyandja ouyelele koshiwana kombinga yokutula omahangano aa mumwe, mokati keelopota kutya oshinima eshi otashi talika nawa manga kuminista woshimaliwa Iipumbu Shiimi.

Olopota yepangelo ye livakelwa oya holola efaneko lokutota ‘ehangano loikundaneki lakula’.

Ashike nee oshinima eshi otashi dulika shi pule ovafuti voishoshela yepangelo eemiliyona molwovakulunhuwiliki ovo hava futwa oimaliwa ihapu nosho yo ovanambelewa vepangelo.