Oproyeka yoDâures Green Hydrogen otai pula evatelo natango konima ya longifa eemiliyona N$232

. . . Epangelo laGerman otali pula omanyamukulo nola hala oxulifa po okuyandja oshimaliwa

Oproyeka yaNamibia yoDâures Green Hydrogen otai pula epangelo laGerman oshimaliwa shimwe natango konima ya longifa oshimaliwa shi fike peemiliyona N$232 opo i tunge po onhele yoproyeka yogreen hydrogen yoshilongo.

Paife epangelo laGerman vati otali dilaadila li xulife po eyambidido lalo lopashimaliwa loproyeka ei, osho tashi i fininike opo i konge oshimaliwa kepangelo laNambia.

Ongudu yomahangano oyo tai ungaunga noDaures Green Hydrogen oi kwetelwe komesho kehangano ledina Enersense Energy Namibia, olo li na mo eepelesenda doipambuliko di li 90.

Omahangano aa okwa hala okutunga onhele yoshimoko shokuyandja eenghono yotete muAfrica, oyo ya talika ko kutya otai ka kala odjo yakula yokuyandja oshimoko shokuyandja eenghono koshiwana.

Oproyeka ei okwa li ya fanekwa i tameke tai longo oshimoko shokuyandja eenghono shishona nosho yo oushosho wopashinanena woammonia, omanga inai ninga ongeshefa yakula yoshilongo noyo kutuma oinima kondje.

Fiyo opapa, ehangano ola longifa oshimaliwa shi fike peemiliyona N$232. Petameko, omahangano aa okwa li taa lalakanene okulonga omatama, ounakamudesha, ammonia nosho yo oshimoko shokuyandje eenghono muMarsa odula ei.

Eshi omafiku a pita, okwa li vali pa tulwa omafiku amwe, kutya ngeno muSeptemba oproyeka otai ka kala ya tameka okulonga oinima oyo.

Ashike nee, muNovemba 2024, oproyeka natango inai pwa, kapu na osho tashi ulike kutya otai i komesho.

Omahangano paife otaa kongo oshimaliwa shimwe sha wedwa po opo a twikile, ashike naku va vatela oshimaliwa wavo akula, epangelo laGerman, otali pula tete omanyamukulo kutya oshimaliwa shotete osho kwa li va pewa sheemiliyona di li N$232 osha longifwa ngahelipi.

Shimwe vali, eemiliyona di li N$12 okwa li kwa kolekwa kutya inadi wana opo omahangano a dule okumana ondodo yotete yopropyeka, oyo i li mombuwa yeendudu i li moshikandjohoololo shaDaures, eekilometa 140 okudja moHenties Bay.

The Namibian oku udite kutya omahangano okwa shangela koministili yehongono nomapekapeko yaGermany (BMBF) eemwedi nhatu da pita, taa pula eemilyona N$3.1 da wedwa po opo a dule okutwikila noproyeka.

Omahangano aa aeshe noministili yehongo nomapekapeko yaGermany ova koleka oshinima eshi omwedi ou.

“Oministili yehongo nomapekapeko yaGermany oya lombwelwa kutya oshimaliwa sha wedwa po otashi ka pumbiwa opo kumanifwe ondodo yotete yoproyeka. Oshipambu shimwe shoshimaliwa osho tashi pulwa sha wedwa po osha longifwa po nale,” Omupopiliko woministili yehongo nomapekapeko yaGermany Bettina Bohm osho a lombwela oThe Namibian ngaho oshivike sha dja ko.

Oministili yehongo nomapekapeko yaGermany paife oya hala ouyelele we lixwa po nghee eemiliyona di li N$232 kwa li da longifwa.

“Oministili yehongo nomapekapeko yaGermany oya pula oproyeka yoDaures Green Hydrogen opo i yandje ouyele kombinga yondodo yotete eshi ya manifwa, oyo ya kwatela mo omwaalu wa tengenekwa woshimaliwa, wa tukulwa nawa peendado,” Bohm osho a ti ngaho.

TAVA PULA SHIHAPU NATANGO

BMBF paife vati okwa hala okuxulifa po eyambidido laye loproyeka ei, onghalo oyo tashi dulika i fininike omahangano aa opo a ye a ka konge oshimaliwa kepangelo laNamibia.

Ngee osha piti, oshinima eshi otashi dulika shi ka kondjifafane nomapopyo omukalelipo wogreen hydrogen James Mnyupe, oo kwa li a popya kutya oimaliwa yoshiwana itai ka yandjwa nande keeproyeka di li ngaha.

“BMBF okwa pula nee oproyeka yoDaures Green Hydrogen Village opo i yandje omusholondodo wovanhu ile epangelo ovo tava dulu okwiiyambidida noshimaliwa notave li tula mo kulongifa oshimaliwa moproyeka omu opo i dule okuya komesho nawa konima yondodo yotete,” Bohm osho a ti ngaho.

Shimwe vali, oBMBF oya pula omukandafaneko wongeshefa oo tau ulike kutya oshimaliwa otashi ka longwa ngahelipi paumwene konima kwamanifwa ondodo yotete opo ku fitikwe omwaka ou fiyo ovayambididi voshimaliwa otave ya nawa moule weedula nhatu fiyo nhano.

Bohm okwa ti eeproyeka dokukonga ouyelele da longifa oshimaliwa shepangelo laGerman odi na oshinakuwanifa shokuyandja ouyelele u li mombapila keshe efimbo kutya oproyeka otai ende nokuya komesho ngahelipi.

“Ohatu ka popya ashike kutya otwa fikama peni kombinga yoshikumungu eshi ngee eenghundafana odo de ya pexulilo, ashike otu wete kutya mutu ohatu ka ninga etokolo li na omauwa keembinga adishe,” Osho a ti ngaho.