Itavela kutya oko wa li koSwapo – Melber ta lombwele Itula

Omundjadjukununi woikwapolitika Henning Melber okwa ti omapopyo omuwiliki wongudu yoIndependent Patriots for Change Panduleni Itula kutya ka li nande e na okakalata koukwashilyo woSwapo ‘etameko loupyakadi wokudimbwa’.

Itula okwa lombwela ehangano loikundaneki laSouth Africa ledina South African Broadcasting Corporation (SABC) Omaandaxa kutya ka li nande efiku limwe a li oshilyo shoSwapo eshi sho paife, osho a lundila kutya otashi dopa okuungaunga noikumungu youlingilingi.

Itula okwa ti oSwapo paife oya nyanauka koulingilingi.

Melber okwa ti, okulikala kwaItula kaku shi koshili.

“Okwiikala kwaItula, oko pakutala koumbangi kuhe li mondjila, otaku holola oudu wokudimbwa. Nande opefimbo a li mwa ti nee omuulikwa pelesidente e lifikamena po yeemwene momudo 2019, okwa li a u dika ta ti ota hoolola oSwapo momahoololo omutumba wopashiwana,” Melber osho a ti ngaho.

“Okwa li a pandula Peter Katjavivi naShapwa Kaukungwa eshi va kala nokumupa omayelele kombada,” Osho a ti ngaho. Melber okwa ti omapopyo aItula kutya ka li oshilyo shoSwapo konima yemangulu kee shi oshili, ngaashi oumbangi tau holola.

“Konima eshi a aluka okudja koUnited Kingdom, okwa li a dana onghandangala yakula mopolitika yomeni longudu.

Okudimbwa taku fifa ohoni notaku mu ningi a kale ehe na eenghono. Okwa kanifa oukwashili eshi ina hala okwiitavela kutya okwa kala mongudu fiyo osheshi kwa li a tewaatewa mo momudo 2020.

Omunhu ote lineekele omunhu e li ngaho ngahelipi ongomuleli, eshi ehe na oushili nande washa a kalele po ondjokonona yaye?” Melber osho a ti ngaho. “MuMarsa 2022, ova ta nge mo mongudu yoSwapo, ashike kakwa li nande efiku limwe ndi na okakalata koukwashilyo koSwapo.

Kakwa li ndi na mo oilonga yasha mepangelo loSwapo ndi tameke ashike naashi,” Itula osho a lombwela omunyanyangidi woSABC woinima yopaiwa Sophie Mokoena. Itula okwa ti Swapo ou a mangulula Namibia ina fa Swapo ou ta lele Namibia paife.

“Ovakanifa elalakano. Momudo 2019, opo nda tokola ndi ninge okandidate koupelesidente ke likalela po koovene momahoololo oo kwa li a ningwa nale.

“Opo opo nda topokela nedilaadilo lokukengelela Ovanamibia. Onda fikamena po oukumwe, elongelokumwe nemanguluko, mwa kwatelwa emanguluko lokumona oilonga, lokukala u na onghalamwenyo nokukala u na eumbo ndee oinima oyo oya kupulwashi filufilu.

Ovanhu ova tameka okukala tava file ashike oshisho omadimo avo vene omanga va dimbwa kutya ovanhu otava mono oixuna,” Osho a ti ngaho.

Omukulunhuwiliki woNamibia Media Trust Zoé Titus okwa ti omanga oikundaneki yomoshilongo i na okufimanekwa tete, Itula eshi ta popi noikundaneki yokondje oshi na sha nokuyambula po edina laye paiwana.

“Ondi wete kutya ota popi noikundaneki yaSouth Africa opo a shiivike paiwana – tashi dulika shi li omukalo umwe womakwatafano oikonga yaye.

Oopelesidente vakwao novahoololwa pelesidente okwa li ve ya okukundafana noikundaneki yetu moNamibia,” Titus osho a ti ngaho.