Omhuku i na mwene ihai lungwina omushila. Oludalo li li momake nometonatelo lovanongeki
ve na eenghono dokuli vela ombedi pamikalo da yooloka, ile ndi tye adishe ngeenge otashi
dulika, olo oludalo li li melao neenghono adishe.
Eshi shonena osha ekelela omaludalo moshiponga, osheshi paife omhuku nonande i na mwene, otai lungwina ashike omushila,
nopeemhito dihapu nokuli, nomutwe otau lungwina.
Mbela nee eshi omutwe tau lungwina,
ngeenge olutu?
Omalipulo oku li apa kutya, mbela eshi omhuku tai lungwina ngaha, mwene wayo oku li peni?
Mupya munene, mwene wayo okwa tala ko ashike hewa, ehalo lokuninga po sha iha lungwine ngeno okuli na, ashike ke na eenghono, okwe di kufwa.
Omudali kamana mokukala kwokaana, omuhongifikola, osheshi oye ha pange nako efimbo lile shi dulife keshe umwe monghalamwenyo yako, ndele nee ngeenge omunongeki nomudali oye tuu ou, ke na eenghono dokuvela okaana oko tuu aka ombedi pamukalo tau wapalele, mbela otashi ka pya tuu nameya?
Mounyuni wetu, ooHautolonde vopefimbo olo, otwa li noveta yehongo i li xwepo. Oveta oyo inai nwefwa mo komifyuululwakalo dihapu.
Monale, omuhongi okwa li ha dulu okuvela okaana ombedi pamukalo keshe tau wapalele, omo peemhito dimwe tashi dulika mu kwatelwe omukalo wokupupula okaana kolutu, sha ngabekelwa ngaho fiyo opomufika wonhumba.
Eshi ondi wete sha kwafela neenghono shaashi outile noumbada wokupupulwa osho yo okupewa omahandukilo amwe po, owe tu etela tu likaleke kokule nomapove osho yo omapuko mahapu.
Monale ngeenge wa dopa okakonakono konhumba, kokoitwa yokomilongo mbali nandookuli, oho pewa ngaho oungola voye va valula oitwa oyo wa kambela ko u pite ile u mone mo adishe.
Onghalo oyo tuu ei, oyo ngaho ye tu etela elitulemo la kwata moiti tu leshe, tu ha kale twa dopa mo sha, opo tu ha pupulwe noungola komatako ile pomake. Nale ngeenge owe ya wa tokelwa, oho pewa ngaho ehandukilo u ka kunghule nande okamwiidi moluumbo lofikola nosho tuu, ile u pupulwe ngaho koutako, oungola va valula ominute edi wa laata nado.
Ashishe eshi osho ngaho sha eta tu kale novanashilonga ovanashisho, ovadiinini novanamikalo mefimbo lopaife, ohatu ke va hanga peni monakwiiwa tu na ovahongwa meefikola itava velwa ombedi?
Meefikola omwa kala ngaho eshi sha dilikwa ovahongwa shaashi sha talika ko sha puka noina shi yuka, ndele paife mbela inashi puka vali, nosha yuka lela lela shi ningwe kovahongwa, ngaashi okukala needjedi dile dile, okuhakululwa, okupandwa ngaashi wa hala, okutokelwa
okuya kofikola, okuhalonga oifiilwalonga nosho tuu.
Aishe ei omuhongwa nei ninge ndele ina shunifwa keumbo, ina kumwa kolutu, ina ningilwa sha tashi mu ehameke kolutu ile komwenyo.
Ofikola ngeno kaishi ashike onhele yokuhonga oshikalimo, ashike oi li po yo okuhonga eenghedi nomikalo dokukalamwenyo, ndele mbela pamhito ei, osho tuu vali? Akutukutu omaludalo oomeme.
Wonale okwa tile, ohashi vyulwa manga shitalala. Monena ngaha, ope na nale oshihopaenenwa shomuhongi a kufwa moilonga molwevelombedi lokaana. Eshi osha tukulula oumbada uhapu movanongeki vahapu neenghono, nosha hapupaleka yo onghalo younona va efelwe oitomho, onghalo yanaikawe nomulondi, omanga ve li peedula dokulelwa osho yo okuvyulwa va yukilile ngeno.
Eshi oshiwana sha ekelwashi eshi!
Omaludalo etu natu a honge ndele inatu a ekelela emanguluko tali a ningilile mo, itaku popilwa ngeno onghalo yedengo ile omahepeko naikwao aishe ii ya yukila oko, ndele otaku kondjelwa oudemokoli wa yela, uhe na okambweenga, uhe na okaningilila mo, wo itau ka tanaukila po oshiwana shetu shokomongula monakwiiwa.
Carlitu Beatus Vauleni omuhongifikola poUN Nghaamwa secondary School, moshitukulwahoololo shaHangwena. Oha hongo omalaka, Oshikwanyama noshiingilisa. Ota monika koemaila vaulenicarlitu@gmail.com
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
