‘Okwa li ndi shi omaindilo ange okwa udika’

Omukalimo wokoKongola Meriam Kabika (26) okwa kala nokukonga oilonga okudja ngaa nghee a manene ofikola momudo 2016.
Ashike nee, ina dula nande okumona oilonga kakele ashike koilonga yopakafimbo.

Eshi kwa li ta popi noThe Namibian, Kabika okwa ti okwa li eshi elao laye ole ya eshi a mona ongodi oshivike sha dja ko okudja konomola ehe i shi tai mu lombwele kutya okwa hoololwa opo a ka longe komahoololo nokwa pumbwa okulilopota komadeulo mEtitano olo.
Okwa li a hafa neenhono, okwa endelela a ka lombwe ina onghundana yehafo.

“Omukainhu okwa li ta popi lela pambelewa, nonghee nee kakwa li nande ndi na etomeno lasha lokukala nda limbililwa.

Okwa li ashike handi dilaadila kutya omaindilo ange okwa nyamukulwa.

Fyee nameme otwa tameka okukonga oimaliwa yange yolefa ndi ye koKatima Mulilo. Kapwa li nande pu na umwe vomofamili yange ta dulu okuvatela, onghee nee meme okwa indila oshimaliwa komunhu e na ongeshefa yokuyandja eengunga,” Osho a ti ngaho.

Metine, kabika okwa li a ya molweendo a ye koKatima Mulilo, eekilomita di li 100, ndee ta kala manga meumbo laxekulo opo e ke lilopote komadeulo ongula ya shikula.

“Onda fika nda hafa nodikuyele komadeulo. Ovanambelewa ova tameka okuufana omadina aavao kwa li va hoololwa mo.

Ashike nee, inandi uda nande edina lange tali ufanwa. Onda ya kovanambelwa ndi ke va pule kutya pamwe ova ninga epuko ile ova dimwa okuufana edina lange. Ova talulula natango momusholondodo, ndee edina lange kala li mo,” Osho a ti ngaho.

Kabika okwa ti yee, amwe navakwao ovo omadina avo aha li mo momusholondodo, ova lombwela ovanambelewa vokomisi yomahoololo yaNamibia kutya itashi shiva va kale vehe mo momusholondodo, shaashi aveshe okwa li va dengelwa opo ve uye komadeulo.

“Ove tu lombwela nee opo tu shange omadina etu opo va dengele oshikondo shavo shokuyandja oilonga va koleke. Ashike nee, konima yefimbo ove tu lombwela kutya omadina etu kaa li mo nande momusholondodo oo va pewa okudja koshikondo shokuyandja oilonga shavo,” Osho a ti ngaho.

Kabika okwa ti okwa li a kumwa, a teelela ashike ponhele opo fiyo a ,mona omukumo wokudja po.

“Okwa nda uda nai neenghono, kakwa li handi dulu okudja po ponhele opo divadiva. Omunhu ota kala e na omadilaadilo e li ngaho ngahelipi ndee ta itavelifa nge kutya onda hoololwa mo. Okwa li ndi shi onda m,ona nee omhito yokumona oiyemo, nande ngeno oyo pakafimbo ashike,” Osho a ti ngaho.

Natango, Duma Kumpoma (27), oo a kala nokukonga oilonga oule weedula nhano da pita, naye okwa li a dengelwa Etivali lwopotundi 9h00 ta lombwelwa opo e ke lilopote komadeulo.

Kumpoma, oo ina mana odipoloma yaye yehongo leendodo dopedu, okwa tameka okwoongela oshimaliwa kwa li.
“Okwa li nde shi pondola okwoongela oN$500 yolefa noikulya okudja komunhu wonumba.

Metine okwa li nda ya koKatima Mulilo ndee handi nangala kukaume kange. Ongula ya landula onda ya komadeulo lwopo8H00.

Konima yominute dishona, okwa li va tameka okuufana omadila ovanhu ovo va hoololwa mo, ndee momusholondodo kanda li mo.

“Ame, pamwe navakwetu ovo vaha li mo momusholondodo, otwa pula kutya omolwashike inatu ifanwa ndee tave tu lombwele kutya omadina etu kee mo momusholondodo,” Osho a ti ngaho.

Omunambelewa womahoololo wopashitopolwahoololo Lesley Simwanza okwa ti,okudja ashike petameko lomadeulo Etitano, okwa li tava ningi omatalululo nawa opo va kufe mo ovanhu ovo kwa li inava hoololwa mo kombelewa yokukuta ovanhu yokomisi yomahoololo.

Okwa ti ovanhu ashike ve li 1 003 kwa li va hoololwa va ka longe ongovanambelewa vomahoololo peenhele domahoololo, nokwa li ve na okushunifa ko ovanhu ve li 80 tava kongo oilonga ovo va li va mona eengodi doipupulu.

Konima yomakonakono, ova mona kutya kakwa li va dengelwa komunhu womombelewa yokukuta yokomisi yomahoololo, Simwanza osho a ti ngaho.

“Kapwa li nande omunyasha umwe womwaava kwa li a dengelwa komunhu oo ta ti wokokomisi yomahoololo kwa li e li mo momusholondodo.

Okwa li nokuli twa dengela onomola ouyo ye va dengela, ashike onomola oyo okwa li ya dimwa nale.

Otwe va pa eenomola yetu yopamabelewa ndee hatu va lombwel kutya ngee inava mopna ongodi okudja keenomona odo, inave i nyamukula.”