Omukainhu ta feekelelwa edipayo lomonamati okwa ti okwa ‘mana’ noshibofa

Omukainhu ta feekelelwa edipayo lomonamati wodula imwe koshitopolwahoololo sha//Kharas muJanualia odula ya dja ko okwa ti omhangu nai ye komesho momhangu yopombada yaVenduka noshibofa shaye nande ke po.

Pefimbo loihokolola yopetameko komesho yomupedu pelesidente panguli Hosea Angula Etine, Vapeni Boois (36) okwa hala okufiwa e li mokakololo kaye omo a idililwa modolongo noina hala okufininikwa opo a ye keemhangu doshibofa shaye da shikula ko.

“Otava dulu okuya komesho ndihe po, ndihe po, ndee tava mane ndihe po,” Boois osho a ti ngaho.

“Onda mana. Itandi kala handi monifwa oixuna ngaha,” Osho vali a ti ngaho.

Boois, oo e li omunambelewa wopolifi mukulu, okwa teelela okupangulwa shi na sha noshibofa shedipayo, taku longifwa okatendo kekotamhango kokukelela omahepeko omomaumbo, nosho yo okuya ouyuki moshipala.

Epangelo otali ti okwa dipaya omonamati, Amare Boois (1), koshitopolwa shaBethanie moshitopolwahoololo sha//Kharas momafiku 12 Januali odula ya dja ko.

Amare vati okwa li a tuwa oikando i li 15 nombele ile oinima ikwao yahonga.

Epangelo natango otali ti kutya Boois okwa fudika olutu lokaana mokalambo kaxupi popepi noBethanie konima eshi kwa li ka dipawa, ndee ta xwike po oikutu imwe noinima imwe monghendabala yokukanifa oumbangi nokupiyaaneka omakonakono opolifi kombinga yefyo laAmere.

Boois okwa fiya po eumbo laina koSwapmund, omo kwa li ha di, nomonamati omafiku atatu omanga okaana kwa li inaka dipawa, epangelo osho la ti ngaho.

Pefimbo noihokolola yopetameko ya dja ko oyo ya li momhangu yopombada yaVenduka, Boois okwa lombwela Angula kutya ina hala okukalelwa po komunaveta noina hala okuninga eindilo levatelo lopaveta kepangelo, ashike natango ota pandula unene okuvatelwa kuhahende ngee omhangu oya pula umwe e mu vatele.

Angula okwa lombwela Boois pefimbo loihokolola imwe muOktoba kutya ota tamanekelwa oshinima shakula nokuwete kutya okwa pumbwa evatelo lopaveta.

Angula natango okwe mu lombwela kutya okwa pula hahende Susan Nyatondo e mu vatele.

Nyatando okwa lopota kuAngula Etine kutya okwa li e na eenghundafana naBoois nokwa longekida omanyamukulo aasho tashi pulwa momukanda woihokolola yopetameko, oo e li omapulo oo omhangu ya hala Boois a nyamukule opo a tale nawa omanyamukulo aye kombinga yoshibofa osho a taalela.

Ashike nee, Boois okwe mu lombwela kutya okwa tokola kutya ita shaina nande omukanda oo u na omanyamukulo oo a longekidwa kuye, Nyatondo osho a ti ngaho.

Eshi kwa li ta popi nomhupanguli, Boois okwa ti: “Eshi handi popi ngaha paife, oshibofa shange otashi teya nale oveta. Inandi hala kutiwe ondi na ondjo. Itandi dulu okumonika ondjo. Onda anya.”

Okwa weda po vali: “Keshe osho tashi ningwa, otashi ningwa puhe na ediminino lange.”

Boois natango okwa ti okwa mana nale oshibofa shaye momhangu yopashitopolwahoololo nosha hololwa nale kutya oshibofa shaye kashi li pauyuki, ndee ngee oshibofa otashi twikile nashi kale shi li koshi yaasho tashi popiwa koUnited Nations Charter.

“Onda mana,” Boois osho a ti ngaho, ta weda po vali: “Ondi shi eshi sha ningwa po nondi shi eshi nda ninga.

Itandi dulu okukala handi fininikilwa oshinima eshi.”

Boois okwa twikila: “Mana oshibofa shomhangu nde to yandje nge momake oUN Charter ngee otashi dulika.”

Oihokolola yopetameko oya xula naAngula ta lombwel Boois kutya oshikumungu shaye osha yandjwa komhupanguli Philanda Christiaan, oo oye ta ka kwatela komesho oihokolola yaye, noku na okuholoka lwotete komesho yaChristiaan momafiku 28 Januali.

Boois natango oku li mondolongo.