‘Oshiwana shi na ouyelele wa puka’

. . . IPC okwa yandja ombedi koSwapo molwouyelele uheshi woshili; Nekongo okwa ti IPC na kule

Ehangano loNamibia Fact Check ola holola omalimbililo kombingabyomaponokelo okomalungula omafiku aa oo a nuninwa omuleli wongudu yomilameno Panduleni Itula, opamwe yoo nexwaxwameko okudja kondje yoshilongo la kwatelwa mo.

“Oshinima eshi shokukakeka efanao lokandidate yongudu yomilameno otashi limbililike, unene ngaa eshi sha fa sha kwatela mo exwxwameko lokondje yoshilongao,” Omunyanyangidi woNamibia Fact Check Frederico Links osho a ti ngaho Oshoondaxa.

“Otwa yuka lela pondodo ya nyika oshiponga mopolitika yetu ngee ovanhu vokondje otava longo va lyatele pendu oudemokoli waNamibia womahoololo,” Osho a ti ngaho.

Eengudud dopolitika daNamibia monakudiwa okwa li da holola omalimbililo kombinga yekwatelemo longudu yoZimbabwe African national Union – Patriotic Front (Zanu-PF) moinima yaNamibia, osho ongudu tai pangele yaZimbabwe ye shi likanyuna.

Links okwa ti oshikonga oshjo sha nyka okukakeka ondjokonona yovanhu vamwe omukalo u lio oo hau ningwa koilongo yaAfrica.

“Elongifo loikonga i na ouyelele tau nyateke nosho yo nokuponokela komalungula paife okwa ninga omukalo waNamibia wokomalungula wokupala ondjila yomahoololo,” Osho a ti ngaho.

Links okwa ti ovanambelewa vomahoololo ova pumbwa okuyandja elondodo leengudu opo di lipake moilyo novayambidi vado, “shaashi ersdhi otashi dulu okuyamoshipala elineekelo moudemokoli womahoololo okuya komesho”.

Eshi kasi fi oshikando shotete ehangano eli la holola oinima oyo tai ningwa shi na sha nokunyateka Itula.

MuMei odula ei, ehangano okwa li la ninga olopota i lin koshi yoshipalanyole ‘Spotting a Politicala Smear Campaign’.

Molopota, ehangano ola ti: “MoNamibia, konimayeemwedi dishona oshi shiivike nawa kutya otamu ka kala oikongo tai lalakanene okukakeka edina lomuleli wongudu yoIndependent Patriots for Change (IPC), Panduleni Itula.”

“Omanga Itula a kala nokuponokelwa omafiku aa, elalakano lakula loikonga yokukakeka edina laye, nokumuila kutya okwa kalela po epangelo lokondje olo la hala elunduluko mepangelo laNamibia.

Eenghendabala edi oda longifa ouvidio oukilipa okwaandjakaneka nokweendulula omahokololo aa komalungula nosho yo outumwalaka vaxupi okupitila noinyolwa inai holola kutya oya nyolwa kulyelye,” Osho ya ti ngaho.
OMBEDI
Ongudu yoIPC oya yandja ombedi koSwapo eshi sha sha andjkaneka ouyelele uhe li mondjila komalungulula opo u kakeke ongudu.

Omupopiliko wongudu yoIPC Immanuel Nashinge okwa lundila ongudu tai pangele kutya oya longifa nokuli oshihako shoThe Namibian opo i andjakaneke eenghundana dihe shi doshili.

Nashinge okwa ti,nande ongudud oya kala taia popilwa eenghundana dihe shi doshili, oshinima eshi inashi kuma nande efano layo ile oikonga yayo.

“Ovo kwa li va longifa oimaliwa va fute ovanhu va ponokele oIPC komalungula ova hepeka oimaliwa yavo. Paushili otava tu ashike vahapu omukumo opo va hoolole oIPC. Otava nghonopeke oshilimbo shoIPC.”

Hamushanga wevava lovanyasha loSwapo Ephraim Nekongo okwa ti Nashinge “na kule” shaashi okwa tota omapandja ahapu komalungula opo a kufe ongudu yaye ongushu ongudu yaye a fa ngeno a ningwa koSwapo.“

Swapo ongudu i na oshili nonghee kai na efiku i litule moinima ihe na oushili. Ovanhu ovaanya IPC notava ka hoolola Swapo. Nava fye ohoni! Omahokololo avao eheshi oshili okwa dopa,” Nekongo osho a ti ngaho.
ONDUBA YEENGHUNDANA DIHE NA OUSHILI

MuOktoba, eenghundana dihe na oushili okwa li daandjakanekwa kombinga yomuulikwa hoololwa woSwapo Netumbo Nandi-Ndaitwah, tadi holola kutya okwa li ta landifa po etuliloshikepa laMbaye kuChina.

Ouyelele ou uheshi woshili okwa li yoo vali tau popi kutya Ndai-Ndaitwah oku na eedula 82, omanga e paushili e na ashike eedula 72.

Natango muOktoba, okwa li pu na okaoudio vati ka dja komuleli wongudud yoLndless People’s Movement (LPM) Bernadus Swartbooi ta popi omalaka ai nomatumbulo oukwamuhoko kombinya yaItula.

Ashike ongudu yoLPM okwa li ya popya kutya oshinima osho kashi fi shoshili.

“Ei onghendabala yokukakeka ondjokonona yelelo loLPM noIPC,” Ongudu osho ya ti ngaho momukanda wokoikundaneki.

Omwedi wa dja ko, eelopota okwa li di li keshe pamwe kutya Nandi-Ndaitwah okwa li e lidenga po koshoongalele sha li kOtjiwarongo.

Konima yolopota ei, efanao limwe kwa li landulukwa nounongononi wopamalungula tali ulike Nandi-Ndaitwa te lidenge po okwa li tali monika tali endeenda komalungula.

Oshivike sha dja ko, omalungula okwa li e yadi olopota yoipupulu tai ti omukokoli pelesidente Sam Nujoma okwa koleka ongudu yoIPC.

Ashike, ehangano loSam Nujoma Foundation olaanya sohinima eshi, tali ti efano laNujoma ola longifwa papuko lomahokololo ongaho opapolitika nosho yo moinima yokuxwaxwameka omahoololo.

“Ohatu pula oshiwana opo shi kotoke opo shiha ninge nande oshihakanwa shomikalo domiheka di li ngaho tadi lalakanene okwaandjakaneka omauyelele ehe li mondjila, fiyo nokuli oponghatu opo kwa longifwa nokukakeka edina lomukokoli pelesidente,” Osho la ti ngaho momukanda walo.

Konima yoshivike sha dja ko, okwa li pu na oshinima shimwe komalungula tashi ti ongudu yoAffirmative Repositioning oya koleka Itula.

‘OTASHI TEYA OUDEMOKOLI’
Omundjadjukununi woikwapolitika Ndumba Kamwanyah okwa ti eyokomesho leenghundana dihe na oukwashili otali teya elineekelo loshiwana momahangano omahoololo nosho yo momilandu doudemokoli.

“Otashi eta engwangwano, novanhu vaha itavele nokuteya po omukumo mouyuki nousdhili womahoololo,” Osho a ti ngaho.

Okwa ti ngeee ovahoololi va ningi omatokolo avo ve likolelela ouyelele uhe li mondjila, oushili woudemokoli nena ou li moshiponga.

Omupopiliko wokomisi yomahoololo yaNamibia De Wet Siluka okwa ti eenghundana dihe shi doshili oda kala yoo nokupopilwa okomisi yomahoololo.