… ovakalimo ova ninga omatilifo okukala inava hoolola molweenamanana kombinga yedu
Ovaleli vokoshitopolwahoololo shaKavango Uninginino Etitatu okwa li va fininikwa konghalo opo va twale ovanamukunda keenhele dokuhoololela konima va ninga omatilifo kutya itava ka hoolola molweenamanana kombinga yedu odo da ninga omafiku koshitopolwa oko.
Ngoloneya woshitopolwahoololo shaKavango Uninginino Sirrka Ausiku nakamusela koshikandjohoololo shaMpungu Titus Shiudifonya okwa li ve ya
po nomikalo dokutwala ovanamukunda ve li 300 okudja momukunda wedina Gava va ye va ka hoolole koNepara.
Ausiku Etitatu okwa li ta shingi a yuka komukunda opo a ka shakene novakalimo.
“Paife ngaha ondi li mondjila nda yuka komukunda wedina Gava ndi ka kandule po oupyakadi ndi tale kutya oshike tashi ningwa po,” Osho a ti ngaho.
Ovakalimo tete okwa li va tya ova loloka edopo langoloneya waKavango Uninginino, ewilikongudu ledu lokomukunda nosho yo opolifi yaKavango Uninginino lokukufa po odalate oyo ya tulwa konhele yavo shihe li paveta.
Shiudifonya Etitatu okwa koleka kutya elelo loshitopolwahoololo okwa li la shakena novanamukunda opo va kundafane kombinga yoshikumungu eshi.
“Konima yeenghundafana novanamukunda, otwa udafana okukufa po odalate ngaashi sha udanekwa mEtitano (nena),” Osho a ti ngaho.
“Otwa shangela omukanda kopolifi notwa teelela ongudu yopolifi opo i kufe po ovanhu ovo tava tula ko odalate nena,” Osho a ti ngaho.
Okwa ti ovanamukunda Etitatu okwa li tava twalwa keenhele dokuhoololela odo di li popepi.
“Kamu na onhele yaalushe moGava, onghee nee ongudu yopakafimbo opo ya li ongula. Otwa tameka okuvatwala koNapara nokoKakuva opo va ka hoolole,” Shiudifonya osho a ti ngaho.
Okwa ti keshe umwe ota ka shunifwa keumbo konima va mana okuhoolola.
Shiudifonya okwa koleka kutya ombinga imwe yeudafano oya kwatela mo kutya ombelewa yangoloneya waKavango Uninginino otai kufa po odalate oyo tai popiwa nena.
Okwa ti oshipambu shedu osho ashike shi li po shoulifilo momukunda omu nopwa pumbwa okumonika omukalo uwa wokukandula po oshinima eshi. Mwene womukunda woGava Eino Hamunime Etitatu okwa ti ovaleli voshitopolwahoolo ove va dopeka okudja nale momudo 2016.
“Momafiku 12 Novemba otwa shangela omunashipundi wewilikongudu loshitopolwahoololo shaKavango Uninginino, ngoloneya waKavango Uninginino nosho yo ewilikongudu ledu lokomikunda laKavango Uninginino omukanda opo tu va lombwele kombinga yehololomadilaadilo lopambili momafiku 23 Novemba,” Osho a ti ngaho.
Hamunime okwa ti okwa li kwa ningwa oshoongalele novakufimbinga novakalimo komunda oGava momafiku 22 Novemba.
“Okwa li nda dengelwa komukulunhu welelo lopamufyuululwakalo laUkwangali, Eugene Kudumo, oo a pula opo tu va efe va tule ko odalate konhele oyo.
Yee, ewilikongudu ledu lokomikunda koKavango Uninginino nombelewa yangoloneya okwa li va udaneka okukufa ko eedalate dihe li paveta momafiku 25 Novemba, ashike ova dopa okushininga.
“Ame novalelwa vange otwa mona kutya itatu hoolola nena ngee ovaleli voshitopolwahoololo itava kandula po oupyakadi wetu.
Itatu dulu okuhoolola opo ovanhu vamwe ve uye va kufe po edu letu lovakwamungu,” Osho a ti ngaho.
Hamunime okwa londoda ovaleli voshitopolwahoololo kutya ngee odalate oyo inai kufwa ko nena, ovanamukunda otava ka ngudumana komesho yombelewa yangoloneya fiyo oshikumungu eshi sha kandulwa po.
Omundjadjukununi woikwapolitika Ndumba Kamwanyah okwa ti onghalo ei otai holola ehandu lakula nokuhena elineekelo movaleli.
“Otashi holola edopo lovakufimbinga lokutala nawa oupyakadi ou wefimbo lile lwokutula eedalate kedu lokomikunda.
Ekateko eli otali lyatele pedu elineekelo loshiwana mepangelo,” Osho a ti ngaho.
“Omanga okwaanya ku li omukalo wokutula mo ekangha, otaku anyene ovakalimo oufemba wavo wopaudemokoli wokuxwaxwameka elelo,” Osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
