Omukulunhu wokomisi yomahoololo yaNamibia Peter Shaama okwa ti eembapila domahoololo okwa li da wana.
Eshi okwe shi popya nande okwa li kwa lopotwa kutya eenhele dimwe dokuhoololela koshitopolwahoololo shaKavango Ushilo, Omusati, Oshana, Khomas, //Kharas nOmaheke okwa li da mana po eembapila domahoololo Etitatu.
Ovahoololi vamwe vati okwa li va fiya po eenhele domahoololo konima va uda kutya eembapila domahoololo oda pwa po.
“Otwa hala okuyeleka kutya moshilongo otu na mo eembapila da wana domahoololo,” Shaama osho a popya ngaho momukanda wokoikundaneki ongula yEtine.
Shaama okwa ti okomisi yomahoololo oya pondola okutwala eembapila domahoololo keenhele oko kwa li da pwa po.
“Onghee nee, otwa hala okukwashilipaleka Ovanamibia kutya otu na eembapila domahoololo da wana neenghatu adishe da pumbiwa okwa li da tulwa moilonga opo kweendelelekwe eembapila di fike kwaavo ve di pumbwa,” Osho a ti ngaho
Shaama okwa weda po vali kutya eenhele dimwe dokuhoololela okwa li da mana po eembapila domahoololo molwomwaalu uhapu wovahoololi wa holoka shaashi ovanhu okwa li va pitikwa va hoololele keshe apa va hala okuhoololela.
“Ashike nee, oinima ihapu otai dulu okukateka, mwa kwatelwa yoo novanhu,” Osho a ti ngaho.
Okwa ti opu na peenhele dimwe opo ovanambelewa vomahoololo kwa li va fiya ovahoololi itava vatelwa, nande okwa li ve li momikweyo.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
