Omuperesidende Pohamba a indila oshigwana shi kale kumwe

PETHIMBO ta popitha oshigwana poshituthi shOmagongo pOuhamba wa meekulu, Martha Mwadinomho Kristian Nelumbu mOlyomakaya ga zi ko, Omupresidende Hifikepunye Pohamba okwa indile oshigwana sha Namibia shi kale kumwe nokukwatela po ombili nengungumano moshilongo.

Omupresidende Pohamba ta ti iituthi ngashi mbika yOmagongo yOpamuthigululwakalo otayi ningwa nelalakano lyokukwatela po uukumwe wAanamibia, oshoka ohaye ya kiituthi yawo mbika opo ya tseyathane nokushiwa wo omithigululwakalo dhawo dhi ili nodhi ili. Omupresidende Pohamba ta pandula oshigwana sha Hangwena sho sha ndjoina oshikwawo ashihe sha Namibia moku mu shuna ishewe koshipundi nokulela Namibia uule woomvula ntano tadhi landula.Ta uvaneke kutya, ngashi ngaa a kaleka po ombili nengungumano moshikako she shotango, nomwaashika shoomvula ntano a pewa otaka, kambadhala ngashi ta vulu okukaleka po ombili nengungumano moshilongo. Omupresidende, Pohamba ta ti ota pandula noonkondo aaleli yOpamuthigululwakalo sho ya kala noye li taya longele kumwe nawa nEpangelo mekwatelopo lyombili, engungumano nomithigululwakalo nokwe ya indile ya tsikile ngawo. Ta indile oshigwana sha Namibia shi dhiginine omithigululwakalo dhasho, oshoka oshigwana inaashi simaneka omithigululwakalo dhasho osha fa omuti gwaa na omidhi.Pethimbo naye wo a popitha oshiithanene shomagongo shika, Omukokolipresidende Sam Nujoma, okwa indile aawiliki yopamithigululwakalo noshigwana shi dhiginine omithigululwakalo dhasho. Shi galule omithigululwakalo dhasho ndhoka dha li dha kuthwa po kaakolonyeki okupitila moongeleka, taya ti kutya iinima yuupaagani. Ta ti ngashi omalufuko na ga galuke.Oshigwana shaakadhona oshigundjuka nashi kale hashi fukala naanaa moohango dhasho shopashigwana, ano dhOpashiwambo ngashi sha li nale. Nujoma ta ti edhilaadhilo lye ndyoka ote ke li kolekitha moshigwana okupitila miitayileli yOswapo ayihe. Omupresidende Pohamba okwa ti kutya edhilaadhilo ndyoka lya etwa po ku Nujoma ku simanekwe nokupendulwe po omithigululwakalo ndhoka dha li dha ekelwahi koshigwana sha Namibia kaakolonyeki okupitila maatumwa yotango yaakwiilongo, mwa kwatelwa olufuko lwOshiwambo, ote ke li fala nziya mOkabinete li ka kundathanwe opo pu ningwe etokolo lya kola mwaashika.’Otandi yi kOkabinete meendelelo ngashi tashi vulika, ndi ke ka lombwele kutya Omukokolipresidende noshowo Aaleli yOpamuthigululwakalo oya hala omithigululwakalo dhoshigwana dhi ye miilonga meendelelo ngashi tashi vulika. Omupresidende Pohamba ta ti iinima yomithigululwakalo yAanamibia yimwe oya kuthwa po kaakalonyeki okupitila mAatumwa yOongeleka, taku tiwa kutya aniwa oyuupaagani. ‘ Nale ngashi oshituthi shomagongo shika niikwawo yilwe, ngeno otaku tiwa kutya oshuupaagani, inashi dhanwa. Ashike ngashiingeyi otandi pandula Aawiliki yOongeleka yopethimbo ndika sho taya ende ngaa taya yulula ko.Nale mOongeleka shampa nande Omusita a uvitha nawa, kaku pandulwa omake, ashike ngaashingeyi onda mona mOongeleka dhimwe shampa Omusita a uvitha nawa aakwanegongalo otaya hakele omake, ya pandula sho Omusita a uvitha nawa,’ Omupresidende Pohamba ta ti nokugwedha po ta ti oshigwana oshigundjuka, ano shoka shokomongula ngele itashi longwa omithigululwakalo, oku dhi simaneka noku dhi gwanitha po, nena otashi ka kala sha kana no kashi na uukolele washa. Ta kumagidha oshigwana oshigundjuka shi simaneke aakuluntu yasho noku ya kwathela. ‘kahuhwena hadhela nyoko, nyoko onale e ku hadhele,’ Presidende Pohamba ta lombwele aagundjuka ngawo. Ta ti inaya uhale we taya tsikile nokulya po oopenzela dhaakulupe ndhoka haya pewa kEpangelo.Naya kale taya yambidhidha Epangelo mokukwathela aakulupe ndele hakulya po openzela yawo. Oshinima oshikwawo, Omupresidende ta ti, oomeme aagundjuka nootate aagundjuka, naya kuthe oshinakugwanithwa shokukala nomaluvalo gawo, na kashi shi okumona uunona noku ke wu fala kaakulupe. Omupresidende ta ti shoka otashi hepeke noonkondo aakulupe, mboka ya tegelelwa ya vululukwe nombili miipundi yawo yomavululuko.