Aagundjuka ye li 560 ya taambwa miilonga yopashigwana pOndangwa mOshana

AAGUNDJUKA ayehe kumwe ye li 560 mboka omathimbo ga zi ko ya taambelwa mEhangano lyIilonga yOpashigwana yUuministeli waagundjuka, Iilonga yOpashigwana, Omaudhano nOmithigululwakalo, ya za mIitopolwa ayihe 13 yaNamibia, oya tameke nomadheulo gawo pOndangwa mOshitopolwa sha Shana mEtitatu lyOshiwike sha zi ko, ano meti 27 Juli 2011.

Oministeli yOpevi mUuministeli wAagundjuka, Iilonga yOpashigwana, Omaudhano nOmithigululwakalo Pohamba Shifeta oye a egulula Omadheulo ngaka pambelewa oshiwike sha zi ko pOndangwa mpoka.Omupeviminista Shifeta ta ti shika oshikando oshititano shAagundjuka taya dheulilwa oshilonga shEhangano lyIilonga yOpashigwana nosha eta nee omwaalu gwaagundjuka ayehe ya dheulilwa moshilonga shika ye li 2493, okuza tuu momumvo 2008. Shifeta ta lombwele aagundjuka naayehe ya li mpoka kutya okundjoina Ehangano ndika lyAagundjuka nomadheulo ngaka taga ningilwa aagundjuka mbaka yaNamibia, oshinima sha simana noonkondo mehumokomeho lyoshigwana. Shifeta ta ti elalakano enene lyokutota po Ehangano ndika kEpangelo, okudheula aanyasha mbaka moshinima shokuuvako uukwashilongo kutya oshike, okulongwa omikalo na nkene omuntu wu na okwiihumbata mokati koshigwana oshikweni, okukala wu hole oshilongo noshigwana shoye noshowo okutunga oshilongo shoye shi kale sha huma komeho.Tashi ti taya longwa ya kale ye holathane ongAanamibia ya thikama mOmihoko dhi ili nodhi ili, ashike yamwe mu Namibia limwe lya manguluka. Ya kale ye na ombili mokati kawo ongoshigwana shokomongula, okusimanekathana ethimbo alihe nokwiitala ko, ongaamwayinathana. Shifeta ta lombwele aanyasha mboka kutya naya kale ya simaneka ompito ndjika ya mona, molwashoka aanyasha hanga ye vulithe pomayovi gatano (5000) ya li ya ninga omaindilo ya taambelwe mEhangano ndika lyAanyasha ndele inaya mona ompito molwashoka itaku vulu okutaambwa oyendji yethike mpoka pethimbo limwe. Otaku ende ngaa taku zi. Omupeviminista Shifeta ta ti kutya ngele ya mana omadheulo ngaka, oya tegelelwa ya katale mpoka taya mono iilonga.