OMUNDJADJUKUNUNI woikwapolitika Ndumba Kamwanyah okwa ti ovanapolitika novanambelewa vepangelo nava kale tava popi oshili kombinga youkolele wavo opo va kwashilipaleke oshiwana kutya otava dulu okulonga oilonga yavo.
Kamwanyah okwa li ta popi ta nyamukula shi na sha netulopedu moilonga lomunyanyangidi nomutoolinghundana akula wehangano lokwaandjakaneka omawi momhepo ledina Namibian Broadcasting Corporatiopn (NBC) Anna Nicodemus, sha landula omapulaapulo noradio yomudidibe yaSouth Africa, Newezroom Afrika, shi na sha noundjolowele womuhoololwa pelesidente Netumbo Nandi-Ndaitwah Etitano.
Nicodemus okwa pula ngee Nandi-Ndaitwah ota dulu ngaa molwomaupyakadi wopaundjolowele, ta yandje oshiholelwa sheemhito odo omuhoololwa pelesidente vati kwa li e lidenga po.
Okwa koleka Etitano kutya okwa li a tulwa pedu kehangano sha shikula omapopyo aye.
Nandi-Ndaitwah, nande ongaho, okwaanya omapopyo aa koshivilo shefindano loSwapo koSam Nujoma Stadium Olomakaya.
Okwa ti kutya ina enda moshipangelo okudja momudo 2022.
“Onda kala nokuninga oikonga okudja momudo 2022 ndee inadi lyata nande omadi moshipangelo,” Osho a ti ngaho.
“Omunamibia okwa ti onde lidenga po luvali – ohoni unene. Eshi kashi shi nande oshimwe shihe fi omaliumbato omunapolitika,” Osho a ti ngaho.
EMANGULUKO LOKUKUNDANEKA
Kamwanyah okwa ti, etulopedu laNicodemus ola eta omalimbililo kombinga yemanguluko loikundaneki.
“Oshiwana oshi na oufemba wokushiiva, shaashi otashi nghonopaleke elineekelo nokukalela po oinima.
Oshinima eshi otashi ulike omumbwe yokunghonopeka eameno lovatoolinghundana nokutota omundingonoko omo tava dulu okulonga vehe na oumbada wokulwifwa,” Osho a ti ngaho.
“Etulopedu laye otali eta omalimbililo a fimana kombinga yemanguluko loikundaneki nosho yo omudingonoko omo ovatoolinghundana hava longele. Otashi piyaaneke ngee ovatoolinghundana otava ka tukilwa eenghatu di li ngaha eshi tava popi omaliudo avo ile tava yandje omauyelele oo a pumbiwa moshiwana.
“Oinima i li ngaho otai dulu okunyanauna okulopota kwopamufika nokunghundipaleka emanguluko lokukundaneka. Ovakundaneki ove na oshinakuwanifa shokulopota oshili, nande osha kwatela mo oinima tai dulu okuudifa ovanhu nai.”
Okwa ti oshikumungu shaNicodemus otashi ulike omaupyakadi oo taa imbi oikundaneki ngaashi oNBC i yandje ouyelele nawa.
“Omanga pu na oudju wopapolitika novayandji voilonga, ovatoolinghundana nava kwatele po omikalo diwa ndee tava kelele oinima yavo yopaumwene opo va dule okulineekelwa koshiwana.
“Okukundanekwa kwa manguluka nokwelifikamena po okwa fimana unene koudemokoli wetu ndee keshe elidopemo otali lyatele pedu oushili nosho yo otali imbi ovo ve li melelo va kalele po oinima,” Osho a ti ngaho.
‘XULIFENI PO OKUYANDJA OUYELELE WAPUKA’
Omukulunhuwiliki wehangano loNamibia Media Trust (NMT) Zoe Titus momukanda oo wa pitifwa Oshoondaxa, okwa ti omapopyo oo a ningwa kuNicodemus kakwa li e na oushili.
Okwa ti omafano oshiningwanima okwa li ashike a ndulukwa paunongononi nokwa kunghilila ovatoolinghundana kombinga yokuyandja omauyelele apuka. “Ohatu koleke kutya etulopedu laNicodemus ola kwatakanifwa naasho a popya paumwene ongomuungaungi woinima ya pamba opolitika yaNBC nosho yo omukonakoninyanyangidi pefimbo leenghundafana noNewzroom Africa muDesemba.
“Oinima oyo tai kumwifa moshinima omu omapopyo a yooloka oo a ningwa kuNicodemus kombinga youndjolowele wa pelesidente oo tai koshipundi, mwa kwatelwa omapopyo kutya Nandi-Ndaitwah okwe lidenga po pefimbo loikonga yomahoololo omomafiku 27 Novemba.
Okwa li nee shaandjakana kutya omapopyo aa okwa li a ndulukwa nomafano oshiningwanima osho tashi popiwa kwa li a monika komalungula okwa li a ndulukwa paunongononi,” Osho a ti ngaho.
Titus okwa ti, NBC okwa tula Nicodemu pedu ashike ota futwa oimaliwa yaye aishe. “NBC okwa tula Nicodemus pedu ashike ondjabi yaye oi li ngaashi i li, manga taku ningwa omakonakono.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
