Aakalimo taya nyenyeta uutuntu kombanda yondjila

AAHINGI yiihauto mboka haya longitha ondjila yokuza kombinga ya Shakati nosho tuu ya thinda kuuninginino wa Shikuku nenge taya zi hoka, taya pitile pOmulamba gwaShikuku pOshikuku mOshitopolwa sha Musati, otaya nyenyeta noonkondo kutya uutuntu mboka opo wa tulwa kombanda yondjila ndjika pOmulamba gwa Shikuku, kOshikondo shOondjila, okukelela ngeno aahingi yiihauto kaya hinge ondapo onene uuna taya piti momulamba gwaShikuku moka, owa longwa nayi na inapu tulwa omandhindhiliko ngoka haga kala ga pumbiwa ga kale mpoka, unene ngaashi uupeleki wolwaala olutokele nolutiligane ndoka lwa tsa nawa nohalu monikila kokule komuhingi gwohauto.

Mboka taya nyenyeta otaya ti wo kutya uutuntu mboka inau tungwa nawa. Taya ti kutya ngashi uutuukara oundji otau piti po nuudhigu mpoka notau teka iitenda yokohi molwashoka ohau ende tawu igwegwenyene ko kuutuntu mboka. Oonakunyenyeta mbaka otaya ti kutya omandhindhiliko gatya ngawo oga li ga pumbiwa noonkondo, unene tuu sho uutuntu mboka uupe mpoka, ano opo wa tulwa po omasiku ga zi ko, na inawu igilililwa po pehala mpoka kaahingi yiihauto. Otaya ti wo kutya Oshikondo shIilonga inashi ninga nande oshikonga shi na oonkondo shokutseyitha uutuntu mboka mpoka. Oonakunyenyeta taya ti wo kutya, edhidhilikothano lyokulombwela omuhingi nenge aahingi yiihauto kutya komeho oku na uutuntu mokati kondjila, oli li unene popepi nuutuntu mboka, nomuntu nge okwa zi ko ta hingi omilongohamano nenge hetatu ndhoka dhi na okuhingwa mpoka, edhidhiliko ndyoka sho ngaa omuntu te li mono, oku li nale kombanda yuutuntu mboka.Omoluutuntu mboka, Jesaya Abraham gwokOmbaye muushimba nOneeya mUukwambi mOshitopolwa sha Musati noha longele kOshomeya, okwa kanithila po nale okamonakadhona koomvula omulongonayimwe mehulioshiwike lya zi ko kedhina Laimi Abraham, sho i idhenge muutuntu mboka wokombinga yokuzilila kOshakati ndele ohauto ye tayi kandoma nomwa si nee okanona ke hoka Laimi. Abraham ta hupu pamwe nomwanamati ngoka wo na ye. a li mo nako mohauto ye moka. Taku tiwa kutya okwa adhika te wu fala kefudho kaakuluntu ye kOneeya mUukwambi mOshitopolwa sha Musati, sho yi idhenge muutuntu mbuka ngawo nokukandoma.Kepulo, Komanda gwOpolisi mOshana Komufala Ndahangwapo Kashihakumwa, okwa koleke oshiningwanima shika shoshiponga shekandomo lyohauto, sha etwa kuuntuntu wopOmulamba gwaShikuku mpoka. Komufala Kashihakumwa ta ti kutya okwa tuma ko Aanambelewa yOpolisi yokukonaakona iiponga noshowo mboka yetonatelo yOondjila ya ka konaakone, iinima aayihe mbyoka iyali. Ano ekandomo lyohauto nkene lya enda noshowo nee uutuntu mboka tau nyenyetwa. Komufala Kashihakumwa ota ti wo kutya, kuyo okwe yile aakwashigwana ta ya nyenyeta onkalo yuutuntu wopOnethindi. Taya ti kawu li nawa na kapuna we omadhidhiliko giihwapo. ‘ Nako hoka onda li nda tuma ko Aanambelewa yandje yEtonatelo lyOondjila, ya ka konaakone oshinima shoka, noya lopota kutya omalongekidho gaampoka, kage li nawa shili kwali nopethimbo ndika otu li moonkundathana nAanambelewa yOshikondo shOondjila ya longekidhe po nawa puutuntu mpoka. Naamboka wokOshikuku ngele osho wu li, waa na omadhildhiliko giihwapo, otatu ka popya nayo ye ga tule po meendelelo ngashi tashi vulika, oshoka ngele kagepo nena otashi eta iiponga nomaso ngashi sha eta nale oshiponga sheso lyokanona taka popiwa,’ Komufala Kashihakumwa ta ti ngawo.