Ondjila ya Kongo yositofa ya ninga yoteya ngashingeyi

ONDJILA yositofa yopokati kEenhana nOkongo mOshitopolwa sha Hangwena nopokati kOkongo na Nkurenkuru noRundu osho ya tungululwa ndele tayi tulwa oteya noya egululwa pambelelwa kOmupresidende Hifikepunye Pohamba mEtyitano lyoshiwike sha zi ko, sha ningilwa pOkongo.

Otaku tiwa kutya oya tungululwa nokutulwa oteya noshimaliwa shithike poomiliona omathele gahetatu (N$800million) nasha. Yimwe zi mEpangelo ya Namibia omanga yimwe ya zi kEpangelo lya Japan okupitila mEhangano Ekwatheli lya Japan lyedhina Japanese International Cooperation Agency (JICA).Omupresidende Pohamba ngoka a li a ende pamwe na Efolo lye meme Penehupifo Pohamba, okwa li wo a ende pamwe nOmupevikuluntuminista, Marco Hausiku, ongundu onene yooministeli oonkuluntu nooshona, Iilyo yOmitumba dhOpashigwana mwa kwatelwa naambyoka yoongundu dhOmpilameno ngashi Elenga enene lyaaDamara tatekulu Chief Justus Garoeb noshowo Oshilyo shOmutumba gwOpashigwana me Clara Gowases. Oshituthi tashi kalwa wo koogavena yiitopolwa ngashi shoka sha Hangwena tate Usko Nghaamwa nosha Kavango tate Maurus Nekaro, ookansela dhiitopolwa nodhoondoolopa, Aaleli yopamuthigululwakalo taya kwatelwa komeho kOhamba yAukwanyama meekulu Martha Mwadinomho Nelumbu, aalelei yopambepo, aanangeshefa, aagundjuka naanona, ayehe ya za kIitopolwa yi ili noyi ili ya Namibia, ye ya okutala kutya oshoshili, ondjila yostofa ya Kongo osho ya tulwa oteya. Aantu oya kala taya ligola ya pandula ondjila yawo yoteya ndjika. Taya ti, ‘ Iyaloo, twa za muupyakadhi wondjila ombwinayi ya Kongo nEenhana nOkongo noRundu. Tangi tangi unene kEpangelo lyetu lye tu longela uuwanawa,’ Taya ti ngawo nolupandu olunene. Epangelo lya Japan olya li lya kalelwa po kOmukalelipo gwalyo moNamibia omusamane Hiro Shi Kikawa gwEhangano Ekwatheli lyokuJapan lyedhina Japanese International Cooperation Agency (JICA).Mokupopitha oshigwana nokweegulula ondjila ndjoka pambelewa noshwo sho a egululile Osasiona yOlutenda Poshikango ndjoka ya lukilwa Omusita Theophelus Hamutumbangela nolutenda lwolwene okuza kOndangwa okuya kOshikango, Omupresidende Pohamba, ngoka wo naye a li ta monika a nyanyukwa nokwapandula wo noonkondo, okwa lombwele engathithi enene ndyoka lya li mpoka kutya okwa pandula nomwenyo gwe ogu uvite nawa sho ta egulula ondjila ndjika, yokuza koRundu tayi piti mOnkurenkuru nokuya mOkongo sigo omElundu moka ya kwatathana naandjoka onkulu ya za mElundu okuya kEenhana, Ondobe sigo okOnhuno. Ta ti okwa nyanyukithwa wo unene kekalepo lyAawiliki nIilyo yoonkundu dhoompialameno moshinima shika sheegululo lyondjila ndjika pambelewa kuye. Ta ti shoka osho naanaa oshiwanawa Aanamibia ayehe, kutya nee oyoongundu dhoompilameno taye ya pamwe naamboka yongundu tayi pangele ndele taya tyapula pamwe nopaumwayinathana iituthi iinene yoprojeka dhoshigwana ashihe sha Namibia. Omupresidende Pohamba ta ti, otashi vulika yamwe yomaaleli yoongundu dhoopolotika, taya ti kutya keegululo ndika itaye ya ko molwashoka oshituthi sdhoSwapo.’Shoka hasho nande. oshituthi shika oshoshigwana aashishe sha Namibia kutya nee owa gama kongundu yini,’ Omupresidende Pohamba ta ti ngawo. Omuperesidene Pohamba ta ti kutya nashi kale sha uvika ko ku kehe gumwe kutya, Epangelo lya Namibia kali shi lyomuntu gumwe nenge lyongundu yontumba yopapolotika, ihe Epangelo lyAanamibia ayehe, kutya nee ogweitaalo lini, ogwolwaala luni nenge ogwongudnu yopolotika yini. Ta ti wo kutya ooprojeka dhepangelo kadhi sho dhomuntu gwontumba nenge dhongundu yontumba, ihe odhoshigwana, kutya nee ogwolwaala luni, ogweitaalo lini nenge ogwongundu yini. ‘ Onda hala ndi lombwele nokwiindila nda mana mo oshigwana sha Namibia shi kale shi li kumwe. Sho nda li omunona, opwa li pu na etondathano pokati kiilyo yoongeleka dha yooloka moNamibia muka, ashike ngashiingeyi pokati kiilyo yongeleka ndhika ito yi po. Ayehe oye holathane.