Ekandjo a indila iilyo yo Swapo naaNamibia ayehe ya kale kumwe

PETHIMBO ta popitha oshigongi oshinene shoSwapo pEenhana mOukwanyama moshitopolwa sha Hangwena mOlyomakaya ga zi ko, amushanga gwomauyelele niinyanyangidhwa gwoSwapo, Jerry Ekandjo, ngoka wo e li Oministeli yOmalelo gIitopolwa, Omagumbo nEyokomeho lyokOmikunda, okwa indile koshigwana ashihe sha Namibia shi kale kumwe niilyo yo Swapo yi longele kumwe omoluuwanawa waantu yaNamibia.

Ekandjo gumwe gwaa ulikwa yatatu mboka taya thigathanapo omolwa oshipundi shuupeviperesidende woSwapo okwa indile koshigwana sha Namibia shi ikaleke kokule nuukwamuhoko noshowo shi ikaleke kokule nendjoino lyoongundu dhoopolotika dha kankamekelwa muukwamuhoko.Ekandjo, ngoka wo a egulula ombelewa yoshikandjohogololo sha Ngenga pOngenga mOlyomakaya tuu ngoka ga zi ko nokupopitha wo oshigongi oshinene mOshakati mOsoondaha ya zi ko noshowo oshigongi shaaleli yoSwapo mOmusati pOutapi mOmbalantu Omaandaha goshiwike shika, okwa indile oshigwana oshigundjuka shi ilonge sha mana mo opo shi vule okulonga mo nawa oonzo dha Namibia dhi kwathele meyambulopo lyEmona lyoshilongo opo oshigwana sha Namibia shi ya mbapale koonzo dhasho, shi vulithe sho shi li moluhepo olunene pethimbo ndika nonando shi na oonzo dha gwana, ndhoka pethimbo ndika itadhi vulu okulongwa mo molwashoka oshigwana inashi longwa nawa natango.Kombinga yuukumwe, Ekandjo okwa ti ngeyi; ‘ Aanamibia tu kaleni tu neni uukumwe wumwe, ngashi twa kala mekondjelomanguluko lyoshilongo shetu pawiliko lyoSwapo yetweni ndjoka ya kondja nokumangulula oshilongo shika. Ngashiingeyi otwa manguluka notu na nee okwi itula mo mokutunga oshilongo shetu sha manguluka. Opo tu vule oku kala tatu, tungu Namibia, natu kalekeni po ongundu yetweni yoSwapo ya kola. Yi na omidhi dha kola, oshoka omuti, itagu vulu okukala po ngele kagu na omidhi dha kola,’ Ekandjo ta ti ngawo nokugwedha po ta ti ongundu nayi kale ya tungwa po noya kolekwa nawa komidhi dhayo, ano komawiliko gokomikunda hoka, koosectiona, koobrancha nokoodistricta hoka.