Ombelewa yapelesidente oya tambula ko elishangifo lehangno lovanailonga voikundaneki

Omupopiliko wapelesidente Alfredo Hengari okwa popya kutya elishangifo lopambelewa lehangano lovanailonga voikundaneki laNamibia onghatu ya yuka mondjila i li nawa keyambulepo lokulopota kwoikundaneki kwopamufika nokwa yuka.

Oshinima eshi oshe ya konima ehangano ledina Namibia Media Professionals Union (Nampu) le lishangifa pambelewa li ninge ehangano lovanailonga Omaandaxa, sha landula okukondjifa oule weedula nhee.

Elinyolifo eli ole ya yoo oshita noumbada woshilongo tashi kanifa ondodo yasho memanguluko lokukundaneka.

“Ohatu pandula ovanailonga voikundaneki molwonghatu ei ya fimana mondjila yetu yemanguluko loikundaneki,” Osho a ti ngaho.

Ombewa yaNamibia yapelesidente oya litula mo memanguluko loikundaneki nosho yo memanguluko lokupopya omaliudo etu ngaashi tashi popiwa mekotamhango, Hengari osho a ti ngaho.

“Moshinima eshi, pelesidente Nangolo Mbumba ota twikile nokukwatela komesho nokunghonopeka eenghendabala doshilongo shetu memanguluko loikundaneki,” Hengari osho a weda po ngaho.

Ehangano loNMT Media Foundation ola tambula ko elinyolifo loNampu ongewede po komahangno oo taa kwatele komesho emanguluko loikundaneki, unene ngaa omaufemba a pamba oilonga neenghalo doilonga ovatoolinghundana vaNamibia.

“Ngaashi shito, elitulemo letu otali wilikwa komilandu doWindhoek Declaration dokuyambula po okukunadneka kwa manguluka nokwe lifikamena po, oyo tai pula kutotwe omahangano ovatoolinghundana muAfrica alishe,” Omukulunhuwiliki Zoe Titus osho a ti ngaho.

Eshi otashi ulike efimano leeveta doikundaneki yopashiwana noilonga odo tadi wilike nokunghonopeka omahangano oo e lile po oikundaneki aamene nokuyambula po emanguluko loikundaneki nawa, osho a weda po ngaho.

Omutoolinghundana mukulu Gwen Lister okwa ti omanga sha pula eedula dihapu, paife oshiwa neenghono eshi Nampu e lishangifa.

“Eshi otashi ka yandja lela emanguluko lakula kovatoolinghundana vaNamibia notashi va vatele va kundafane eendjabi di li xwepo, omakwashilipaleko oundjolowele nosho yo omauwa akwao, omanga natango tashi xwepopaleke eenghalo doilonga.

“Aishe ei otai eta oilonga iwa moikondo ihapu ya fimana osho tashi vatele yo nomeembelewa deenghundana nosho yo ongushu yeenghundana odo da pumbiwa koshiwana,” Lister osho a ti ngaho Omaandaxa.

Omukonakoni woibofa yoikundaneki John Nakuta okwa ti oshinima eshi omaano oChrismas ovanailonga voikundaneki.
“Omahalelo yambeko kwaavo va fininika nokupula opo ehangano lishangifwe,” Nakuta osho a ti ngaho.

Oshilyo shimwe shomovatoti vehangano Johanathan Beukes osha ti elishangifo eli ola hala kutya ovanailonga voikundaneki otava dulu okuluunganeka opo va xwepopaleke onghalo yavo yoilonga nokupula emanguluko lokundaneki, nosho yo etulomoilonga loveta yokumona ouyelele, oyo ehangano la kala nokuninga nale.

“Omanga fye, ongovanyanyangidi, hatu futwa nawa, eshonopeko lomongulu eenghundana otali etwa kokuhafutwa nawa kwovatoolinghundana naluhapu ohava taalela omaudjuu mokulonga oilonga yavo.”

Beukes okwa ti oshinima eshi shipe otashi nghonopaleke oshoongalele shovanyanyangidi, opo yoo nasho shi tameke okuweda ko kwaasho ehangano tali ningi kombinga yoikumungu oyo tai kumu oikundaneki nosho yoo oshiwana.

“Tangi unene kovatoolinghundana ovo va longa noudiinini opo va kwashilipaleke kutya ehangano ola nyolifwa konima oministili yoilonga ya kala nokundana opolitika nelinyolifo oule wefimbo lile.”

Beukes okwa popya yoo vali kombinga yondodo yoshilongo yemanguluko loikundaneki oyo ya shuna pedu, etulopedu moilonga lomunyanyangidi wehangano lokwaandjakaneka omawi momhepo laNamibia Anna Nicodemus, nosho yo onghendabala ya dopa yokuninga omukwashiwana omunyanyakidi woNew Era.

“Osha ninga efimbo liwa opo oikundaneki moshilongo omu i tameke okudimbulukwa omaupyakadi oo twa taalela nokwaakandula po,” Osho a weda po ngaho.

Momukanda wokoikundaneki wa sholwa Omaandaxa, Nampu okwa koleka kutya okwa mona ondjapo ongehangano lovanailonga okudja kombelewa yoinima yap amba oilonga.

“Eshi osha landula eedula nhee dokulwa opo tu tambulwe ko nokukala inatu pitikwa tu kalele po oufemba woilyo yetu,” Nampu osho a ti ngaho.
Ehangano natango ola koleka kutya okwa li pu na oilonga ihapu.

“Nampu okwa li a totwa muNovemba 2020 nelalakano lokwaamena ovanailonga voikundaneki vaha monifwe oixuna nokulonga momidingonoko inadi yuka, shaashi ovanailonga vetu otava twikile nokulonga vehe na omaudanafanoilonga nokuningilwa omahepo moilonga,” Nampu osho a ti ngaho.