… Mbela natu tameke okutula oimaliwayetu koshi yomatalashe
Minista womaudanao, ovanyasha nomayakulo oshiwana Agnes Tjongarero okwa ti ovafuf ove mu vaka oshimaliwa shi fike poN$711 200 koimaliwa yaye yopaumwene oyo a tuvikila.
Mutu osha ninga efimbo lokushuna konghulu yonale yokuholeka oimaliwa koshi yetalashe, osho a ti ngaho.
Omuyakauli waTjongarero wopaumwene, Jennifer Gomuses,vati okwa li a kengelelwa oshimaliwa shi fike poN$18 500.
“Mutu otwa pumbwa okutameka okutula oimaliwa yetu koshi yomatalashe, omukalo ukulu.
Oimaliwa ei oyange kwa li nde i tuvikila ndee onde i kanifa. Oshitilifa nai notashi dulu okuningilwa keshe umwe,” Minista osho a ti Omaandaxa.
Tjongarero okwa waimina omusholondodo woominista ovo va kala nokukengelelwa moule weedula nhatu da pita, mwa kwatelwa nomuprima minista Saara Kuugongelwa-Amadhila (N$159 000), minsta wetanga leameno noipambele yoonakulwa vakulu Frans Kapofi (N$200 000) naminista mukulu woshimaliwa Calle Schlettwein.
Opolifi nayo vati oya kala tai ungaunga noibofa ya kwatela mo ovakwashiwana noya dopa okukwatela mo omauyelele aa molopota yopolifi.
Tjongarero Omaandaxa okwa ti oshiningwanima eshi osha kwatela mo okuponokela ombaanga yaye yoFirst National Bank (FNB) pamalungula momafiku 18 Novemba.
“Osha nyika oshiponga eshi ovanhu tava kengelelwa, ashike ombaanga oya fa ihe na eshi tai ningi po opo i mone ovafeekelwa omanga ovayakulwa tava kanifa oimaliwa yavo aishe oyo va tuvikila. Oshii neenghono,” Osho a ti ngaho.
Minista okwa ti omufeekelwa okwe ya kuye ta ti okwa hala okumuvatela nokakalata kaye kombaanga.
“Omunhu okwe ya nehokololo loukalata, a hala okuvatela nge nokakalata kange kombaanga,” Tjongarero osho a ti ngaho.
Ke shi shi naana ngee oshinima eshi osha kwatakana nomauyelele oo e li vakelwa aTelecom, osho a ti ngaho.
“Oshiningwanima shange osha ningwa manga Telecom ina popya, ndee kandi shi shi nee ngee oya kwatakana,” Osho a ti ngaho.
Minista okwa ti ombaanga inai ninga po sha naana mokuvatela i mone omufeekelwa.
Tjongarero okwa ti omufeekelwa ina monika natango yee ina mangwa po.
“Opolifi otai lombwele nge ashike kutya oye lipyakidila natango nomakonakono nokapu na nande omunhu a mangwa po natango,” Osho a ti ngaho.
Oministili muFebuluali okwa li ya pitifa omukanda i londode Ovanamibia kombinga yovafufi tava ti ovanambelewa voministili.
“Ovafufi ohava tula efano laminista Agnes Tjongarero komalungula ndee tava ti otava pukulula ovanhu paumbudi va ninge omaindilo opamalungula va mone oshimaliwa shokuyambula po ovanyasha,” Omukanda osho wa ti ngaho.
OMANYAMUKULO
OKUDJA KOFNB
Omunambelewa omukulunhu koshikondo shomangeshefelo shaFNB Tracy Eagles Etivali okwa ti ombaanga oyaanya okutya ko sha koshibofa shaTjongarero.
“Itatu dulu okutya ko sha komakonakono ekengelelo lomuyakulwa molwomaukwatya opaumwene ombaanga,” Osho a ti ngaho.
Omukanda oo wa pitifwa koFNB Namibia Etivali owa ti, omukulunhu woinima ya pamba oilonga Tjirimuje Raseuatjo okwa ti ombaanga oya didilika omakengelelo taa i pombada.
“Pefimbo lomatango manene ovafufi opo unene hava ningi vahapu, va tana ovayakaulwa ovo inava tonata,” Osho a ti ngaho.
ELONGIFO LOUNGOBA
Omunawino woinima ya pamba eameno lopamalungula Nrupesh Soni okwa ti ovanamadina nava konge omukalo uwa wokuungaunga neameno lopamalungula, tava tameke nokwaamena eembanga davo nawa.
Soni okwa ti eembanga nadi tameke okulongifa osystema yokumona mo oinima ya nyika oumbudi pakulongifa oungoba.
“Eembaanga dihapu natango ode lineekela ashike momikalo dikulu, ngaashi odo doutumwalaka vopangodi ve na oshipatululo,” Osho a ti ngaho.
OVAKENGELELWA
Momudo 2022, minista weeshi noinima yomefuta Derek Klazen okwa li a londoda oshiwana kombinga yovafufi va tana ovanapolitika.
“Otava dengele ovanhu, tava ti edina lange oDerek Lazen nondi na oupyakadi ou naawinya nohauto yange oya teka paife.
Oto dulu u vatele nge u tumine nge oshimaliwa shi fike poN$2 000, N$5 000?.
“Oo omatumwalaka taa endaenda oo . . . “
Ovafufi vamwe otava dengele ovanapolitika payukililo.
“Omulumenhu okwa pula nge oshipatululo shange ndee ta pula ndi ye mombaanga yange, okwa tumina nge nee onomola yoshipatululo, oyo a pula opo ndi i mu tumine,” Omuprima minista Saara Kugongelwa-Amadhila osho a ti ngaho mehokololo laye olo a yandja kopolifi.
Minista mukulu woshimaliwa okwa li a kengelelwa oshimaliwa shi fike poN$159 000.
Minista mukwao mukulu woshimaliwa, Calle Schlettwein, okwa li a kengelelwa omayovi onumba omwedi wa dja ko. Oshivike eshi okwaanya okupopya kutya okwa kengelewa oshimaliwa shi fike peni.
Eedula mbali da pita, minista wetanga leameno noipambele yoonakulwa vakulu Frans Kapofi okwa li a kengelelwa oshimaliwa shi fike poN$200 000 komunhu oo kwa li ta ti omunambelewa woStandard Bank.
Omupopiliko wopolifi wopashiwana omupedu komufala Kauna Shikwambi okwa ti oiningwanima yomakengelelo otai linyenge keshe efiku.
“Ohatu longo oshiwana opo shi kale sha kotoka ndee ovo itave liufa kwaasho otava ningi oihakanwa,” Osho a ti ngaho.
“Efimbo limwe ovanhu inava hala okuyolwa, sho osho inava hala okutula mo oibofa ngee va kengelelwa, ashike ohatu pula oshiwana opo shi lopote oinima i li ngaha nokukala itashi yandje omauyelele asho opaumwene kovanhu,” Osho a ti ngaho.
Kombinga yoibofa yovanenenhu inai lombwelwa oikundaneki, Shikwambi okwa ti kashi shi oupyakadi woshiwana osho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
