Ehangano lovayandji voilonga laNamibia ledina Namibian Employers Federation (NEF) otali kondjifa opo etulomoilonga londodo yeendjabi dopashiwana li undulilwe komesho, shaashi paife otashi tameke mefiku lotete laJanuali 2025.
Ewilikongudu leendjabi okwa li la pula kuyandjwe odula konima kwa li kwa shiififwa pambelewa kutya omunhu ngee ota mono oshimaliwa shishona movili na mone N$18 petameko lomudo ou.
Ashike nee, oNEF otai ti kutya oikondo imwe otai ka pumbwa efimbo lihapu opo i kwashilipaleke elunduluko li li pamufika.
“NEF ota yambidida lela omulandu ou u na sha neendjabi wopashiwa.
Ashike nee, okutula moilonga meendelelo inaku yandjwa efimbo la wana otaku ka etela eengeshefa omaupyakadi, unene moikondo oyo tai mono oixuna,” Omupelesidente woNEF Elia Shikongo osho a ti ngaho Etitatu.
“Omulandu ou hatu pula otau kwashilipaleke eendjabi diwa omanga hatu yandje efimbo nomhito kovayandji voilonga olo va pumbwa opo va longe mo oinima aishe ya pumbiwa. Oshinima eshi otashi lalakanene okwaamena eemhito doilonga omanga taku xwaxwamekwa onghalonawa yovanailonga pamukalo uwa,” Shikongo osho a ti ngaho.
Ehangano loNEF ola yandja nee omukanda kuminista woinima ya pamba oilonga Utoni Nujoma, tau pula yoo vali newedelo lefimbo la wedwa po opo kutulwe oshinima eshi moilonga, osho tashi ka vatela oikondo imwe iha ye moupyakadi woshimaliwa, ngaashi ounamapya nounaimuna, eengeshefa, eameno, eengeshefa doikulya nosho yo oilonga yomomaumbo.
Koshi yefaneko eli, oikondo oyo i li xwepo otai tameke okutula moilonga eendjabi odo tadi pulwa diva, omanga oikondo oyo tai mono oixuna tai pewa fiyo omulotete laJanuali 2027 opo i dule okuwanifa po oinima aishe oyo tai pulwa.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
