Eenamanana nadi kandulwe po neenghundafana,ha neendjebo – Kapofi koshikumungu shaDRC

Minista wetanga leameno Frans Kapofi okwa ti omakulukuto oo e li pokati koDemocratic Republic of Congo (DRC) otaa dulu ashike okukandulwa po peenghundafana ndee kashi shi nande pakulongifa eendjebo.

Kapofi okwa li ta amene etokolo loshilongo lokuhatuma ovakwaita koDRC, ta ti ongudu yoilongo yomayambulepo okombuwanhu waAfrica otai dulu okuungaunga noshinima eshi nawa.

“Otwa itavela kutya opolitika nai kandulwe po kopolitika ndee hapa kulongifa eendjebo ile omukalo woimbuluma. Onghee nee, otwa tokola kutya kapu na omumbwe opo tu tume omatanga etu koDRC. Ashike eshi itashi ti itatu yambidida DRC mokweeta ombili nelandulafano okupitila moinima ya yooloka.

Kapofi okwa itavela kutya omatanfga okudja koilongo ikwao moDRC otaa dulu okuyandja omayambido oo a pumbiwa nokwa pula opo ku ningwe eenghundafana pokati keengudu odo da kwatelwa moshinima omu medina lovakwashiwana vaDRC noshitopolwa ashishe.

“Ovo tava kendabala okutya etokolo lepangelo ka liwa: Namibia okwa kufile nale ombinga mombili yaDRC eshi kwa li a tuma ovakwaita vaye nota twikile nokushininga ngee sha pumbiwa,” Osho a ti ngaho.

Oshoongalele shoSADC okwa li sha ningwa moZimbabwe oshivike sha dja ko opo ku kundafanwe omakulukuto oo e li po, nomunashipundi Emmerson Mnangagwa ta kelele oimbuluma nokuholola eenghendabala doshitopolwa mokukandula po oupyakadi ou.

Charles Mubita, nakulwa mukulu wovakwaita voSwapo, etokolo lokutwala ovakwaita koDRC ola ningwa keengudu deameno doSADC odo di lile po okuxwaxwameka ombili neameno moshitopolwa. Mubita oilongo oyo i na ovakwaita ve li paife moDRC otashi dulika oyo yo opo tai yam o ile tai di mo mongudu yoilongo ei.

Okwa ti kutya okwa itavela kutya Namibia okwa kala alushe nokukufa ombinga moinima yoSADC nosho yo omahangano akwao opaunyuni omo ha kufa ombinga. Eshi osha kwatela mo okuyandja kovakalelipo vombili.

Pakuweda po, okwa ti kutya okutuma ovakwaita voSADC otaku popilwa komulandu wokulongela kumwe mokuliamena neenghatu odo da popiwa momilandu doSADC. Omupelesidente wongudu yoPopular Democratic Movement (PDM) McHenry Venaani okwa lundila Rwanda kutya vati ota yambidida ongudu yoMarch 23 Movember (M23) moDRC shi na sha noukwamuhoko.

Okwa ti kutya Rwanda na kalekwe omutumba ndee ta lombwelwa kutya ita dulu okuxwepopeka onghalo moshitopolwa nomukalo u li ngaho.
“Rwanda okwa puka pakulongifa pakutala keeveta dihapu dopaiwana.

Etomheno loM23 tai amenwa kuRwanda omolwashike oukwamuhoko oo tau danwa nokudinika Kepangelo laDRC,” Venaani osho a ti ngaho.

Okwa weda po kutya ngee ovanhu tava fininikwa otava dulu okutameka okuninga oimbuluma. Venaani okwa pula eembinga adishe da kwatelwa moshinima omu nadi konge omukalo uwa wokuungaunga noshinima eshi.

“Omananafano oo e li moDRC taa kakeke efano laAfrika, osho tashi ulike elelo la nghundipala nokufiyako vamwe ngee tashi ya kombinga yeliko loshilongo osho hashi eta omananafano e li ngaho.

Omaliko oshilongo naa tukulilafanwe shi fike pamwe kovakwashiwana.
Etokolo laNamibia lokutuma ile lokuhatuma ovakwaita ola etwa koshoongalele shoSADC,” Osho a ti ngaho.

Oshilyo shopaliamente shongudu yoRally for Democracy and Progress Kennedy Shekupakela okwa ti Namibia ne uye tete poshitaafula ndee ta kundafana kombinga yombili neameno manga ina tokola okutuma ovakwaita.

“Okutuma ovakwaita nashi kale oshinima shaxuuninwa. Shaashi onghalo yopaife moDRC oya kula, otwa pumbwa okwiitala nawa manga inatu ninga etokolo lasha,” Osho a ti ngaho.
Omukalelipo waNamibia mukulu Pius Dunaiski okwa ti SADC okwa hanga eudafano kombinga yoshimaliwa nomauwa yelidopemo lomatanga eameno moDRC.

“Eshi osha etwa kekufombinga laNamibia moita itivali yaCongo momudo 1998. Oye tu tula moupyakadi wopaliko nopapolitika; otashi tula omikundu inadi pumbiwa momaliko ashona naao ee li nawa.”

Okwa ti ekufombinga eli otali tula ashike etanga leameno laNamibia moudjuu. “Pamaliudo ange mwene, keshe etokolo lopaukwaita nali kundafanwe nawa mopaliamente. Ekufombinga nali longele pamwe nomilandu detu dopashiwan nodomoshilongo, ngaashi sha popiwa kovatotiveta vetu nosho yo keemhat dopashiwana,” Osho a ti ngaho.