Omunailonga woNBC otashi dulika a ka kufwe moilonga eshi a ula Netumbo Nandi-Ndaitwah a kulupa

Omudindi woinima ya pamba omakonakono wehangano lokwaandjakaneka omawi momhepo laNamibia ledina Namibia Broadcasting Corporation (NBC) Anna Nicodemus okwa teelela a kufwe moilonga ile a pewe elondodo laxuuninwa konima eshi a monika e na ondjo moibofa itatu.

Oibofa ei oya dja momapulaapulo oo Nicodemus a ningile noradio yomudidimbe yeenghundana yaSouth Africa yedina Newzroom Afrika odula ya dja ko muDesemba kombinga youkolele womuhoololwa presidente Netumbo Nandi-Ndaitwah.

Okwa monika ondjo eshi ina landula eeveta, omilandu nomalombwelo oshikondo sho ha longele.

Oshibofa shimwe otashi ti omapopyo aNicodemus kee na oukwashili, otaa feekele nokwa kwatela mo omaliudo aye mwene.

Natango ota tamanekelwa vali oshibofa shokutongola ovakainhu sha landula epopyo laye kombinga yeedula noundjolowele waNandi-Ndaitwah.

Eshi osha dja moihokolola oyo kwa li ya ningwa momafiku 23 Januali pokati kehangano lokwaandjakaneka omawi momhepo lopashiwana naNicodemus.

Oihokolola ei okwa li ya kwatelwa komesho kuJaime Smith.

“Omunailonga ou ta feekelwa okwa kala nokutamanekelwa oibofa ya yooloka yokuhalandu omilandu dehangano nokuhalandula omalombwelo ehangano shaashi okwa ninga omapulaapulo noNewzroom Africa, osho ehangano li wete kutya okwa li e na okulopota omanga inashi ningwa, nosho yo oinima oyo a ula presidente ihe li pambelewa nokai na oukwashili,” Smith osho a ti ngaho.

Daniel Nadunya okwa li a kalela po Nicodemus.

KE NA ONDJO

Nicodemus kakwa li a monika ondjo eshi ina lopota eenghundafana odo kovakomesho vaye.

Natango Nicodemus kakwa li a monika ondjo eshi ine liumbata nawa a yandje oshiholelwa ndee te liumbata pambelewa, shaashi NBC ina yandja oumbangi wa wana u yambidide omalundilo aa.

Smith okwa ti oibofa yaNicodemus otai dulu okumukufifa moilonga” “Moinima i li ngaha ohandi dulu okutya eshi otashi dulu okweeta okukufwa moilonga, unene ngaa shaashi ke wete ngee okwa ninga epuko.

“Ashike nee, molwondjokonona yaye ile oyo iwa yoilonga, ohandi ti shapo na pewe ashike elondodo laxuuninwa lopamushangwa molwoibofa oyo,” Smith osho a ti ngaho.

Smith okwa ti naku talike kutya Nicodemus okwa longa koNBC eedula 29 noku li omunawino.

“Oku li umwe womongudu yokutalulula omilandu. Omukulunhuwiliki nokwa pumbwa okuyandja oshiholelwa. Omunhu wondjokonona i li ngaho okwa teelelika a kale e udite ko nokukala e shi shi kutya omikalo edi inadi tambulwa ko,” Osho a ti ngaho.

Ashike nee, Nicodemus okwa ti omapopyo aye okwa li e likolelela kouyelele oo u li keshe pamwe moshiwana novatoolinghundana vakwao moNBC ova kufa ombinga meenghundafana da faafana ashike inava tulwa nande momutumba.

Nicodemus okwa li a tulwa pedu muDesemba konima yeenghundafana daye odo a ninga noNewzroom Africa.
Okwa ti kutya ouyelele ou a yandja kombinga yoipundi yomopaliamente okwa li u li mondjila kuye noundjolowele waNandi-Ndaitwah okwa li ouyelele u li wetikile.

“Okwa ti vali yee nomuhoololwa presidente ookaume nokwe mu fimaneka neenghono nokakwa li nande a hala okuulika okatongotongo nandenande,” Omikanda domutumba osho da ti ngaho.

Nicodemus okwa ti opu na ovanailomnga vakwao vamwe ovo va li va popya noBotswana radio ashike kakwa li nande va katukilwa onghatu ya fa oyo a kufilwa.

“Vati okwa lombwela kaume kaye oo a longekida eenghundafana edi kutya ote shi ningi kuye mwene nokakwa li a uda kutya eshi a popiwa momhepo okwa tiwa ngahelipi.

Eshi kwa li ta ningilwa omakonakono okwa ti oilonga yaye pomahoololo okwa li okuyandja oyelele kombinga yomalilongekido omahoololo nonghee nee kakwa li e li lela kombinga yopolitika,” Omukanda osho wa ti ngaho.

Nicodemus pefimbo loihokolola, okwa ti okwa li a pulwa koNewzroom opo a popye nayo konima mutu yominute di li o20 omanga kwa li inashi tulwa momhepo.

Okwa ti oku na ekwatafano lopailonga novanailonga vamwe voNewzroom Africa ndee ongomutoolinghundana kakwa li e wete ngee osha puka okuninga osho kwa li a ningilwa yoo pefimbo lomahoololo aSouth Africa, onghee nee okwa kufa ombinga ina lombwela nande omunhu umwe.

EHANGANO LOVANAILONGA OLA TYA KO SHA

Hamushandjai ta vatelele wehangano laNamibia lovatoolinghundana ledina Namibia Media Professionals Union (Nampu) Jemima Beukes okwa ti eenghatu odo da kufilwa Nicodemus oda yuka. “Inatu vakelwa ko komilandu doihokolola yaNBC.

Ashike, pakutala keedula daNicodemu domayakulo di li 29, elitulemo laye naashi kutya okwa kufa ombinga mondjokonona yaNBC, keshe onghatu oyo ta kufilwa nai kale ya yuka noya yeleka.”

Beukes okwa ti Nampu oku na okwaamena oilyo yaye nokuninga osho tashi wapalele.

“Ohatu pula oilyo yetu opo i li longele ko oshihongwa kutya omanga tave liufa keeveta dehangano, eeveta odo nadi kale alushe di li pamwe nekotamhango laNamibia.

Eshi osha kwatela mo oufemba wemanguluko lokupopya eshi wa hala nomaliudo oye mwene,” Osho a ti ngaho.

Ehangano loNMT Media Foundation odula ya dja ko ola ti, oinima oyo Nicodemus a popila omuhoololwa presidente kaya li yoshili okwa li ya ndulukwa paundindoli.

Ehangano okwa li la denga omufindo kefimano louyuki wokukundaneka, tali pula ovanailonga voikundaneki opo va yambule po ondodo i li nawa yoilonga kombinga youyelele uhe li mondjila wokombinga yomahoololo.

NMT okwa pula ovatoolinghundana vaNamibia opo ve liufe komikalo nokomaliumbato awa okukundaneka, oo taa lalakanene okukwashilipaleka kutya oshiwana otashi mono ouyelele u li mondjila nomauyelele a talululwa oku longifwa mokuninga omatokolo omondjila.

“Okuyandja omauyelele apuka itaku pukifa ashike oshiwana, ashike natango okwa nyika oshiponga koudemokoli wetu nokemanguluko loikundaneki,” Ehangano osho la ti ngaho.

Nandi-Ndaitwah odula ya dja okwa ti kutya ka li nande e udite nai noundjolowele waye okwa li u li nawa. Mokavidio kaNBC, Nandi-Ndaitwah okwa ti “Omunamibia” okwa ti vati okwe lidenga po luvali.

Nandi-Ndaitwah okwa li ta popi pefimbo loshituvityapulo shoSwapo koSam Nujoma Stadium mOvenduka.

“Ohoni ngahelipi! Eshi kashi shi sha ndee omaliumbato ashike omunapolitika a lulilwa,” Osho a ti ngaho.

“Nandi kufe omhito ei opo ndi mu kwashilipaleke amushe kombinga yelitulemo lange lokuwanifa po omaudaneko oo nda ninga pefimbo loikonga.”