Swapo okwa ungaunga nomhito youpedupresidente epuko – ovandjadjukununi

Omundjadjukununi woikwapolitika Henning Melber okwa ti Swapo okwe litula moudjuu yee mwene okudja ngaa “pokudanena” omilandu di li mondjila dokuhandeka eemhito mongudu ta longifa omahoololo e li mondjila.

Omapopyo aye okwa landula omalimbililo kombinga yaau ta kufa po omhito youpedu presidente oyo ya fiwa po kuNetumbo Nandi-Ndaitwah, oo a ninga presidente wongudu mexuliloshivike.

Oshikumungu kombinga yaau tashi kula ko osha kala nokuundulilwa komesho; ongudu mutima yoSwapo oya tokola opo omhito i kale ihe na omunhu manga fiyo omomudo 2027.

Melber okwa pataneka etokolo eli, ndee ta ti oshinima eshi osha ya fiyo opomhito tashi monika ashike sha fa shomukainhu umwe taa menwa komukainhu mukwao – hamushandjai Sophia Shaningwa.

Melber okwa ti omaupyakadi aa moSwapo okwa tameka nale momudo 2017, eshi presidente Hifikepunye Pohamba kwa li a yandja oshipundi kwaao e mu shikula, Hage Geingob, “noupu”.

“Okudja ashike opo, elongifo loukahanyamukulwa ola tameka okuya pombada nomalipopilo okukelela omatopakafano pokati keengudu mbali delelo. Onghalo ei oya etwa kwaashi,” Osho a ti ngaho.

Melber okwa ti, oidjemo, okwa li oyo ya eta omatopakafano ape oo inaa fimaneka omilandu domeni doudemmokoli doSwapo noya eta okuhena oukumwe mongudu.

“Ekotamhango longudu ola ti eemhito adishe mongudu otadi hadekwa pakuninga omahoololo pefimbo loshoongalele osho hashi hoolola ovaleli veedula nhano.

Kapu na ashike nande etomeno lasha la yuka kutya omolwashike oshinima eshi itashi landulwa ile omolwashike omahoololo aa itaa ningwa ngee eemhito dihe na ovanhu,” Osho a ti ngaho.

Melber okwa ti omalundilo oSwapo okwa kuma elineekelo lavo yee okwa hala kutya oku na oudemokoli.

Omupedu hamushandjai woSwapo Uahekua Herunga okwa lombwela oDesert FM Omaandaxa kutya ekotamhango loSwapo nali wilike kutya omhito youpedu presidente otai hadekwa ngahelipi, ndee oshiwana otashi ka lombwelwa ashike konima yonguduwiliki ya yandja omayele ayo kongudu mutima, oyo tai ka ninga etokolo laxuuninwa.

Okwa yeleka kutya Swapo okwa fimaneka eemhango doveta nomilandu di li nawa.

Oshilyo shoSwapo Tobie Aupindi okwa lombwela oDesert FM Etivali kutya omhito ei ihe na omunhu itai eta omatopakafano mongudu, ta ti ongudu “oi li paudemokoli wekotamhango” ya tulwa kumwe “koveta ya shi ya ko” yekotamhango longudu.

Aupindi okwa ti omapenda mongudu oo a hala okukufa ombinga moupedu presidente otaa ka dula okuninga oshinima osho koshoongalele oshokuhoolola ovaleli vongudu osho tashi ka ningwa momudo 2027.