Aahikingalo ya dhimbulukwa Nakale

Omuhikingalo Gazza, gumwe gwomaahikingalo mboka ya gandja esimaneko nomahekeleko kuMarais Sadrag Nakale (ngoka a tseyika koyendji nedhina Nakale yaNakale nenge Sisande), ngoka a mana oondjenda mOsoondaha, mOvenduka, mepipi lyomimvo 60.

Gazza okwa popi kutya: “Nakale okwa li noongalo ndhoka hadhi dhanwa kaakunawe moondingosho. Oongalo dhe aluhe oto dhi uvu momajukujuku momikunda.”

Okwa tongonona Nakale oongomuhikingalo ngoka itoo mu pewa lwaali, nokwa li eholike koyendji kutya nee kali lela ha hwahwameke oongalo dhe kiikundaneki yopankalathano.

“Uuna wa popi naye, oha kala aluhe e na uushili, kutya nee okombinga yoshinima shoka inaa nyanyukilwa oheshi popi,” osho Gazza a popi ngaaka.

Okwa halele aakwanezimo ye oonkondo nomahekeleko pethimbo ndika lyoshikogo oshiluudhe.

Omukwanezimo gwanakusa Nakale, Agnes Sakaria okwa koleke eso lye konzonkundaneki ndjika, nokwa popi kutya okwa hulitha konima sho a kala ta lumbu nuuvu wokankela ethimbo nuule.

“Nakale okwa monika okankela mo2016 nokuza mpoka okwa kala te ehama,” osho Sakaria a popi ngaaka.
Okwa gwedha po kutya Nakale okwa li a zi kegumbo komukunda Ekoka moshitopolwa shaHangwena, okuya koshipangelo shaWindhoek Central, opo a mone epango.

“Okwa li twe mu talelepo mOlyomakaya kongulohi ashike kali nande e li nawa, nokwa li tu wete kutya ngiika pamwe omiti kwa li dhe mu gwilila po,” osho a popi ngaaka.

Okwa tongonona nakusa Nakale ongomuntu ngoka a li omuyolithi nokwa li ha nyanyudha kehe gumwe nomegumbo.
“Oku uka komasiku ge ga hugunina, kali we ha ningi omashendjo ogendji, molwashoka okwa li e na omalimbililo kombinga yonkalo ye yuundjolowele,” osho Sakaria a popi ngaaka.

Tate Buti okwa popi kutya Nakele okwa li “omuntu ngoka ha popi paukililo”.

“Okwa li omuntu omupu okulonga naye, shila oongele we mu ende nayi,” osho a popi ngaaka.
Tate Buti okwa halele aakwanezimo ye oonkondo pethimbo ndika taya lili omukwanezimo gwawo.

Tekla Iita, ngoka a tseyika nawa nedhina Teqla, okwa popi tati: “Okwa li omuyolithi nokwa li e na ontseyo yokwe eta po iinima, ondiwete kutya okwa li omuntu e na onkalo yi ili,” sho Teqla a popi ngaaka.

“Ye naTate Buti oye na iinima oyindji ya faathana, pakutya ngele Tate Buti okwe ku dhengele mu ninge okangalo, iho kala lela wushi kutya otamu ka longa shike,” osho a popi ngaaka.
Teqla okwa gandja omahekeleko koonakuthigwa po.

“Onda hala okugandja omahekeleko kaakwanezimo pethimbo ndika edhigu notandi ya pe omukumo opo ya dhimbulukwe nokutyapula uuwanawa we,” osho a popi ngaaka.

Patrick gwomongundu yaaimbi yedhina PDK, okwa popi kutya Nakale okwa li omuyolithi nokwa li omuntu gwomashendjo.

“Nakale aluhe okwa li ha kala e tu tala ko ongaamwayina ye aashona,” osho Patrick a popi ngaaka.
Okwa popi kutya okwa li hashi kala oshiwanawa okulonga pamwe naNakale.

“Okwa li hatu tyapula okuya mostudio naye, ishewe okwa li ha hala a nyanyukwa,” osho a popi ngaaka.
Patrick okwa popi kutya Nakale okwa li e na omukalo gwi ili gwokuhika oongalo, neso lye otali kala lya thiga mo omwaka moongalo dhomoshilongo.

“Okwa li e na omukalo tagu hokitha gwokuhinga oongalo dhe osho wo etumwalaka ndyoka kwa li ha gandja okupitila moongalo. Onkene eso lye otali kala ekanitho lela enene,” osho a popi ngaaka.