Aahingi yootaxi ya nyanyukilwa iilonga yopate mOmbaye

Omupopiliko gwehangano lyaahingi yootaxi mOmbaye lyedhina Walvis Bay Taxi Association, Onesmus Ndengu, okwa popi kutya oya mbilipalelwa kiilonga yelelo lyondolopa yaMbaye sho lya tula miilonga iilonga yokwoopaleka nokuthitika opate tayi adhika moKuisebmond, ndjoka ya kala tayi nyenyetwa kaahingi yootaxi.

Iilonga yokulongulula opate ndjoka yi li pomatsakaneno gepandaanda lyedhina Volstruis naAgaat Street, oya tamekwa omwedhi nguka nongashingeyi oyi li pokupwa.

Eyopaleko lyopate ndjoka olyi li oshitopolwa shoprojeka yelelo lyondolopa yaMbaye yokuthitika omalambo nokwoopalekulula oopate ndhoka dhi li monkalo ombwinayi momudhingoloko gwondolopa yawo. Aahingi yootaxi numvo oya ningi omahololomadhiladhilo ogendji taya indile elelo lyondolopa li thikame nokulonga oopate ndhoka dha mona iihuna, unene tu momudhingoloko gwaKuisebmond.

“Otashi pupaleke okutala ngashingeyi iilonga yopate ya tameka unene tuu moopate ndhoka tadhi adhika moKuisebmond, ngaashi yepandaanda ndyoka lyaAgaat. Opate ndjoka oya mona iihuna noonkondo omolwomeya ngoka haga kala nokutondoka mopate. Otu wete kutya ngashingeyi omakemo getu ogu uvika, notatu shi pandulile elelo lyondolopa ndyoka lya yamukula mbala. Otushi uvite ko kutya ohashi pula ethimbo osho wo oshimaliwa ashike opate ndjoka yopomatsakaneno okwa li ya mona iihuna noonkondo,” osho Ndengu a popi ngaaka.

Oprojeka yokwoopaleka oopate mOmbaye oya kwatela mo okutula momapandaanda omalupanda goondhopi, sha landula oopate dhimwe ndhoka dha kala hadhi yonagulwa komwaalu gu li pombanda gwiihauto yondjundo ngaashi omaloli.

“Okutula po olupanda lwoondhopi, ohashi kala nawa molwashoka olupanda ndoka ohalu kala po ethimbo ele shi vule opate yoyene ndjoka hayi tulwa po. Olupanda ndoka ohalu vulu wo okwiidhidhimikila oonkalo dhelunduluko lyonkalo yombepo, ngaashi omvula, osho wo okwaatenda omisa. Elelo lyondolopa onkene lyi itula mo mokugandja omayakulo ga hwepopala nonande onkalo yomudhingoloko gwaMbaye kayi shi ompu,” osho omunambelewapopiliko gwelelo lyondolopa ndjoka, Anita Kaihiva a popi ngaaka.