AakwaSwapo oyiipilukila po, Nehova ta ti

AAKWASWAPO,unene tuu aaleli yamo – oyiipilukila po nosha yela kutya yamwe yomaawiliki mopaati ndjika oye na okukatidhwa mo nenge ya ka ze mo kuyo yene sho kaye shi wete we nawa.

Shika osha popiwa koshilyo shongundumutima yo RDP, omusamane Kandy Nehova, pethimbo a li ta popitha oshigongi sgongundu yawo pOnangwe popepi nOndobe mOukwanyama moshitopolwa sha Hangwene meti: 27 Desemba 2008.
Nehova ta ti kutya yo moRDP oye na uuyelele kutya yamwe yomAawiliki yoSwapo, unene tuu yomEwawa lyaanyasha yOswapo oya tameka okufinyaafinya yamwe yomaawiliki yawo yOswapo nedhilaadhilo ya kuthwe iilonga nenge ya tidhwe mo moSwapo, ngashi naanaa sha ningilwa Jesaya Nyamu, Captain Andumba, Abraham Ndumbu nosho tuu.
Omuwiliki mo RDP Nehova ta ti kutya yamwe yomAawiliki aakuluntu moSwapo taya fenywaafenywa ongashi Omuprima Nahas Angula, Oministeli yIilonga Helmuth Angula noshowo Omukalelipo gwa Namibia koBotswana omusamane Hadino Hishongwa, notashi vulika pu nna natango yalwe oyendji.
‘moSwapo shampa ashike to eta mo omadhilaadhilo goombata tadhi tungu, ihe itaga opalele aawiliki yamwe yomOswapo, ngashi unene Omupresidende omukulu Sam Nujoma nokangundu ke, nena oto tamekwa okufinywaafinywa, sigo tashi ya mpoka wu tidhwe mo nokuli mOswapo.
Natse osho twa tamekele tatu gandja uusama kiinima yimwe itayi kwathele oshigwana, notwe kiiyadha tatu finywaafinywa, yo yamwe yomuse ngashi ootate Jesaya Nyamu nOoHandumba mboka taya tidhwaatidhwa mo nokuli mOswapo,’ Nehova ta lombwele aanashigongi sho RDP pOnangwe mpoka ngawo.
Nehova ta ti, oshigwana nashi kale shi shi shi kutya Swapo kayi shi we Oswapo ngashi ya kala shito, oya ninga po yookangundu okashona kAakwaMusati, taka wilikwa kOmupresidende Omukulu Sam Nujoma na oye ta komanda shoka shi na okuningwa po nenge shi na okukala po.
Ta ti oshinima shoka osha eta etopoko mOswapo noshowo mOshigwana. Ta indile koshigwana shi yambidhidhe RDP oshoka oyo ashike ongundu ndjoka tayi vulu okuhanganitha ishewe oshigwana sha Namibia, shi kale shi na ombili, euvathano nesimanekathano.
‘Nonande taku tiwa kutya Omupresidende gwa Namibia, oHifikepunye Pohamba, hasho nande, Namibia pethimbo ndika oku na Oopresidende yaali, Hifikepunye Pohamba na Sam Nujoma, naangoka ta wilike oye Sam Nujoma, ha Hifikepunye Pohamba nande. Kutya Pohamba oye ta wilike Namibia, shoka okusosa ashike aantu omihoka komilungu, hasho nande, ngoka ta wilike oSam Nujoma, naangoka nee ita longo ngashi a hala oku na okutidhwa mo mOswapo nenge a kale ina pewa iilonga we,’ Nehova ta ti.
Nehova ta ti mOswapo itamu simanekwa we Uudemokoli nuuthemba womuntu. ‘Tala ashike shoka sha ningilwe mOngwediva, moka Ookaansela ya yi kOshipundi inaya hogololwa, mwa kwatelwa na Meya gwa mo omusamane Erastus Uutoni, ngoka omasiku ga zi ko a kala ta pula ndje kutya aniwa nandi mu pe oodokumende niimaliwa yOmbelewa yOshikandjohogololo sha Ngwediva. Ngame itandi popi naantu inaya hogololwa. Ota pula ngiini iinima mbyoka ye pehala mpoka ke li po a hogololwa? Nehova ta ti nokupula ngawo. ‘Ngame itandi popi oshinima shoka naantu inaya hogololwa, yi itula kiipundi pamukalo gwuukayamukulwa,’ Nehova ta ti ngawo.
Ta ti wo kutya Epangelo lyOswapo kali na ko nasha niimaliwa yEpangelo tayi kana nenge nuulingilingi tau ningwa mEpangelo nomoshilongo. ‘Talaashike kiimaliwa yomamiliona mbyoka ya kana mEpangelo, ashike sigo oompaka kapu na ngoka a kwatwa po naanaa shi na sha nekano lyiimaliwa yomamiliona ngaka mEpangelo.Nehova okwa kondema wo edhilaadhilo ndyoka lya etwa po lyokugwedhela oondjambi dhAanapolotika nOoperesenda 24% omanga aaniilonga mEpangelo, ngashi unene aalongisikola, aapangi, oondohotola nayalwe ye na oondjambi dha nanga nayi. Ta ti oondjambi dhaaniilonga mbaka mEpangelo odho dhi na ngeno okugwedhelwa ngele o Swapo nEpangelo lyayo oye na uuyuki shili.
Ta ti aakulupe ya Namibia itaya pewa oshimaliwa ngashi shi na okukala, ohaya pewa ashike okashonashona lela, inake ya gwana, manga iimaliwa tayi liwa po koonakwiiholamwene.
Moshigongi omo tuu moka, Nehova okwa kondema oshinima shokutunga Oombelewa dhOmukokolipresidende koshimaliwa shOomiliona N$22 (million) lwaampoka. Ta ti oshinima shika inashi pumbiwa nande, unene tuu sho moshilongo mu na ompumbwe onene yOosikola, aanasikola kaye na omambo ga gwana, aakulupe itaya pewa oshimaliwa she ya gwana, iipangelo kayi na omiti dha gwana nodhongushu, aaniilonga mEpangelo taya nana nuudhigu noondjambi oontshona haya kwata nosho tuu oompumbwe dhilwe odhindji.
Nehova ota ti kutya ngele oshigwana osha ka hogolola RDP momahogololo tage ya nuumvo, nena RDP otaka longa nuuyuki nokukandula po odhindji dhomomikundu Namibia e dhi na pethimbo ndika kohi yewiliko lyoSwapo.