Aalandithi yane yomomapandaanda ga Shakati ya monika ondjo

AALANDITHI yane yomomapandaanda ga Shakati ya kwatelwe po kOpolisi omasiku 15 Januari 2009 sho ya adhika aniwa taya landitha yaana oombapila dha pumbiwa, ya monika ondjo mOmpangu ya Mangestrata mOshakati mEtitatu lyoshiwike sha zi ko nokutumwa kondholongo yOomwedhi hamano kehe gumwe nenge ya fute kehe gumwe OoN$1000.

Pamapeko gOmpangu nogOpolisi, oonakukwatwa mbaka oyo nee Hertha Shikongo, Ester Shikongo, Aune Iikoti na Nandjila Vaino.Omutaleli gwUuhaku mElelo lya Shakati omusamane, Kornelius Kapolo, ngoka wo a gandjele uumbangi mOmpangu ya Mangestrata mOshakati, ota ti kutya oomeme mbaka yane oya taaguluka eutho lyElelo lyondoolopa lyonomola 265, ndyoka tali ti hamuntu ta ningi ongeshefa mehala lyElelo lyondoolopa kee na oomikanda dhiihwapo noomeme mbaka yane kaya li ye na omikanda ndhoka.Kapolo ta lombwele The Namibian kutya Elelo lya Shakati oli na lelauudhigu waantu taya landitha yaa na oombapila dhiihwapo ndhoka omuntu e na okukala nadho uuna a hala okuninga ongeshefa nokulandithila mOshakati nenge momapandaanda ga Shakati. Kapolo ta indile kaakalimo ayehe kutya shaangoka a hala okuninga ongeshefa nokulandithila mondoolopa ya Shakati na kale e na omikanda dha pumbiwa, na ngele hasho otaka landula ondjila ndjoka ya endwa koomeme mbaka yane. Ta ti melelo lya Shakati omu na okatopolwambelewa moka aakalimo taya vulu okuya nokupewa omauyelele kombinga yoshinima shika noshowo iikwawo oyindji ya pamba omautho gondoolopa. Omusamane Kapolo ta ti oshikonga shatya ngeyi shokukonga mo mboka taya landitha yaa na oombapila dhiihwapo, onkee tashi tsikile naamboka taya ka kwatwa moshinima shika otaya ka landulwa.