ELELONDOOLOPA lyaNgwediva otali indile aakalimo yomomukunda Omatando yaa tunge omatungo manga, omolwiilonga yomathaneko gokulundululila nokuninga omukunda ngoka oshitopolwa shondoolopa paveta, mbyoka tayi ka tamekwa kuyele omwedhi tu uka.
Moshigongi shoka sha ningilwe kelelo momasiku 8 Juli nuumvo, elelo olya li lya lombwele aakwashigwana kutya inaa tunga manga omatungo momagumbo gawo nenge palwe sigo ando omu Januali 2018, opo ku gandjwe ompito kelelo lyimanithe iilonga mbika yokumeta omukunda nguka. Poshigongi mpoka, elelo olya li wo lya pulwa kaakwashigwana opo li gandje ethaneko lyomukunda nguka nkene ta gu ka ningwa oshitopolwa shondoolopa. Ethaneko ndika olya li lya gandjwa kaakwashigwana.
Omupopiliko gwelelo lyOngwediva Jackson Muma ota ti kutya onando iilonga yokuninga omukunda oshitopolwa shondoolopa, oshinima hashi kutha ethimbo pamishangwa, elelondoolopa otali ka longa nuudhiginini nomeendelelo opo oshinima shika shipwe mule wethimbo efupi opo ompumbwe yevi yi kandulwe po.
Muma ta tumbula kutya etameko lyiilonga yokunyola omagumbo okwa tegelelwa li ningwe petameko lyomwedhi Aguste omanga pehililo lya Septemba kwa tegelelwa oku tamekiwa niilonga yokumeta sigo ehulilo lya Kotomba.
Petameko lyaJanuali 2018 elelondoolopa okwa tegelelwa li kale lya manitha iilonga ayihe mbika, naakwashigwana otaa ka pitikwa nduno oku tameka okutunga shampa owala taa gandja oopulana dhawo dhoku tunga kelelo opo dhi ziminwe.
Mongashingeyi, Muma ta tumbula, elelo itali ka pitika nando ogumwe a tunge opo iilonga mbika yi manithwe pwaa na uupyakadhi washa.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
