Aanasikola yapewa oondjato dhOsikola ku Atlantic Food Service

EHANGANO lyokugandja iikulya koosikola lyedhina Atlantic Food Services, meti 20 Novemba 2009 olya gandja omagano goondjato dhaanasikola kaanasikola yomOmihandjo mOoseko adhihe dhomIitopolwa ngashi, Oshana, Ohangwena, Oshikoto, Omusati noshowo Omaheke, mwa kwatelwa naamboka yOsikola yaShewa yopEluwa mOngwediva moShana.

Pethimbo ta gandja omagano goondjato ndhoka kaanasikola yomEluwa, Omweendithi Omukuluntu gwa Atlantic Food Services miinima yOmangeshefelo, omusamane Ryn Visser, okwa ti kutya egandjo lyomagano ngaka kAanasikola ye li mOmihandjo mOoseko dhomIitopolwa ya tumbulwa metetekelo, oshi li shimwe shomiinakugwanithwapo yawo yekwathelo lyopashigwana koshigwana moka taya longele. Omusamane Visser ta ti, yo oya tokola toko, okukwathela Uuministeli wElongo mokuungaunga nelongo lyoshigwana shokomongula. Ta ti omagano ngaka otaye ga gandja wo ongeulikilo kutya oya pandula noonkondo sho ya pewa iilonga kUuministeli wElongo, ano kEpangelo opo ya kale taya gandja iikulya kOosikola mIitopolwa mbyoka ya tumbulwa metetekelo. Omusamane Visser ta ti sho ya pewa Okondraka ndjoka oya uvaneka kutya otaya ka longa nuudhighinini notaya ka kwathela wo mElongo lyoshigwana shokomongula, ngashi nee taye shi pe oondjato dhOsikola ngeyi.Omuwiliki gwElongo ta kwathele kwali esiku ndyoka, omusamane Paulinus Enkono, okwa pandula noonkondo ehangano lya Atlantic Food Services, sho lya ninga etokolo ewanawa lyokugandja oondjato kAanasikola yomOmihandjo mOoseko, nEluwa lya kwatelwa mo.Esiku olyo tuu ndyoka, Atlantic Food Services, okwa gandja wo omagano gOkili kAanasikola yomEluwa, ye ga pewa kugumwe gwomaaniilonga yomoAtlantic Food Services, tate Sam Nepolo. ngoka e shi ningi pehala lyEhangano lyawo ndika. Omukuluntu gwEhangano ndika gwOpashitopolwa tate Frans Mbidi naye opo a li poshituthi shegandjo lyomagano ngaka pEluwa mpoka nokwa ti kutya ehangano lyawo olya tokola toko okukwathela oshigwana, unene tuu Aanasikola mOosikola dhawo momihandjo moka nosho tuu muule woomvuka ntano tadhi landula. Omwa li wo Omuwiliki gwIilonga gwEhangano ndyoka omusamane Mark van der Westhuizen noshowo me Annecke Lombard ngoka e li Omuwiliki gwEhangano ndika mOshitopolwa sha Hangwena noShikoto. Omusamane Paulinus Enkono okwa li a ende pamwe nOmunambelewa Omukuluntu gwOmihandjo mOshitopolwa sha Shana tate Andreas Shiindi, omanga aayenda ayehe ya li ya taambwa ko kOmukuluntusikola gwEluwa me Eva Shakuyungwa, e shi ningi pehala lyOsikola yawo ayihe yEluwa.