Aanona yeli momuhandjo kayena iikulya

Ombyarundu, osikola yaanona ta yi adhika moRuacana oya taalelwa komukundu gwondjala shono tashi kala eshongo enene kaanona oyendji. Osikola oyinapo owala ompunda yimwe yuusila womahangu nongele oya pupo aanona ota ya ka shuna komagumbo.

Ngoka ta longo pehala lyomukuluntu sikola,Hinsley Barnabas okwati kutya osikola oya taamba aanona 123 yo oyendji oyeli momuhandjo ngoka gwa etwapo koshigwana. “ Aanona yetu oyendji oha ya zi komahala gokokule. Opo tuyande aanona taya thiki ya lata, okwaaheya kosikola noku kwathela aanona opo yi itulemo melongo, oshigwana sha Ombyarundu, nomakwatho okuza kehangano lyaagandji yooshali lyaNetherland oshowo omutotipo gwosikola okwali ya kutha etokolo opo ya egulule omuhandjo gwaanona aashona okuza pomivo (5) sigo (13)” Baranabas tati.

Omuhandjo ogo gwa kwatelapo aanasikola oshoka, aakuluntu yaanona oyendji aasita yiimuna, noyena omuthigululwakalo gwoku tembuka okuza pehala limwe ya uka kehala ekwao omolwa uunapelo wiimuna yawo. “ Kashina egameno aanona ye ende oshinano shookilometa 15 okuya kosikola esiku kehe. Omuhandjo ogwali gwa nyanyukilwa kaavali oshoka aanona oyali yena ehala lyoku lala, yo ta ya mono ishewe iipalutha” Barnabas ta tsikile.

Omukalelipo kuluntu sikola nguka okwa tsikile ishewe tati kutya oya taalela omukundu gwiipalutha, oshowoo oombindja dhaanona unene tuu pethimbo twa uka lyuutalala.” Otatu indile koshigwana shitu kwathele okutupa iipalutha, oshoka aanona yetu ohatu yape owala iipalutha iikando iyali mesiku ngashi oshimbombo shetete uuna yeli pokafudho oshowo oshimbombo nosopa Uusiku, sho inashi gwana kuunona uli mepipi eshona” Barnabas ta popi ishewe.

Aakuluntu ohaya eta aanona yawo kosikola ngele tuna iipalutha ya gwana. “ Ohatu topolele aanona yeli pokati ko 45 sigo 60 iikulya mesiku shono hashi tu pula tu kale tuna ooshako dhuzila (7) woo Kilogram 50, osuuka yoo kilogram 10, omakende gomagadhi gokulya geli 51, oshowo oosopa (7) dhookilogram 5 komwedhi. Otwapumbwa ekwatho okuza kaagandji yooshali tu kwathelwe miikulya ngashi, olwiishi, omakoloni, omakunde, epolisa, omboga, iihakautu, uusila womahangu nowepungu oshowo iikulya yilwe” Barnabas ta tsikile.

Etaambo lyaanona posikola olyili pevi, yo aanona yamwe ota ya thigipo osikola omolwa ondjala. “ Aakuluntu ita ya vulu oku gandja omakwatho kosikola oshoka nayo oha ya hupu nomwakwato hayega pewa kepangelo. Omolwasho osikola oya taalela eshongo ndyono tashi vulika tali yi tula ponkatu yoku patwa. Otwali twa tseyithilwa kutya osikola yetu itayi etapo sha paliko.

“Tse inatu hala osikola yetu yipatwe pamukalo nguka. Otunawo eitaalo kutya uuna omuhandjo gwaanona yetu gwa taambiwako, osikola yetu ota yi ka eta iizemo iiwanawa moshitopolwa” Barnabas tapopi ishewe.

Gumwe gwomaatotipo yomuhandjo ngoka, Sara Mbwale okwati oya kala noku kwathela osikola nomusamane gwe noyeshi ningi uule woomvula 3. “Paife onkalo oya lunduluka. Omusamane gwandje okuli moshipundi shevululuko na ishewe okuna oshikukuta nuumvo. Otwa kanitha iimuna oyindji omolwa oshikukuta” Mbwale tati.

Ngele osikola oya pata aanona oyendji itaya mono elongo moshitopolwa shetu. “ Aakuluntu yaanona oyeli komahala geli kokule, nongele osikola oya patwa aavali oyendji ita ya ka vula oku tuma aanona kosikola yimwe oshoka noposikola mpano kashishi oshipu kuyo” Mbale ta tsikile noku popya.

Osikola okwali yina oku pata omasiku gaziko ashike aavali yamwe oya li ya kwathele noku gandja ooshako mbali dhuusila.” Iipalutha mbino inayi gwana nokayina iitungithi ya gwana okupewa aanona, ashike otwa hala ya kale kosikola. Omulongi sikola, Anna Munepapa okwati oku kala pwaahena iipalutha ya gwana otashi gumu nayi elongo lyaanona. “ Okuza ethimbo lyongula sigo opo 10, aanona oha ya kala yi itulamo melongo, ashike konima yomulongo aanona iha ya kalawe yi itulamo” Anna tati.