Aapolisi mOshana ya tyapula oshituthipaatishayo shokehulilo lyomumvo

OPOLISI ya Shana mEtitano lya zi ko lyeti 18 Desemba 2009 oya li noshituthi shawo shokutyapula nokudhimbulukwa iilonga yayo molweendo lwomumvo 2009, sha ningilwa mOpaaka ya Bennie mOngwediva nosha popithwa ku Kakukutu kOmatanga gOpolisi moNamibia Ndjayi Sebastian Haitota Ndeitunga, e shi ningi pehala lyOminista yEgameno nEpopilo lyOshigwana Omundohotola Nickey Iyambo ngoka a li ina vula okuholoka omolu omaimbo.

Oshituthi shika, sha li sha wilikwa ku Shisaande Slogan Matheus nokOmutalelisikola Fillemon Nangolo, ndele tashi egululwa nEgalikano kOmusita gwEgongalo lya Gloria Dei ELCIN mOngwediva Josef Avia, osha li sha popithwa wo ku Gavena yOshitopolwa sha Shana omusamane Klemens Kashuupulwa, kOmunangeshefa a tseyika nawa mwene gwOpaaka ndjoka tate Ben Hauwanga, kOmunashipundi manga gwEhangano lyAanangeshefa moNooli, omusamane Josef Kapya Endjala, kOmukuluntu gwOshitayi shOmbaanga yOtango yOpashigwana mOshakati tate Thomas Iindji, ku Komanda gwOpolisi mOshitopolwa sha Shana Komufala gwOpolisi Ndahangwapo Kashihakumwa noshowo nee kOmukuluntu gwOpolisi yOsipesiala mOshitopolwa sha Shana, Chief Inspecta Moses Kashala.Poshituthi opo tuu mpoka, opwa li pwa gandjwa Oonzapo dhEpandulo kaanangeshefa oyendji yomOshitopolwa sha Shana, ye dhi pewa ku Komanda gwOpolisi mOshana, Komufala gwOpolisi Kashihakumwa pehala lyOpolisi ayihe mOshana. Kakele koonzapo, aanangeshefa yamwe oya li ya pewa wo omakopi ongomalupandu giikalekelwa sho ya li ya kwathele opolisi moompumbwe dhi ili nodhi ili. Aanangeshefa yaali, omusamane Isai Nhinda gwOngeshefa yedhina Nhinda Entertainment noshowo tate Thomas Shetwaadha Taapopi gwongeshefa yedhina Express Forwarding Services, oya gandja omagano goodola dha Namibia OoN$38,440.28. Oshimaliwa shika osha nuniwa okukalanda iitenda yomapaya ngoka haga longithwa pomafumviko.Aanangeshefa yamwe oya gandja wo omapandulo kAakuluntu yOpolisi, ngashi unene ku Komufala gwOpolisi Ndahangwapo Kashihakumwa, Shisaande Chritine Fonsech, Chief Inspecta Karl Throne, Chief Inspecta Kashala, Inspecta Iipumbu nosho tuu yalwe ya longa iilonga yawo nuudhiginini. Opolisi yoyene ayihe mOshana, nayo oya pewa Ekopi lyayo, omanga Ndjayi Ndeitunga naye a pewa wo Ekopi lye lyepandulo kaanangeshefa sho ta longo nokuwilika Opolisi ya Namibia nawa. Ominista yEgameno nEpopilo lyOshigwana Omundohotola Nickey Iyambo naye okwa mona ekopi enene kamana kaanangeshefa, sho ta wilike nokusila nawa oshimpwiyu Uuministeli we unene tuu Opolisi ye. Omunangeshefa a tseyika nawa Tomane Rochas, mwene gwoRestauranda/Hotela Rochas mOshakati nomOshikango, kakele komagano galwe e ga pa Opolisi, okwa landela wo Opolisi ndjoka ya kala tayi longekidha oshituthi shika nokuyakula aayenda, omuzalo gwafaathana.Ndjayi Ndeitunga, okwa pandula noonkondo Opolisi ya Shana na Komanda yayo Komufala gwOpolisi Ndahangwapo Kashihakumwa sho tayi longo nawa, unene sho ye shi enditha nawa momahogololo ga zi ko. Ndjayi Ndeitunga ta ti omahogololo oga pwa nee manga, nOpolisi oyi na okutsikila nokugamenena po onkalo yeyo komeho lyopankalathano nolyopamona noshowo okukaleka po Oveta nElandulathano, ombili, egameno nengungumano. Ta ti okuuvite uuntsa uunene sho Opolisi ya Shana tayi longele kumwe naakwashigwana nopokati kayo noshigwana pu na ombepo yekwatathano ombwanawa. Ta ti osho na shi tsikikile ngawo. Ta indile kOpolisi yi ya kule oshigwana yaa na ombinga nande miilongayakulo yayo.Komufala gwOpolisi Kashihakumwa, mOshipopiwa she okwa ndjandjukununa mo unene uupenda wOpolisi ye nokweeta puuyelele iilonga ya simana ya longwa po kOpolisi ye muule womvula ndjika 2009. Omusita Avia, Gavena Kashuupulwa noshowo omusamane Ben Hauwanga, omusamane Thomas Iindji na tate Josef Endjala Kapya, miipopiwa yawo nayo oya pandula noonkondo kiilonga yuupenda tayi longwa kOpolisi ya Shana. Taye yi tsu omukumo yi tsikile ngawo. Chief Inspecta Moses Kashala okwa pandula ayehe ya kala taya longele kumwe nOpolisi, unene tuu oshigwana shaanangeshefa.