Aatotiveta ya hala ‘okabettinga’ka tulilwa po omilandu

Aatotiveta mboka oyo iilyo yegumbo lyopashigwana oya zi mokalungu kombinga yuudhano wokundombola pakumbetsa mboka wa tseyika nawa nedhina ‘okabettinga’, sho ya popi kutya oya hala pwa tulwa omilandu ndhoka tadhi kala tadhi wilike okumbetsa.

Pethimbo lyoompata kombinga yokabettinga oshiwike sha zi ko, Nico Smit, ngoka e li oshilyo shongundu yo-Popular Democratic Movement (PDM) megumbo lyopashigwana, osho wo oshilyo shongundu yoSwapo megumbo lyopashigwana Hamunyera Hambyuka oya popi kutya oya hala uubettinga wa tulilwa po omilandu osho wo omwaalu guusitola wokubettinga moshilongo gu ngambekwe opo owala pu tulwe oondjindikila dhaanona mboka haya kutha ombinga, ko ku kondjithwe mboka ya pikwa osho wo uukengeleledhi.

Omupeviminista guundjolowele nomayakulo gonkalonawa Ester Muinjangue okwa yambidhidha omayele gaanapolitika ya tumbulwa pombanda, sho yi indile pu tulwe omilandu.

Endombolo lyokumbetsa ano shoka tatu ti okubettinga inali tulilwa po naanaa omilandu dha sha moshilongo, naashoka oshe eta ongeshefa ndjoka yuubettinga yi kale tayi vulu okukala nuukengeleledhi wopashimaliwa osho wo omahangano guubettinga ga mone iiyemo ya pitilila noonkondo inaayi kondololwa.

Omayelele gaSmit, Hambyuka naMuinjangue oge ya naanaa pethimbo ndika pu na omapopyo kutya opu na aanapolitika yamwe taku hokololwa ye na ekwatathano ewanawa nomahangano ngoka gokubettinga.

Limwe lyomomahangano omanene gokubettinga moshilongo olya kala tali gandja omakwatho ga kola miinyangadhalwa yomaudhano moshilongo, okuyambidhidha omaudhano ngaashi uudhano wEkopi lyangoloneya – naashoka she eta omaipulo ogendji kutya otashi vulika pu na ekwathano ewanawa ndyoka tali e ta omakwatho gomakopi guudhano ngoka taga tanga aanapolitika.

Iilyo yimwe yegumbo lyopashigwana oya popile okabettinga taya popi kutya oyendji yomwaamboka haya dhana okabettinga ohaye shi ningi molwashoka “kaye wete iilonga ishewe oya sa ondjala”.

Ashike nando ongaaka, Smit okwa popi tati: “Ngele aanapolitika otaya kutha ombinga mokupopila okabettinga, nena shoka tashi gandja ompito kaanapolitika ya longe uulingilingi.”

Okwa popi kutya aanapolitika otaya vulu nuupu okudhana onkandangala okukotokela omilandu osho wo iikondo omolwuuwanawa womahanano guubettinga.

Moshilongo ngashingeyi kehe omugundjuka ota popi ‘okabettinga’ ano uudhano wokundombola nenge okumbetsa pakutengeneka moka omuntu ha hogolola mehwata lyomaudhano ga yooloka ngaashi okutengeka iizemo yetanga lyokoompadhi, ethigathano lyoonkambe, osho wo omatengeneko gomaudhano galwe ogendji ga yooloka.

Omumvo gwa zi ko onzonkundaneki ndjika oya kundaneke kombinga yomukalimo gwomoKatutura ngoka ke ena iilonga eshi dhenge komutse sho a sindana oshimaliwa shoomiliyona N$3,7 mokabettinga a longitha owala ooN$4 nokutengeneka omaudhano getanga lyokoompadhi ge li 13, mondjila.

Ashike nando ongaaka nakusindana oshimaliwa shoka otaku hokololwa a kala omudhani gwokabettinga ethimbo nuule.
Okabettinga ohaka dhanwa pamalungula okupitila muusitola wokundombola, pakompiyuta nenge pauhandimwe shampa owala to vulu okuya komalungula.

Uuna omuntu eshi dhenge komutse okutengeneka mondjila oha vulu okuza ko, ashike opo wu shi pondole ompito onene opo yi li wu kale wa hepekela mo oshimaliwa shoye nolundji aadhani yokabettinga oya pikwa, molwashoka ihaya vulu okukala inaaye ka dhana.

Omunelago lela oye ha sindana, noyendji ngashingeyi ohaya vulu okulongitha po iiyemo yawo ngaashi oondjambi nenge nokuli oku ka konga omikuli ya tule mokabettinga nelalakano lyokusindana oshimaliwa tashi gwana moshigandhi.

OMILANDU ODHA PUMBIWA

Pokati mpoka omupopiliko gwehangano lyokugongela iiyemo yepangelo okupitila miihohela lyedhina Namibia Revenue Agency (Namra), Tonateni Shidhudhu okwa popi kutya ngele omuntu oha sindana olundji oshimaliwa mokabettinga nena shoka tashi ti kutya oha mono iiyemo ye kehe ethimbo okupitila mokabettinga naashoka otashi utha a kale ta kuthwa iihohela kwaashoka ta sindana.

“Ashike nando ongaaka, ngele omuntu okwa sindana owala omalupita, ndele iha sindana aluhe, nena esindano ndyoka itali vulu okufutithwa iihohela,” osho a popi ngaaka.

Smit okwi indile Uuministili wOmidhingoloko, Omakuti, osho wo Omatalelopo wu tale muule nokukonakona oshikondo shuubettinga moNamibia yo ya yalule wo uubettinga mboka wu li moNamibia.

Smit okwi indile wo uubettinga wu tameke okufuta iihohela niifendela yokongulu.

Hambyuka okwa popi kutya okabettinga okapumbwa okuningilwa omulandu ngaashi naanaa dha tulilwa po omashina gokundombola – ngoka ge li moondingosho.

Okwa popi kutya iinyangadhalwa yomaudhano ga pamba aanapolitika mbyoka tayi yambidhidhwa komahangano guubettinga oya pumbwa okutonatelwa nokutalwa muule.

“Opwa pumbwa okutulwa miilonga omilandu adhihe tadhi pumbiwa
“Opo ongeshefa (kehe) yi tamekwe, oku na okukala kwa gwanithwa po omilandu adhihe,” osho Hambyuka a popi ngaaka.

Muinjangue okwa popi kutya okabettinga oha ka vulu okwe eta omuntu a kale a pikwa, uukengeleledhi nenge okwe eta uupyakadhi wuundjolowele wopamadhiladhilo, naashoka ohashi vulu okwe eta omadhiladhilo gwokwi ikutha omwenyo.

“Aantu mboka haya dhana okabettinga oya pumbwa okukala taya vulu okwiidhidhimika, ye na elandulathano notaya vulu okwiingambeka yoyene okudhana,” osho a popi ngaaka.

Oshilyo shongundu yoSwapo, Natangue Ithete okwa popi kutya ita yambidhidha okabettinga molwashoka sigo oompaka keshi kutya oha ka kwathele omuntu ngiini opo a ze mo moluhepo.

Okwa popi kutya kapu na omuntu e li kohi yomimvo 18 e na okupitikwa a dhane okabettinga.

OMILANDU INADHI PUMBIWA

Ashike nando ongaaka, opu na ngaa yamwe mboka ya kutha ombinga moompata ndhoka taya yambidhidha okabettinga ngaashi oshilyo shoPDM, Hidipo Hamata, ngoka a popi kutya oshikondo shuubettinga osha gandja iilonga unene kaagundjuka ishewe ohashi gwedha moshiketha shepangelo okupitila miihohela mbyoka hayi futwa kooyene yomahangano guubettinga.

Okwa li nokuli a gandja omwaalu gwaashoka she etwa moshigandhi shepangelo okuza komahangano guubettinga.

Hamata okwa gwedha po kutya kapu na oveta momutumba gwopashigwana ndjoka yi indika oshilyo shi kuthe ombinga nenge shi popile ongeshefa yoludhi kehe ndjoka yi li paveta.

Oshilyo shongundu yo-Namibia Economic Freedom Fighters, Kalimbo Iipumbu, okwa lombwele egumbo lyopashigwana kutya ita yambidhidha opo uubettinga wu tulilwe po omilandu, molwashoka mboka haya dhana uubettinga ohaya vulu okumona mo iiyemo yokwi ikwatha.“Aantu ohaye shi ningi [okudhana uubettinga] molwashoka inaya hala okuyaka iinima yaantu. Otashi sitha ohoni komuntu ta popi kutya uubettinga nawu tulilwe po omilandu. Ngele ku na ohokwe yokukala inoo dhana kala owala inoo dha, eto etha mboka ya hala, ya dhane,” osho a popi ngaaka.

Duminga Ndala gwongundu yo-Landless People’s Movement naye okwa popi kutya ita popile uubettinga wu tulilwe po omilandu.